РЕСПУБЛИКА ЧУРТАҒҶЫЛАРЫНА ТЕЕСТЕГІ СЫЙЫХ
16.03.2022
Хабарлар
Презентация. Республика правительствозында «Хакасия» (Хакасско-Минусинская котловина) энциклопедияның тӧртінҷі томы чон хайиина сығарылған
Ол «Хакас Республиканың региональнай политиказы» хазна программазы хоостыра чарых кӧрді. Аны Хакасия правительствозы хабазиинаң хакас чонның Улуғлар чӧбінең национальнай паза территориальнай политика министерствозы сығарыбысханнар. «Хакасия» (Хакасско-Минусинская котловина) энциклопедияның тӧртінӌі томы «Регионның хонии» адалча. Андар чирібістегі промышленность предприятиелерінеңер, аал хониинаңар, пӱдіріг паза палғалыс киректерінеңер, транспорттаңар, ідӧк культура, спорт учреждение-пірігістерінеңер искіріглер киріл парғаннар. Тиражы - 1000 экземпляр.
- Пу наа том Хакасияның чуртағҷыларына теестегі сыйых полча. Ол ідӧк, чир-суубыстың істезігҷілерінең пасха, республикабыстаңар пілерге сағынчатхан тиксі хазна чуртағчыларының хайиин тартар тіп сағынчам, - теен Хакасия пазы Валентин Коновалов.
Чоохтирға кирек, пис томнығ энциклопедияны чарыхха сығарар проекттің тӧстегӌізі паза устағӌызы экономика наукаларының кандидады, хакас чонның Улуғлар чӧбінің 2003 -2017 чыллардағы кнезі Владислав Михайлович Торосов полча.
- Аның ол сағызы 2010 чыллардох тӧреен. «Хакасия» (Хакасско-Минусинская котловина) энциклопедияның пастағы ӱс томы «Регионнаңар тиксі искіріглер», «Регионның чир-чайаан ис-пайы», «Регионның ӧӧн этностары - хакастар паза орыстар» адалча. Амды тӧртінҷі «Регионның хонии» адал парған том чарыхха сыхты.
Аны тимнеен авторларға улуғ алғыс, - чоохты узаратхан хакас чонның Улуғлар чӧбінің кнезі Пётр Воронин.
Энциклопедияның тӧртінӌі томын тимнирінде аймах орыннарда тоғынчатханнар араласханнар: Н.Ф.Катановтың адынаң Хакас хазна университедінің, Сибирьдегі федеральнай университеттің пӧлии полчатхан Хакасиядағы техническай институттың, Хакасияның тіл, литература паза тархын наука-істезігліг институттың ученайлары, республиканың министерство-ведомстволарның, муниципальнай пӱдістернің, предприятие-пірігістернің специалисттері. «Регионның хонии» томның нандырығлығ редакторы Хакасияның Оӧркі Чӧбі депутадының полысчызы Владимир Сергеевич Яблонский полча.
- Улуғ алғыс прай авторларға паза чыындыны тимнеен специалисттерге. Сағынчам, халғанҷы томны ідӧк турыстыра сығарыбызарбыс. Чоохтирға кирек, пу томзар 198 авторның тоғызы киріл парған. Тиксі, тізең, 230 азыра кізі араласхан, 1000 азыра статья пазылған, 100 азыра сом кӧрілген, - таныхтаан редактор.
Презентация тузында Валентин Коновалов «Хакасия» энциклопедияның тӧртінӌі томын тимнирінде ӧткін араласханнарға Хакасия пазының - Хакасия Правительствозы кнезінің Алғыстас пічиин читірген. Оларның санында полғаннар: хакас чонның Улуғлар чӧбінің араласчылары Пётр Петрович Бурнаков, Артём Никитич Асочаков, Н.Ф.Катановтың адынаң Хакас хазна университедінің экономика кафедразының доценті Людмила Константиновна Субракова, В.М.Торосовтың адынаң Хакас книга издательствозының редакторы Евгений Викторович Чезыбаев, Хакас Республиканың чааӌылар комиссарының полысчызы Олег Игоревич Пагельс, Н.Ф.Катановтың адынаң Хакас хазна университедінің техническай механика кафедразының доценті Виктор Степанович Иваненко, Хакас Республиканың пӱдіріг паза чурт-коммунальнай хоных министрінің пастағы орынӌызы Анатолий Анатольевич Безлепкин, Хакасияның национальнай архивінің устағӌызы Евгений Валерьевич Прищепа паза Хакасияның Оӧркі Чӧбі депутадының полысчызы Владимир Сергеевич Яблонский.
Тӧстегӌілернің искіриинең, «Хакасия» энциклопедияның пизінӌі томынзар Хакасияның тиксі тилізіне улуғ хозым иткен саблығ кізілернің чуртас чолынаңар искіріглер кирілері кӧрілче. Аны пӱӱл сығарыбызарға пӧгінчелер.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде