ЧИҢІСКЕ ІЗЕНЧЕБІС
16.03.2022
Хабарлар
Спорт. Пу чағында Асхыс аймааның Апчанай аалындағы мини-футболӌа хызыӌахтар командазы Россия первенствозында аралазар
Хайди олар марыға таллағ ирткенінеңер чоохтап пирген тренер Валентин Тормозаков. Аның сӧстерінең, 2008-2009 чылларда тӧреен хызыҷахтар 1-ғы класстаңох мини-футболнаң айғасчалар. Валентин Иванович оларны, тӧрт пулуңни турғыс салып, пастазып ойнирға ӱгрет сыххан. Аны хоостыра кем чахсы ойниры кӧріндіре, аның прай ниме килісче, ол ойнирға кӱстенче.
2021 чылда Апчанайдағы хызыҷахтар командазы Москва облазынзар Россия первенствозына чӧрген. Андада олар кічіг частығлар аразында марығласханнар, тӧртінҷі орынға турысханнар. Пӱӱл олар, Томскта Сибирьдегі федеральнай округ мариинда чиңіс тудып, пазох Россия первенствозына сығып алдылар. Амды ортын частығ командалар аразында ойнирлар. 18 мартта Апчанайдағы команда Индіркі Новгород облазындағы Суходол аалда поларға кирек. Россия первенствозы, 19 мартта пасталып, тӧрт кӱн иртер.
Таныхтирға кирек, Апчанайдағы школада спортзал чоғыл, аннаңар хызыҷахтар тасхар ойнапчалар. Че Сибирьдегі федеральнай округ мариина тимненчеткенде, соох кӱннер турыбысхан, аннаңар хызыҷахтар «Аскиз-автотранс» предприятиенің спортзалында тимненгеннер. Тренировкалар анда ікі неделя ирткеннер.
Тренировкалар тузында Валентин Иванович оларны, ікі командаа чарып, пизер кізі турғысча. Тӧрт футболист тӧрт пулуңни турып ойнапча, іди команда араласчылары удур-тӧдір пілісчелер.
Пылтыр Россия первенствозына 14 команда сыххан. Оларның иң кӱстіглері Томсктаң, Хабаровсктаң, Владикавказтаң, Санкт-Петербургтаң паза Москвадаң полғаннар. Андағ улуғ марығда аралазып, Апчанайдағы хызыҷахтар устарын кӧдіріп алғаннар. Первенствода кӱстіг командалардаң тоғыр турыстыра ойнирына ізенче Валентин Тормозаков. СФО мариинда олар, пір дее меспек кирдірбин, прай командаларны улуғ саннаң утханнар. Кемеров облазынаң килген хызыҷахтарны олар 9:0 саннаң чиңеннер.
- Алтай крайы командазынаң тоғыр ойнаанда, пастағы таймда піс пір гол кирібіскебіс.
Мин ӱгренҷілеріме хоза ікі гол кирерге пӧгін турғысхам. Ікінҷі меспегін кире тебіскенде, чиңіс пісти полар тіп ікінҷілебин сыххам, - чоохтапча Валентин Иванович. - Ойын тооза піс оларның саринда ла ойнаабыс. Томсктағы команда пастағызын на мындағ улуғ марыға сыххан. Олардаң тоғыр ойнаанда, пастағы таймда пис гол кирібіскебіс, ікінҷі таймда - хоза пір гол.
СФО мариинда чиңіс тутханда, чир-суғҷыларыбысха кубок, грамота паза медальлар читіргеннер. Ідӧк Апчанайдағы хызыҷахтарға Томскта футбол кип-азаан паза ікі мини-футбол меспегін сыйлап пиргеннер.
Валентин Тормозаков ӱгренҷілері Россия первенствозында финалға сығарына ізенізінең ӱлескен. Че сыйыхтығ орынға сығып аларға сидік полар. Марығда Краснодардаң кӱстіг команда араласча, ідӧк Ильиногорск городтаң чапчаң хызыҷахтар килче. Олар, майыхпин, ойын тооза чӱгӱр чӧрчелер.
Пістің командаа Россия первенствозында турыстыра ойнабызарға алғапчабыс.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде