ХАРЛЫҒ АЙМАХТА - «ХАРЛЫҒ ДЕСАНТ»
16.03.2022
Хабарлар
Волонтер кирее. Ағбандағы вузтарның студенттері полған на хысхызын тиксі Россияда иртчеткен «Харлығ десант» чӧрімде араласчалар, аймахтарха чорыхнаң сыхчалар
28 февральдаң 5 мартха теере Таштып аймаанда «Хысхы вишня» студенттер ӧмезі волонтер киреенең айғасхан. Таштып аймаа пазының социальнай сурығларӌа орынӌызы Елена Цыганкова чарыт пирген:
- «Россияның студенттер отрядтары» халых пірігізінің Хакасиядағы пӧлиинің араласчылары орындағы ӱлгӱзер постары айланғаннар. Піс оларнаң, хайди тоғынарбыс тіп, азынада чӧптезіг апарғабыс. 11 студент школаларда олғаннарға мастер-класстар, лекциялар, ойыннар иртірген. Ідӧк полған на аалда хабазығ кирексіпчеткен чуртағҷыларға одың чарарға, хар арығлирға паза пасха даа ибдегі, тасхархы киректерде полысханнар. Андағ кізілердеңер (кинек, кӧп палалығ, чалғызан чуртапчатхан, тынағдағы) аал чӧбінің тоғынҷылары азынада искір пирчелер. Иир де, тізең, Культура тураларында интерактив оңдайынаң концерт кӧзіткеннер.
Чииттер Ибіг, Индіркі Ибіг, Улуғ паза Кічіг Сии, Индіркі Сир, Пыдырах, Таштып аалларда волонтер тоғызын апарғаннар. Хайда оларны чуртатханнар? Таштыптағы 1 № школаның интернадында. Чиисті школа-клубтарда тимнеп пирчеткеннер. «Харлығ десант» акция Хакасияның ӱгредіг паза наука министерствозы полызиинаң иртірілген.
Аал хонии колледжінің студенті Анастасия Доможакова чорыхтаңар сағыстарынаң ӱлесче:
- Таштып аймаанзар килгенде, пісті ачых-чарых чуртағҷыларның удурлааны хайхатты. Школа ӱгренҷілері амыр, кӱлімзіреес пілдірткеннер, оларнаң чоохтазарға ниик. Позым Ағбан чуртағҷызы полчам, чӧрімде аралазып, аймах аалларны кӧріп алғам, мындағы чир-чайаанға хыныбысхам. «Хысхы вишня» ӧмезер полған на студент отрядынаң ікілер кізі алылча, андар кіріп аларға - позымның пӧгінім. Хакасияда 11 студент отряды саналча. Мин ӱгретчілер отрядынаң устапчам, пісғе 15 кізі саналча, че андар ӱгретчее тимненчеткен студенттер ле нимес, пасха даа кӧстеглерче ӱгренчеткеннер кірчелер. Кемнің волонтер тоғызы чӱреене чатча, чайғызын ахча тоғынып аларға сағынчатханнарға мындағ отрядтарға пірігерге чарир.
4 мартта Таштыптағы культура туразында аймах пазы Алексей Дьяченко паза аның орынӌызы Елена Цыганкова «Хысхы вишняның» араласчыларын ӧткін киректері ӱчӱн алғыстааннар. Аарластығ пічіктер паза сыйыхтар Илья Кострицынға, Ольга Тронинаа, Валерия Зарифова-Пыресеваа, Полина Артемьеваа, Ксения Алыповаа, Александр Курчатовха, Роман Ивашкинге, Игорь Кучугешевке, Константин Киселёвха, Анастасия Доможаковаа паза Алина Цыбенкаа читірілген. Анаң чииттер чыылған олғаннарға студенттер отрядтарының пӱдізінеңер, тархынынаңар, тилізінеңер чоох апарғаннар: фильмнер кӧзідіп, сценкалар оңдайынаң паза ойыннар иртіріп.
Ідӧк орындағы ӱлгӱ чииттерні Таштыпча экскурсияа ал чӧрген паза музейзер апар килген. «Хысхы вишня» ӱс чыл мының алнында тӧстелген, аннаң пасха, «Пламя Сибири» отряд пар. Пір хысхыда андағ чорыхха 1-2 хати сыхчалар, алындағы чылларда Ағбан пилтірі, Боград, Асхыс, Алтай аймахтарында пол килгеннер.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде