ПАЙРАМЫНА - СІЛІГ ЧАХАЙАХТАР
16.03.2022
Хабарлар
Чайаачы иир. С.П.Кадышевтің адынаң чон чайаачызының национальнай кінінде Хакасияның саблығ артизі Степанида Саможикованың пайрамнығ чазына чарыдылған иир ирткен
Степанида Саможикова артист, кӧгӌі, ырӌы, хореограф паза «Читіген» театрның хойнындағы «Айланыс» фольклор ансамбльының хоос устағӌызы полча. Аның ансамбльы тиксі Россияда саблан парған. Ол чоннар аразындағы кӧп фестивальның араласчызы паза лауреады полча. Чайаачы ӧме Турция, Голландия, Бельгия, Польша, Хорватия, Монголия хазналарынзар читкен.
Степанида Степановна ағас хомыс кӧг тириинең ойнап пастаан пастағы ипчі полча. Ідӧк ол «Хысхы саңнары» республикадағы пастағы кӧг марииның II степеньніг лауреады полыбысхан. Анда Степанида Саможикова «Хомызым» сарынны толдырған.
- Мин абахайыбысха иң пурнада хазых паза чайаачы кӱс алғапчам. Сірернің гастрольлар, чайаачы программалар ам даа кӧп полар. «Айланыс» театрның кӧглерін паза сарыннарын иссе, хакас чоныбыстың культуразы пайы ӱчӱн чӱректе ӧріністіг пілдірче. Андағох ла чалахай полыңар. Сірернің ӱніңер суғ чіли «хорлазын», таныҷах чіли «учухсын» паза кӱніҷек чіли прайзын «чылытсын»! - сіліг чахайахтар сыйлап, пайрамнығ чазынаң алғыстаан Хакасияның культура министрінің орынӌызы Лариса Киштеева.
Степанида Саможикованың чайаачы оңдайы кічігдеңӧк пілдірген. Ол, Шира аймаандағы Хызыл чул аалда ӧзіп, чир-чайаанның сілиине, хузыӌахтарның учуғыстарына ӧкерсінерге хынӌаң. Іди аның теелбек турғысчаң кӧңні азылған. Степанида Степановна «Абахай Пахта», «Хызыл чылтыс», «Ахол», «Хаңза пиг», «Хуу Хат», «Кӱлӱк Хооң», «Тӱгенӌі Хан», «Хонӌыхтар» ойыннарға теелбектер турғысхан.
Чайаачы иирде ол «Читіген» театрның артист хыстарынаң хада «Чазы хустары», «Торғайах» паза «Мелейім» теелбектерні толдырған.
Степанида Степановна ансамбльнаң хада «Чолпан Чылтыс», «Ах ой адым», «Ынархастаңар сарын» ырларны толдырған. Пу сарыннарның сӧстерін паза кӧӧн Хакасия искусствозының саблығ деятельі полған Александр Саможиков пасхан. Улуғ ачырғасха, Александр Степанович ах чарыхтаң най ирте парыбысхан. Пу чалахай кӱнде ол хайди даа хонғанынаң хости поларӌых, пайрамнығ иирні иртірерге хабазарӌых.
Аат осхас ирепчі Степанида паза Александр Саможиковтар ікі пала ӧскір салғаннар. Чайаачы иирде іӌе кізі «Іӌенің алғызы» сарынны (сӧстері чонни, кӧӧ Степанида Саможиковани) чӱрекке теерте ырлаан. Анаң сценазар Андрей оолғы паза Светлана хызы іӌезін чылығ сӧстернең алғыстирға сыхханнар.
- Хынған іҷебіс, Сірерге пик хазых, часка, амыр чуртас алғапчабыс. Пісті хайраллапчатхан ӱчӱн алғыстапчабыс. Сірернің хынызыңар пала-пархаларыңа кӱс пирче, - теен Светлана Саможикова.
Пайрамнығ чазын таныхтапчатхан артистті аның чағын арғыс-ӧӧрелері Хакасияның чон узы, хайӌы Сергей Чарков, Хакасия искусствозының саблығ деятельі, Хакасияның чон артизі, «Ӱлгер» фольклор ансамбльының хоос устағӌызы Кучен Ай Чарых Сайын, Россияның паза Хакасияның саблығ артизі Евгений Улугбашев, Хакасияның чон артизі, ырӌы Нина Идимешева, Хакасияның чон артизі, композитор, ырӌы Герман Танбаев, Хакасияның чон артизі Людмила Арыштаева, Хакасияның саблығ артизі Ираида Ахпашева алғыстааннар. Чайаачылар, хакас кӧг тиріглерінең ойнап, кееркестіг сарыннар толдырғаннар паза хайлааннар.
Ідӧк Степанида Степановнаа сыйыхтар, чылығ сӧстер паза сіліг чахайахтар читіргеннер: Россияның саблығ артизі, Хакасияның чон артизі Светлана Чаптыкова, Улуғлар чӧбі кнезінің орынӌызы Андрей Асочаков, Хакасияның кізі праволарынӌа уполномоченнайы Андрей Шулбаев, «Читіген» театрның директоры Ирина Чустугешева.
Чайаачы иир «Часхыдағы кӧңнім» (сӧстері паза кӧӧ «Читіген» театрның артизі Клавдия Топоевани) сарыннаң тоозылған.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде