ЧИҢІС КӰНІН ТУРЫСТЫРА УДУРЛИРҒА
18.03.2022
Хабарлар
Чыылығ. Республиканың музейінде Илбек Ада чаадағы Чиңістің 77-ҷі чылын пайрамни таныхтирына тимненер оргкомитеттің алғым чыылии ирткен
ХАКАСИЯДА ИЛБЕК АДА ЧААДАҒЫ ЧИҢІСТІҢ 77-ҷі ЧЫЛЫН ТУРЫСТЫРА ТАНЫХТИРЫНА ТИМНЕНІС ТОҒЫСТАРЫ АПАРЫЛЧА. РЕСПУБЛИКАНЫҢ Л.Р.КЫЗЛАСОВТЫҢ АДЫНАҢ МУЗЕЙІНІҢ ЧАА САБЛАНЫЗЫ ЗАЛЫНДА «ЧИҢІС» ОРГКОМИТЕТТІҢ АЛҒЫМ ЧЫЫЛИИ ИРТКЕН. АНЫҢ ТОҒЫЗЫНДА АРАЛАСХАННАР ХАКАСИЯ ПАЗЫ ВАЛЕНТИН КОНОВАЛОВ, ӦӦРКІ ЧӦП КНЕЗІ ВЛАДИМИР ШТЫГАШЕВ, АҒБАН ГОРОДТЫҢ ПАЗЫ АЛЕКСЕЙ ЛЁМИН, РЕСПУБЛИКАНЫҢ МИНИСТЕРСТВО-ВЕДОМСТВОЛАРЫНЫҢ, ХАЛЫХ ПІРІГІСТЕРІНІҢ УСТАҒҶЫЛАРЫ ПАЗА ДАА ПАСХА СТРУКТУРАЛАРНЫҢ КІЗІЛЕРІ.
Пандемия тузында регионда Чиңіс кӱнінде чаа парадтары даа иртірілбеен, алынӌа мероприятиелер онлайн оңдайынаң иртірілгеннер.
Хайди Валентин Коновалов таныхтаан, пӱӱл піс Илбек Ада чаадағы Чиңістің 77-ӌі чылын ӱлӱкӱнниріне чахсы тимнен саларға кирекпіс. Ағаа хоза, амғы пайрамға наа оңдайнаң кӧрерге кирек полар.
Россияа амды пазох нацизмнең тоғыр кӱрезерге паза амыр чуртас ӱчӱн турызарға килісче. Прай Хакасия 9 Майға теере ӱлӱкӱнге тимненіс тоғыстарын апарар.
Владимир Штыгашевтің чооғынаң, амғы чиит тӧлні патриотизмге хайди даа ӱгредерге кирек. Советтер тузындағы школа тилекейде иң чахсы ӱгредіг системазы полған. Хайди Россияның президенті Владимир Путин таныхтаан, амғы чуртас 24 февральға теере паза аның соондағы тусха чарылча. Чир-суубысха, ол чахсы чуртапчатхан, ӧңненчеткен туста ла нимес, ағаа сидік чухчатханда даа хынарға кирек. Тархын чахсы кӧзітче - Россия, хайдағ даа сидіктерні тобырып, азахха турып алча.
Чыылығда ідӧк чоох тутханнар республиканың культура министрі Светлана Окольникова, юстиция паза региондағы безопасность киректерінҷе министр Сергей Ромашов, істеніс паза социальнай арачыланыс министрі Владимир Чебодаев, ӱгредіг паза наука министрінің орынҷызы Юлия Ворошилова, Ағбан город пазы Алексей Лёмин, «Боевое братство» пірігістің кнезі Александр Векшин паза даа пасхазы. Полғаны ла позының сферазында ӱлӱкӱнге хайдағ тимненіс мероприятиелері иртірілчеткеннеңер паза ам даа апарылардаңар искірген.
Іди Владимир Чебодаевтің чооғынаң, республикада Илбек Ада чааның 48 кинегі паза араласчызы, хурчағда полған Ленинградтың 16 чуртағҷызы, фашисттернің концлагерьлерінде чазы читкелек туста тудылған 20 узнигі, 941 тыл істенҷізі, ідӧк ӱреен ветераннарның сӧбірелерінің 532 кізізі чуртапча. Прайзына законнаң кӧрілген социальнай полызығлар пирілер. Оларға пір хати пирілчеткен тӧлеглер, хазыхтарын тыыдарға путевкалар читірілер, чурттарын тыхтирға хабазарлар паза даа пасха полызығлар полар. Республика бюджедінең андағ тоғыстарға 19 миллион салковай позыдылар.
Владимир Штыгашев Россияның Тирігліг кӱстері Украинадағы ӧнетін чаа операциязын хайди иртірчеткенін ситкіп кӧрчеткеннеңер искірген. Аның чооғынаң, чағынғы 10 кӱнде пістің чааҷылар Пирятин городты позыдып аларлар. Андада аның чуртағҷыларына паза Россияның Тирігліг кӱстеріне алғыстас пічіктерін ызыбызарға кирек полар. Пирятин Ағбанның харындас городы полча.
Валентин Коновалов аның пастаанаң чарасхан.
- Оргкомитеттің пазағы чыылиина муниципальнай пӱдістернің устағҷыларын хығырып аларбыс. Оларның ӱлӱкӱнге тимненіс планнарын республика планынаң піріктіріп аларға кирек полар. Андада олар сыныхтағда тудылар. Ветераннарға хайди даа полызарбыс, матырларның махачызы хаҷан даа ундудылбазын. Чииттернең ол тоғысты кӱннің сай апарарға кирек. Ветераннарға ол иң чахсы сыйых полар, - таныхтаан Хакасия пазы.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде