АНЫҢ МАХАЧЫЗЫ ТАРХЫНҒА КІРДІ
18.03.2022
Хабарлар
Пістің матырларыбыс. Чарғы приставтары федеральнай службазының Хакасияҷа управлениезінің (УФССП) тоғынҷылары Станислав Чанковтың паба-іҷезіне чапсых сыйых читіргеннер
Станислав Чанков кӧп чыл Хакасияӌа УФССП-ның Асхыстағы пӧлиинде істенген, чарғыларның иптіг тоғызына хабасчатхан чарғы приставы полған. 2012 чылда август айда чарғылатчатхан кізіні чарғызар ағыларға Асхыс аймаандағы Пилтір аалзар тоғыс хоостыра парчатханда, Станислав орама ортызында изірік ирен ипчіні пычахтығ абылапчатханын кӧр салған. Ӱр дее сағынмин, машинадаң сығып, пристав сайбағӌыны тудып алған. Табырах имнег полызиин паза полиция нарядын хығыртыбысхан. Іди олар хыйалға кір парған ипчінің чуртазын ал халғаннар. Сайбағӌы чарғаа тартылған.
Станислав Чанков махачы тудынған ӱчӱн «За доблесть» медальнаң сыйыхтатхан, ідӧк ол «Федеральная служба судебных приставов. История. Люди. События» киндезер кирілген. Анда махачы чарғы приставтарынаңар пазыл парған. Ол киндені Хакасияӌа УФССП устағӌызының орынӌызы, істіндегі службаның полковнигі Юрий Буц Станиславтың паба-іӌезі Игнатий Иннокентьевичнең Варвара Ивановнаа читірген.
- Кічігдең сығара Станислав позын иптіг тудынҷаң, школаа кисчең кип-азаан хаҷан даа позы тимнеҷең, - чоохтапча матырның іӌезі. - Школада олаңай кӱреснең айғасхан, спорт узына кандидат атха турысхан.
Школа соонаң Станислав Чанков Олимп резерві училищезінзер ӱгренерге кірібіскен. Аны тоозып, Калининдегі ортымах школада тренер полып істенген.
Че пірсінде чуртазы саңай алыс парған. Школада тоғыс чох халғанда, Станиславты чарғы приставтарынзар тоғынарға хығырғаннар. Хакасияӌа УФССП-ның Асхыс аймаанӌа пӧлиинде ол 10 чыл артиинаң тоғынған, капитан ат алған.
Чуртас тооза аны талай позынзар тартхан. Срочнай службаны Хара талай флодында ирткен. Амды Станислав Чанков, талайӌы полып, сигізінӌі чылы Камчаткада служба апарча. Сӧбірезін андарох апарыбысхан. Хада хонғаны Ирина Сергеевнанаң ӱс пала ӧскірчелер. Станиславтың таниинаң, анда Хакасиядаң кӧп кізі чуртапча.
Игнатий Иннокентьевич паза Варвара Ивановна, кізі хыйалынаң оортах полбин, арачылаға килген оолғы ӱчӱн поғдархапчалар. Амды аның махачызы, киндеде пазылып, тархында халар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде