ХАКАС КӦГ КИБІРЛЕРІН ХАЙРАЛЛАПЧА
18.03.2022
Хабарлар
Чайаачы иир. 16 мартта Хакас филармониязында композитор Оксана Алахтаеваның пайрамның гала-концерті ирткен
Оксана Герасимовнаның ады Хакасия культуразының кӧглер тархынына наа пӧзік син пирче. Композитор чайаачы чолын Ағбандағы музыка училищезінде фортепиано клазынаң пастаан. Аның ӱгретчізі композитор, Хакасияның чон артизі Татьяна Шалгинова полған. Анаң чиит хыс Хазан городтағы хазна консерваториязында «Композиция» специальностьча ӱгренген.
Оксана Алахтаева Хакасияның паза Россияның композиторлар пірігізінің араласчызы полча. Пӱӱнгі кӱнде ол Ағбандағы музыка колледжінде істенче. Хакас кӧглернің кибірлерін хайраллап халар ӱчӱн, композитор чииттернең, студенттернең, музыка паза искусство школалары ӱгренӌілерінең кӧп тоғынча.
Пайрамнығ иирні музыка колледжінің хакас национальнай оркестрі (хоос устағӌызы паза дирижер Ольга Астанина) паза «Шейк» ансамбль (устағӌылары Анна Тинникова паза Дмитрий Протасов) «Хайадағы тіріл парған хоостар» композициянаң асханнар.
Музыка колледжі студенттерінің оркестрі ідӧк Оксана Алахтаева пасхан «Часхы ағылчатхан ах-пораат», «Хыныстаңар кип-чоох» кӧглерні толдырған. Анаң пайрамнығ чазын таныхтапчатхан композиторның кӧӧне ырӌы Юлия Чепашева «Иртіп парар» амыр сарынны (сӧстері Александр Баиновти) кееркестіг ырлаан.
Ідӧк концертте Ағбандағы А.А.Кенельнің адынаң музыка школазының ӱгренӌілері ӧткін араласханнар. Олар Оксана Алахтаеваның кӧглерін фортепианонаң сіліг ойнааннар.
Кӧг тиріглерінің устары Марина Дорина флейтанаң, Алексей Шевченко саксофоннаң, Нина Бочкарева скрипканаң, Тамара Соколова фортепианонаң В.Шекспирнің «Виндзорские насмешницы» комедиязына пазылған кӧглерні толдырғаннар.
Тун пайрам - хакас чонның хынған ӱлӱкӱні. Анда республика чуртағӌылары ат чарызын, алып оолларның кӱрезін, абахай хыстарның теелбектерін кӧрерге паза ас-тамах ярмарказында аралазарға чыылысчалар. Концертте пу ӱлӱкӱнге чарыдылған «Тун пайрам» сарынны (кӧӧ Оксана Алахтаевани, сӧстері Геннадий Косточаковти) ырӌы Катя Килижекова толдырған.
Антракт соонаң чайаачы иирнің ікінӌі чардығында Хакасия искусствозының саблығ деятельі, дирижер Вячеслав Инкижековтың устаанынаң республика филармониязының саблығ симфоническай оркестрі араласхан.
Оксана Алахтаеваның пабазы Герасим Капсаргин Пии аймаандағы Хойбал аалдаң полған. Амды аның кічіг чир-суун, Хойбал чазызының хыри-пазы чох сілиин хызы позының кӧглері пастыра саблапча. Концертте Россияның паза Хакасияның саблығ артизі Евгений Улугбашев «Хойбал чазызы» сарынны (кӧӧ Оксана Алахтаевани, сӧстері Полина Артоновани) чатханнаң толдырған. Симфоническай оркестрнең хада тимнелген чайаачы кӧзідіг морсымнығ полған.
Россияның паза Хакасияның саблығ артизі Зинаида Аршанова поэт Валерий Майнашевтің кибелістеріне пазылған «Тоозылбас-парбас чуртастаңар», «Ыраххы чылтыстың мӧңіссірезі» опера сарыннарын паза илбек хакас учёнай Н.Ф.Катанов хаӌанох чыған алғастарны ідӧк симфоническай оркестрнең хада толдырған (кӧӧ Оксана Алахтаевани).
Кееркестіг ыр-кӧглер соонаң сценазар пайрамның ӧӧн матыры сыххан. Кӧрігӌілер аны ізіг айа сабызынаң удурлааннар, абахай композиторға сіліг чахайахтар сыйлирға маңзырааннар.
- Пу ӱлӱкӱнні піс тың сахтаабыс. Часхының айас кӱннерінде чалахай иир ирткеніне най ӧрінчем. Оксана Герасимовна минің туңмам. Аның пабазы паза минің іҷем - хада тӧреен харындас-пиҷе. Мин Оксананы кічігде кӧрҷеңмін, Ағбандағы музыка школазынзар ал чӧрҷеңмін.
Пӱӱн піс, Чаптых, Хойбал, Алахтайлар паза Аршаннар ааллар чуртағҷылары, прай 15 кізі, хозылып, Алахтайлар аал школазының автобузын чаллап, концертке килгебіс, - чоохтаан Аршаннар аалы клубының хормейстері Альбина Алахтаева.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде