Тӧӧ чирінің матыры
27.03.2022
Хабарлар
Чир-суғҷыбыс Владимир Боргояков, Украинада иртчеткен ӧнетін чаа операцияда аралазып, тынын пир салған. Киҷее аны кічіг чир-суунда Асхыс аймаандағы Чоғархы Тӧӧ аалда тӱгенҷi чолына ӱдескеннер.
Чобағлығ мероприятиеде Хакасия пазы Валентин Коновалов, Асхыс аймаа устағҷылары, республиканың чааҷылар комиссариадының тоғынҷылары араласханнар. Ӏдӧк Владимирнең анымҷохтазарға Бурятияда хада служба апарған арғыстары килгеннер.
Киҷее чобағлығ кирек кӧп кізіні піріктірген. Гвардияның старшиназы Владимир Боргояков чир-суун арачылир тоғыс таллап алған, танк взводының командирі полған. Валентин Коновалов, килген чонзар айланып, чоохтаан:
- Пӱӱн Хакас чирінзер, Асхыс чирінзер, чобағ читті. Піс чир-суғҷыбыс Владимир Боргояковнаң анымҷохтасчабыс. Ол Украинада иртчеткен ӧнетін чаа операциязы тузында, махачы чаалазып, чуртазын пир салған. Ол чааҷы службазын таллап алған, пісті прайзыбысты, Луганск паза Донецк чон республикаларының чуртағҷыларын арачылаан, нацизмнең тоғыр кӱрескен. Владимир 11 чаа сыйыхтарына турысхан, оларның санында – Мужество ордені.
Хакасия пазы Владимир Боргояковтың сӧбірезіне полызығ пирілер тіп ізендірген. Асхыс аймаа пазы Абрек Челтыгмашев, чоох тудып, таныхтаан:
- Пӱӱн піс халғанҷы чирінзер матыр оол Владимир Боргояковты ӱдесчебіс. Мында аның чуртас чолынаңар чоохтааннар. Хаҷан-да ол пу аалда чӱгӱр чӧрген, прайзын ӧріндірген, Асхыстағы лицейде ӱгренген. Школаны тоозып, олимп резері училищезінде ӱгренген. Че чуртазын армиянаң палғалыстыр салған. Тынаға сығып, Владимир кічіг чир-суунзар айланарға, палаларын ӧскірерге сағынған. Че киліспеен. Пу чобағ республиканың полған на чуртағҷызына теелген полар.
Ӏдӧк Хакасияның национальнай паза территориальнай политика министрі Михаил Побызаков паза Владимирнің хада служба апарған арғыстары чоох тутханнар.
Чир-суубыстың арачылағҷызын Чоғархы Тӧӧ аалда чыып салғаннар.
Автор :
Антон Чертыков
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде