"Чиит Хакасия" форум öткiн тоғынча
29.03.2022
Хабарлар
Республикада "Чиит Хакасия" форум иртче. Ол 14-35 частығ оол-хыстарға кöрiлген. Пöгiнi - амғы туста чииттерге сағынған сағыстарын чуртасха кирерге хабас пирерi. Форумның араласчылары Хакасияның аймах-городтарында чыылысчалар.
Iди пастағы кӱнде, 23 мартта, Харатас городтағы тағ-пӱдiрiг техникумының студенттерiне тöрт площадкада наа пiлiстер алып алар оңдай пирiлген. Кöзiдiмге, "Территория добра" площадкада оларға волонтерларның кöстеглерiнеңер искiрiглер идiлгеннер. Чоох тутханнар Хакасиядағы пос кöңнiнең чонға полысчатхан кiннiң устағӌызы Никита Мальчиков, "Городские реновации" пiрiгiстiң устағӌызы Анастасия Филиппова паза Россияның "Волонтеры Победы" пiрiгiстiң Хакасиядағы пöлиинiң устағӌызы Анастасия Ершова.
25 мартта саяногорсктағы чииттер пу городтағы политехническай техникумда тöстелген пис площадканың араласчылары полғаннар. Оларға пии аймаандағылар хозылғаннар. Оол-хыстарға "Территория бизнеса" площадкада постарының проекттерiнең пасхазын таныстырарға паза орындағы идiнӌек Ирина Шведтiң пос киреен асханынаңар, тилiткенiнеңер истiп аларға чапсых полған. Паза "Чиит Хакасия" форумның полған на кӱнiнде "5 шагов гранта" скилл-сессиялар кöрiл парғаннар. Оларда чииттерге социальнай проекттер тимнирiнӌе мастер-класстар кöзiдiлчелер.
Пии аймааның чииттерi iдöк "Территория спорта" площадкада öткiн араласханнар. Олар прайзы "Россия - минiң хазнам. Мин аны чахсыландырарына кöп кӱс саларбын" темаӌа сағыс-кöрiстерiн читiргеннер.
Мындағох пöгiннең 28 мартта Ағбан пилтiрi поселоктағы культура туразында Ағбан пилтiрi аймаандағы паза Сорығ городтағы оол-хыстар чыылысханнар. Оларға iдöк аймах мастер-класстар, коуч-сессиялар, тренингтер, спикерлернең тоғазығлар иртiрiлгеннер.
Таңда, тiзең, 30 мартта, Ширада ширадағылар паза орджоникидзедегiлер тоғазарлар, 1 апрельде - Боградта орындағы чииттер. 4 апрельде абазадағылар Асхыс паза Таштып аймаандағы öткiннернi постарынзар хығырчалар.
6 апрельде, форумның халғанӌы кӱнiнде, Хакасияның ööн городындағы чииттер чыылызарлар. Оларға алтай аймаандағылар хозыларлар.
Автор :
Тимнеен Александра Карамчакова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде