ААЛДАҒЫЛАРҒА - УЛУҒ СЫЙЫХ
30.03.2022
Хабарлар
Тоғыс чорығы. Хакасия пазы Валентин Коновалов Шира аймаанда пол килген. Ол анда Тойым поселок чуртағҷыларынаң тоғасхан паза Тоғызаас аалдағы наа ФАП-ты пайрамни азарында араласхан
ШИРА АЙМААНДАҒЫ ТОҒЫЗААС ААЛ ЧУРТАҒҶЫЛАРЫ ПУ КӰНӀӀ ТЫҢ САХТААННАР. ОЛАРҒА ПАСТАҒЫ ИМНЕГ ПОЛЫЗИИН ПИРЧЕТКЕН СПЕЦИАЛИСТ, ТІЗЕҢ, НАА ТУРАЗАР КӦЗЕР ТУС ЧИТ КИЛГЕНІНЕ УЛАМОХ ТЫҢ ӦРІНГЕН.
Эльвира Сергиенконың тӧреен-ӧскен чирі пуох аймахтағы Тойым поселок полча. Анда школа тоозыбызып, Хызылчардағы имнег техникумында акушерге ӱгреніп алған. Диплом хоостыра пала тапчаң турада тоғынары аның мыннаң мындархы пӧгіні полған. Че чиит хыс, ирге парыбызып, Тоғызаас аалзар кӧзібіскен.
- Мин мында пизінҷі чылы тоғын парирбын. Паланаң одырарға маңнанғамох. Паза специалист чохтаңар, тоғысха ирте сығыбызарға киліскен. Хайди піс тоғынғабыс? ФАП орындағы Культура туразының ікі комнатазында орныххан. Ағаа хоза, тура хырында тизік полған. Наңмыр чағза, суғ кірче. Тиксі чоохтаза, чонға уғаа хомай оңдайларда полызығ пирілҷең. Ізіг суғ ідӧк чох полған. Амды, тізең, чӱрекке тың истіг. Фельдшер-акушер пунктына алынҷа тура пӱдір пиргеннер.
Аның улии - 100 квадрат метр. Ол - уғаа улуғ паза чарых. Процедуралар иртірҷең, прививкалар турғысчаң пӧліктер алынҷа. Аптека пӧлии алынҷох. Фельдшерге кабинет парох. Имнег тиріглері прай алылған. Кӧңнібіс толды, ӧрінгенібіс пу чир чох, - ӱлескен наа ФАП устағӌызы.
Шира аймаандағы Тоғызаас аалдағы фельдшер-акушер пункты регионның «Пастағы имнег-санитар полызиин пирерін тилідері» программазы хоостыра пӱдірілген. Республика бюджедінең тиксі сигісче миллион салковай позыдылған.
- Фельдшер-акушер пунктының пӱдіриине 5 миллион ча салковай хорадылған, 2 миллионча салковайға имнег тиріглері алылған, 1 миллионча салковай тураның ибіркізін иптиріне кӧріл парған. Пу чылда республикада мындағох модульнай 15 ФАП пӱдірерге кӧстег турғызылған, - чоохтап пирген Хакасияның хазых хайраллаӌаң министрі Олег Ананьевский.
- Мындағ учреждение пӱдіріл парғаны, тоғызаастағыларға ла нимес, тиксі республикаа ӧрініс ағылча. Чонның хазии, чахсы чуртазы ӱчӱн Хакасияның правительствозы кӧп тоғыс итче. Мыннаң мындар ідӧк узарадылар. Аннаңар пӱдіріглерде араласчатханнарға прайзына улуғ алғызыбыс читірчебіс, - теен Хакасия пазы Валентин Коновалов.
Тоғызаас аал Коммунар аалдаң 30 километр ырах орныхча, Ширадаң - 45 километр. Пӱӱнгі кӱнде пу аалда 343 кізі чуртапча, оларның аразында 79 пала. Амды, наа ФАП пӱдіріл парғанда, оларға пасха чирзер чӧрерге киліспес.
- Фельдшерге чонға пастағы имнег полызиин пирер прай оңдайлар пар мында. Олғаннарға, улуғларға кӧрілген прививкалар турғыс турар, диспансеризация иртірер. Ідӧк азах аар чӧрчеткеннерге полызығ пирері кӧрілче. Паза постары кил полбинчатхан улуғ частығларзар чӧрерін узарадар. Шира аймааның ӧӧн имнег туразынаң пеер имчілер аал чуртағчыларының хазиин сыныхтирға хайди даа кил турарлар. Неделяда пір хати, - теен Шира аймааның ӧӧн имнег туразының ӧӧн имӌізі Наталья Угдыжекова.
Тоғызаас аал чӧбі пазы Сергей Евдокимовтың искіриинең, пу аалда фельдшер-акушер пунктының позының туразы хаӌан даа чох полған.
- Совхоз конторазының туразында орныхчаң, анаң олған садының паза культура тураларында. Піс пу наа пӱдірігні 2016 чылдаң сығара сахтадыбыс. Ана ол чылда ФАП-ха чир пиріл парған. Аның ӱчӱн улуғ алғыс Хакасия правительствозына, хазых хайраллаҷаң министерстваа, Шира аймааның устағ-пастаана, - чарытхан Сергей Леонидович.
Тоғызаастағы наа фельдшер-акушер пунктын піди пайрамни азып, аның істі-тастын паалаан соонда республика пазының тоғыс чорығы Тойым поселокта узараан. Валентин Коновалов пастап андағы психоневрология интернадының пӱдірии хайди парчатханын кӧріп алған.
- Пӱӱнгі кӱнде халғанҷы тоғыстар апарылчалар тиирге чарир. Корпустар істінде чарытхы тартылча, вентиляция, ӧрттең тоғыр кӱресчең системалар турғызылчалар, істіндегі тоғыстар апарылча. Корпустарзар чылығ пирер тоғыс ідӧк толдырыл парған. Чахсы кӱннер турыбысса, интернаттың ибіркізі иптелер, сиденнелер, спорт площадказы тимнелер. 2022 чылның сентябрь айында интернаттың ізиин азыбызарға пӧгінчебіс, - искірген Хакасияның пӱдіріг паза ЖКХ министрі Валерий Келин, Хакасия пазына сан пиріс идіп.
Республика устағӌызы Валентин Коноваловтың Шира аймаанзар тоғыс чорығы Тойымдағы чоннаң тоғазығнаң тоозылған. Ол орындағы клубта ирткен.
25 мартта Культура тоғынӌызының кӱні таныхталча. Аннаңар пу тоғазығ алғыстас читірерінең пасталған. Кем Тойым поселоктағы клубта полған, ол аның пасха учреждениелерінең пасхалалчатханын сах андох кӧрче. Аның пӱдірілгені хайхастығ тиирге чарир. Істезігӌілернің искіриинең, ол тураны ГУЛАГ-та одырған кізілер 1953 чылда пӱдіртірлер. Тың ӱрӱгістіг, че аның пӧзік колонналары, барельефтері ам даа пик турчалар. Пылтыр, клубтың амғы устағӌызының кӱстенізінең, Тойымдағы пу учреждениені хазна культуразы ис-пайының хайраллалчатхан объекттер санына кир салардаңар айланыс ызылған. Улуғ ӧрініске, прай кирек сыныхтағлар иртіріл парған соонда, тойымдағыларның айланызы хайыға алылған. Амды пу чылдаң сығара анда алғым тыхтағ тоғыстары пасталыбызар. Ӧӧні - аның пастағы кӧрімі алыстырылбас!
Тойымдағы культура учреждениезін хайраллап халарына кӧп кӱс салған поселоктың чуртағӌызы Фаина Павловна Марухина. Ана ағаа пу тоғазығда Хакасия пазы - Хакасия Правительствозы кнезінің алғыстас пічии читірілген.
Хайди тӧреміл искірілче, Валентин Коновалов мындағ чорыхтарға олаңай ла чӧрбинче. Аның пӧгіні - республика чуртағӌыларының сидіксіністерін піліп, оларға полызар оңдайлар табары.
Тойым чуртағӌыларының ідӧк аймах айланыстар полғаннар. Валентин Олегович, прайзын санға алып, комитет-министерстволарнаң хада оларны хайди даа пӧгібізерге кӱстенербіс теен.
Чоохтирға кирек, Шира аймаандағы Тойым поселокта пазағы чылдаң сығара алызығлар харахха кӧріндіре полары кӧрілче. Анда, психо-неврология интернады тимге сых парарынаң пасха, школада алғым тыхтағ тоғыстары иділер, аал чӧбіне алынӌа тура пӱдірілер, нинӌе-де орама нааӌылалар.
Тиксі чоохтаза, «Аалларның тиксі тилізі» программа хоостыра 2023 чылда Тойымны иптиріне 330 миллион салковай пиріл парған. Туризмні тилідеріне ідӧк асхынах нимес ахча позыдылған. Мындағ чахсы хабарны чуртағӌыларға Тойым поселок чӧбінің пазы Евгений Кулешов позы искірген.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде