РЕСПУБЛИКА ПАЗЫНАҢ АЗЫХ ЧООХТАЗЫҒ
06.04.2022
Хабарлар
Сомда: Таштып аал чӧбінің пазы Рустам САЛИМОВ Хакасия пазы Валентин КОНОВАЛОВТЫ суғ хазын иптепчеткен тоғыснаң таныстырча
Тоғыс чорығы. Хакасия пазы Валентин Коновалов 1 апрельде Таштып аймаанзар тоғыс чорығынаң чӧрген
ХАКАСИЯ ПАЗЫ ВАЛЕНТИН КОНОВАЛОВ ТАШТЫП ААЛЗАР ЧИТКЕНДЕ, ПАСТАП АҒАА СУҒ ХАЗЫНДА ИПТЕЛЧЕТКЕН ОРЫННЫ КӦЗІТ ПИРГЕННЕР. ТАШТЫП ААЛ ЧӦБІНІҢ ПАЗЫ РУСТАМ САЛИМОВ, ОЛҒАННАРНЫҢ ПРОЕКТІНЕ ТӦСТЕНІП, ХАЛЫХ ЧОННАҢ ЧӦПТЕЗІП, «НАБЕРЕЖНАЯ» АДАЛЧАТХАН ПРОЕКТЧЕ ТОҒЫС ХАЙДИ ПАРЧАТХАНЫН ЧАРЫТ ПИРГЕН.
Анда пӱдірігнің пастағы теезінде «Кораблик» олған комплексі, одырӌаң скамейкалар турғызылған. Улуғ тоғыс брусчатка саларында апарылған. Олған площадказы суғ саринзар чылбазын тіп, траверстер салып, хайаа хаптырғаннар. Пӱдіріге 2021 чылда «Городта истіг оңдайлар тӧстирі» программаӌа 2,5 миллионӌа салковай хорадылған (федеральнай бюджеттің ахчазы) паза 500 муң - аймах ахчазы, 100 муң салковай - спонсорларни.
Пӱӱл «Набережная» пӱдірігнің ікінӌі теезі парча, ідӧк 2,5 миллионӌа салковай олох программаӌа кӧріл парған, пос ахчазы салыларох. Суғ хазын читіре иптебіссе, анда олған-узахха даа, улуғларға даа тынанӌаң чахсы орын пол парар нооза. Итсе, пӱӱнгі кӱнге Таштыпта тӧрт олған площадказы «Городта истіг оңдайлар тӧстирі» программаӌа пӱдірілді, анда палаларға тасхархы тренажерлар турғызылған.
Анаң республика пазы Валентин Коновалов мындағы ӱлгӱ пастарынаң хада Таштыптағы 16 № профессиональнай училищенің студенттерінең тоғасхан. Ӱгренӌілер паза училище тоғынӌылары, постарының ағырсымнығ сурығларын чарыдып, Валентин Коноваловсар айланғаннар.
Чиит оол Леонид Сагатаев Таштыптаң Харағай аалға теере чолдаңар сурығ пирген. Ол саринда чуртапчатхан улус кӧп чыл изере ол чолда асфальт тӧзеп пирерге сурынча, часхы-кӱскӱзін чолны грейдернең иптезелер дее, сайлығ чолӌа чӧрерге сидік. Республика пазы теен: «Кӧп ниме аал устағ-пастаанаң палғалыстығ, олар тыхтағ тоғыстарына проект-смета пічіктерін тимнебісселер, федеральнай программада аралазып, ахча табар оңдай пар. Таштыптаң Пыдырахха теере ле чолны иптиріне 200 миллион азыра салковай киректелче.
Ікінӌі сурығ сӧп-сап чығӌаң орыннарға теелген, оларны чох идеріне алай иптебізеріне. Пӱӱнгі кӱнге республикада сӧп-сап чығӌаң пис полигон саналча, чарытхан Коновалов, пасхазы иргілен парған, амғы тус кирексіністеріне нандырбинчалар, аннаңар оларны чох идерге кирек. Анзына тус кирегӧк.
Ідӧк студенттер мындағ сурығларнаң айланғаннар: «Хайдағ профессиялар пу чағында киректелер?», «Ас-тамах паалары ӧссе, хайди регионның устағ-пастаа оларны тохтадар?», «Кірче бе республика пазының тоғызы Валентин Коноваловтың кӧңніне?», «Сығар ба республика пазы теестегі табығларға?» Валентин Олегович, пу паза пасха даа сурығларға чарыда нандыр пиріп, чииттерзер айланған: «Піс ізенчебіс, сірер, чахсы специальностьтарға ӱгреніп алып, Хакасияда халарзар. Сурығларың хынығ полған, хайди кӧрчезер, минің не хабазиимнаң сидіксіністер пӧгілбинче. Кӧп ниме орындағы ӱлгӱлердең сылтағлығ, олар проект-смета пічіктерін тимнеп алзалар, хазна экспертизазын тузында иртібіссе, кӧп чол азылча...»
Анаң Валентин Коновалов Культура туразында аал чӧптері пастарынаң тоғасхан. Тоғазығ Таштып аймааның 2030 чылға теере тилізіне чарыдылған. Тегілек стол оңдайынаң апарылған тоғазығда чон таллап алған аал пастары ӧӧн сидіксіністерінең, постарының кӧрістерінең ӱлескеннер. Индіркі Сир аал чӧбінің пазы Олеся Петрунова, аал чӧбіндегі иргілен парған коммунальнай техниканы нааға алыстырарға тіп, регион программазын тӧстебізерге сурынған, паза аал чӧбінің туразы алғым тыхтағ чох илееде тур парир, пір дее программаа кір полбинча тіп хоптанған. Республика пазы ол сурығнаң финанстар министерствозынзар айланарға кирек теен. Арбыт аал чӧбінде суғ тазарынаң хорғыс пар, ааллар ибіре дамбалар пик турча, че Арбыттың чоғархы саринда аал хонии чирлерін Ағбан суғ кӧместең ибір парир, оларны хайди-да арачылирға кирек. Суғ ол саринаң аалзар кірібізерінең хорғыс пар. Паза айланыстар чолларға, изел парған чуртха, чарытхаа, тарифтерге, сотовай палғалысха теелгеннер. Ол сурығларӌа республика пазы аймахтың ӱлгӱзіне паза нандырығлығ министерстволарға тоғынарға чахығ пирген.
Олох Таштыптағы культура туразында Валентин Коновалов аймах чуртағӌыларынаң тоғазып алған. Анда республика пазы хайдағ хабазығ чуртағӌыларға, идінӌектерге, Таштып аймаана пирілгенінеңер чоохтап пирген. Пылтыр аймахха 140 миллион салковай дотация оңдайынаң хабазығ полған. Хай пірее социальнай объекттер пӱдірілче, анзын кізілер постары даа сизінче поларлар. Таштып аймаа, Хакасия даа пір орында турбинчатханынаңар «Хакасия пістің кӱннерде» фильм кӧзіділген.
Чуртағӌылар ағырсымнығ сурығларын ӧткін чарытханнар, оларның аразында депутаттар, чииттер, аал хонии тоғынӌылары, ӱгретчілер, имӌілер, халых пірігістерінің кізілері полғаннар. Пыдырахтағы ӱгретчі Полина Чебочакова хатабох сӧп-сап суриин кӧдірген, Таштыптағы сӧп-сап чыылчатхан орындағы похсах прай Пыдырах саринзар учухча. Маллар-хойлар ідӧк ле сӧп-сап аразында оттапчалар, хайдар парарлар за?
Амды 1 июльдаң сығара наа закон хоостыра мал идін садыға апарчатхан чонға малны «забойнай» цехта ла соғарға чарадылар. Таштып аймаанда андағ цех пӱдірілгелек. Ам чуртағӌыларға малны Асхыссар ал чӧрерге бе тіп сурығ полған. Пілдістіг, андар апарары - хоза хорадығлар. Таштып аймаа пазы Алексей Дьяченко тимненіс тоғызы апарылча теен, пір идінӌекке участок пирілген, ол цех пӱдіриине субсидия сахтапча. Кресен-фермер хониинда даа мини-цех азып аларға оңдай пар полтыр, мал тутчатханнарға андар айланарға чарир.
Пасха сурығлар чир-чайаанны хайраллирына, имнег тураларына, олған площадкаларына, аал хониина чарыдылған. Кӧбізіне Валентин Коновалов нандырығ пирген, ідӧк орындағы ӱлгее чапчаң хыймыранарға чӧп пирген, нандырығлығ министерстволарға чахығлар пирілген.
Че пірее сурығларда сизіністіг полған: федеральнай паза регион ӱлгӱзі хабазии чох оларны пӧк полбас. Хайда-да законнар алыстырарға, хайда-да оларны тӱзедерге кирек, «ӧӧртін» алызығлар полбаза, сӱтке тӱс парған сеек чіли, харбахтан-харбахтанма - сых полбассың. Республика пазы, чуртағӌыларнаң тоғазып, оларнаң чоох алызып, аны позы даа сизінче полар.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде