ПІР ЧАЙААЧЫ ИИРДЕ - IKI АЙМАХ КУЛЬТУРА
06.04.2022
Хабарлар
Чапсых тоғазығ. Н.Г.Доможаковтың адынаң республиканың ӧӧн библиотеказында Хакасия искусствозының саблығ деятельі, чон узы Сергей Чарков чатхан иирін иртірген
Сергей Трофимович, чатханнаң ойнирға хынчатханнарның клубын 2017 чылда тӧстеп алып, амғы туста аннаң устап парча. Пӱӱнгі кӱнде клубта пис ансамбль пар. Сергей Чарковтың чахсы полысчызы Тамара Давлетова-Чустеева полча, ол клуб араласчыларын сарнирға ӱгретче.
Чатхан иирінде Сергей Чарковтың холында тӧстелген ансамбльлар чайаачыларын кӧзіткеннер. Пылтыр сентябрь айда чатханнаң ойнирға хынчатханнарның клубына наа кізілер хозылғаннар. Олар ансамбльға ам даа ат сағын тапхалахтар. Сергей Трофимович оларны «Нааӌахтар» тіп адапча. Ансамбль «Адаңар чирі» хакас чонның сарынының кӧӧн чатханнаң ойнаан. Таныхтирға кирек, Сергей Чарковтың клубының наа араласчылары чарым чыл аразына хакас кӧг тириинең тузаланарға чахсы ӱгреніп алғаннар.
«Алтын тус» ансамбль Хакасия искусствозының саблығ деятельі полған Александр Саможиковтың «Алғыс» сарынын толдырған. Аның араласчызы Валентина Чебодаева чатханнаң ойнирға хынчатханнарның клубынзар Асхыс аймаандағы Пуланнығ кӧл аалдаң чӧрче. «Мин хакас сарыннарына хынчам, аннаңар чӱреем чатханнаң ойнирға тартылча», - тіпче чайаачы ипчі.
Студенттернің ансамбльы «Хызыл ай» адалча. Сергей Чарков пастап чииттерні чатханға ӱгреткен. Соонаң андар ортын паза улуғ частығ кізілер чӧр сыхханнар. Іди чатханнаң ойнирға хынчатханнарның клубы тӧстел парған. Чайаачы тоғазығда студент хыстар А.С.Саможиковтың «Тадар чирі» сарынын толдырғаннар.
Анаң кӧрігӌілернің алнынзар «Кӱмӱс чӱстӱк» ансамбль «Хонгорой» тува чонның сарынынаң сыххан. Пу ӧме ӱзінӌі чылы ырлап парир, аның позының репертуары пар.
- Олған тузынаң сығара чатханнаң ойнирға ӱгреніп аларым килген. Андада пу кӧг тириинең ойнирға сидік полар тіп сағынғам. Пірсінде Сергей Трофимович чатхан ииріне хығырған. Анда мин, хакас кӧг тириинең ойнапчатхан хыстарның чидіглерін кӧріп, чапсып таа парғам. Олар ікі ай аразына чахсы ойнирға ӱгреніп алғаннар. Аннаңар мин ідӧк Сергей Трофимовичтің клубынзар чӧр сыххам. Чатхан кізіні пос чонынаң, ӧбекелерібіснең палғалыстырча. Пу кӧг тириинең ойназам, мин тынанчам, - таныхтаан «Кӱмӱс чӱстӱк» ансамбльның араласчызы Любовь Топоева.
«Кӱн чарии» ансамбль хакас чонның «Тӧлібіс» сарынын ырлаан.
- Чатхан минің чӱрееме тың чатча. Ол сіліг кӧглер пирче. Сергей Трофимовичтің клубынзар чӧр сыхханымда, пір дее кӱн чатхан чох чуртап полбинчам. Аның кӧӧ кӧңнімні кӧдірче, - чоохтаан «Кӱн чарии» ансамбльның ырӌызы Жанна Сагалакова.
Таныхтирға кирек, Орджоникидзе аймаандағы Майрастар аалынаң «Ӱӱстер кӧӧ» ансамбль (устағӌызы Андрей Мамышев) чайаачы тоғазыға ӧнетін килген. Артисттер Ағбан чуртағӌыларын хакас чонның «Аалыӌаам» сарынынаң паза «Очыхтығ хазан» тахпахнаң ӧріндіргеннер.
Чоохтирға кирек, сынында пу олаңай ла чатхан иирі полбаан. Анда кӧрігӌілер ідӧк Колумбияның кӧг культуразынаң танысханнар. Чайаачы тоғазығда чапсых аалӌы полған - Колумбияның чуртағӌызы, кибелісчі, кӧгӌі, философ Икаро Вальдеррама. Пӱӱнгі кӱнде ол Колумбияның Богота городының университедінде тоғынча, «Белая волчица» изданиенің редакторы полча.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде