АНЫҢ АДЫ ХАҶАН ДАА ААРЛАСТА
13.04.2022
Хабарлар
Пайрамнығ тӧреен кӱніне чарыдып. Асхыс аймаандағы «Хуртуйах тас» музейде саблығ учёнай Венедикт Григорьевич Карповтың 95 чазына чарыдылған наука-практикалығ конференция ирткен
Венедикт Карпов - Николай Фёдорович Катановтың адынаң хазна сыйииның лауреады. Ол чӱс азыра наука статьязының паза учебниктің авторы полча. Аның ады тиксі тилекейдегі учёнай-тюркологтарның аразында улуғ аарласнаң адалча.
Венедикт Григорьевич, хакас тілінің грамматиказын істезіп, филология наукаларының докторы атха турысхан. Хакасияның ӧӧн вузында халғанӌы кӱннеріне теере, профессор полып, тоғынған. Аны прай ӱгретчілернің ӱгретчізі тиирге чарир. Пӱӱл 26 мартта Венедикт Григорьевич Карповха, изен-хазых полған полза, 95 час толарӌых. Аның пу пайрамнығ тӧреен кӱніне чарыдып, пістің республикада «Хакас тілі - кізінің чуртазында» неделя ирткен. Хакасиядағы ӱгредіг тилізі паза ӱгретчілер квалификациязын кӧдірӌең институт паза хакас тілі ӱгретчілерінің ассоциациязы хада-пірге тӧстеен мероприятие программазынзар ӱгредіг учреждениелерінде саблығ ученайның чуртас чолына, наука тоғыстарына чарыдылған тегілек столлар, наука-практикалығ конференциялар иртірері кирілгеннер. Іди піске, Н.Ф.Катановтың адынаң Хакас хазна университедінің хакас филология кафедразының ӱгретчілеріне, Асхыс аймаандағы «Хуртуйах тас» тигір алтындағы музейде ирткен республика синіндегі «Илбек ученайыбыстың тузалығ ис-пайы» наука-практикалығ конференцияа чӧр килерге ӱлӱс тӱскен. Анда Калининдегі паза Асхыстағы ортымах школаларның хакас тілі паза литература ӱгретчілері азых уроктар иртіргеннер. Олар - Евгений Николаевич Карамашев паза Изольда Анатольевна Кольчикова.
Алынӌа таныхтирға сағынчам Пилтірдегі школаның хакас паза орыс тілі ӱгретчілері Галина Константиновна Тюкпиекованы, Светлана Александровна Белованы, Ирина Витальевна Горбунованы. Олар морсымнығ чоох тутханнар паза олғаннарны уғаа чахсы тимнеп салтырлар. Кӧзідімге алып аларға чарир Пилтір аалдағы 1 № школаның 11 класс ӱгренӌізі Аида Асочакованың тоғызын. Ол конференцияа чыылысханнарға ученай-тюркологтаңар паза аның істезіглерінеңер хайдаң піліп алғанынаңар чоохтаан.
Че прайзын «Маленький Веня Карпов изучает хакасский язык» улуғ нимес ойын хайхатхан, неке. Пасталығ класстардағы оолағастар рольларны уғаа хынығ толдырғаннар. Олар «орыс» паланы хазых ойнирға ӱгреткеннер. Пу сценканы Галина Константиновна Тюкпиекова тимнеен. Чоохтирға кирек, ол позы артист оңдайлығ, аннаңар хормачы ойыннар сағын табарға сидік нимес ағаа.
Асхыс аймаанда ирткен наука-практикалығ конференцияда аарластығ аалӌыларның пірсі 2020 чылда «Айтыс» тахпахчылар марииның ӧӧн сыйии Гран-прині алған, 2021 чылда хайӌы-нымахчылар республика мариинда I степеньніг лауреат полыбысхан чайаачы ус, Пилтір аал чуртағӌызы Алефтина Васильевна Карамашева полған. Ол Венедикт Григорьевич Карповха чарыдылған тахпағын толдырған.
Улуғ алғыс «Хуртуйах тас» музейнің устағ-пастаана паза тоғынӌыларына. Мероприятие араласчыларын олар хакас чонның кибірлері хоостыра уғаа чахсы удурлааннар. Специалисттер ідӧк чыылығ ирткен тадар ибде Венедикт Карповтың чуртас чолына, істезігліг тоғыстарына чарыдылған кӧзідіг тимнеп салтырлар.
Паза конференцияда хынып араласханнар тархын наукаларының кандидады, Хакасия культуразының саблығ тоғынӌызы, Асхыс аймаандағы улуғлар чӧбінің кнезі, «Хуртуйах тас» музейнің наука тоғынӌызы Леонид Васильевич Горбатов, Хакасиядағы хакас тілі ӱгретчілері ассоциациязының кнезі, Ӧӧк пилтіріндегі школаның хакас тілі ӱгретчізі Игорь Никитич Албычаков, Ӧӧк пилтіріндегі школа устағӌызының орынӌызы паза хакас тілі ӱгретчізі Надежда Леонидовна Бурнакова, Хакасиядағы хакас тілі ӱгретчілері ассоциациязының кнес орынӌызы, Калининдегі ортымах школаның хакас тілі ӱгретчізі Рустам Юрьевич Канзычаков. Венедикт Григорьевич Карповтың студентттері, піди чыылызып, хынған ӱгретчіні сағысха киргеннер, амғы тӧлге улуғ учёнайдаңар чахсы сӧстерін искіргеннер. Карпов хормачы кізі полған. Иреннер пу конференцияда аның хынығ киректерге кір турғанынаңар чоохтабин полбаанохтар.
«Хакас тілі - кізінің чуртазында» неделяда Асхыс аймаандағы Калинин паза Асхыс ааллардағы школаларда ідӧк саблығ ученайның пайрамнығ тӧреен кӱніне чарыдылған азых уроктар ирткеннер. Чоохтирға кирек, хакас тілі ӱгретчілері Изольда Анатольевна Кольчикова паза Евгений Николаевич Карамашев оларны турыстыра апарғаннар. Аннаңар тың ӧріністіг паза поғдархастығ Венедикт Григорьевич Карповтың адын, ундутпин, піди пӧзік кӧдірчеткен ӱчӱн.
Автор :
Наталья ТАСКАРАКОВА, филология наукаларының кандидады, ХГУ-ның филология паза культуралар аразындағы палғалыс институдының доценті
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде