Хумартхылас. Пилтір аал - чобағда
17.04.2022
Хабарлар
Пӱӱн Украинада иртчеткен ӧнетін чаа операциязында чуртазын пир салған чир-суғҷыбыс Сергей Тюкпеевті тӱгенҷі чолына ӱдескеннер. Пу чобағлығ кирек кӧп кізіні піріктірген. Матыр оолнаң анымҷохтазарға Асхыс аймаандағы Пилтір аалзар Хакасия пазының орынҷызы Ирина Войнова, Ӧӧркі Чӧптің депутады Роман Челтыгмашев, Асхыс аймаа пазы Абрек Челтыгмашев паза республиканың чааҷылар комиссариадының кізілері килгеннер.
Украинада ӧнетін чаа операциязы пасталғаннаң пір ай артиинаң ирт парды. Россияның махачы ооллары пістің амыр чуртазыбысты, палаларның таңдағызын арачылапчалар. Полған наа чаа операциязында чобағлығ киректер полча. Пістің чоныбыс чир-суубыстың арачылағҷызы, улуғ сержант, танк экипажының командирі Сергей Тюкпеевнең анымҷохтасхан. Ол іҷезіне паза хыс туңмазына чӧлег полған, хада хонғанына – хынчатхан ирi, палазына – ӧрінізін, хынызын тооза пир полбаан паба. Оолғына алты ла ай толды. Аның махачы тудынғаны кӧп чуртасты арачылаан. Россия армиязының кӱзі – мындағ матыр оолларда. Чоох Хакасия пазының орынҷызы Ирина Войнова тутхан.
- Чиит ооллар чуртастаң парчатханы – уғаа улуғ чідіріг. Тӱрче полза, пістің хазна Илбек Чиңіс кӱнін таныхтир. Че чииттер, пазох нацизмнең тоғыр чаалазып, тыннарын пирчелер, - чоохтаан Ирина Войнова. – Пістің хазнабыстың пу чаалазыға кірердең пасха чол чох полған. Ӏзенчем, піс хайди даа чиңіс тударбыс. Матырларыбысты сағыста хаҷан даа ал чӧрербіс. Оларны пала-пархаларыбыс ундутпастар. Сергей чӱреебісте хаҷан даа полар.
Сергейнің олған тузы Пилтір аалда ирт парған. Мында – аның ибі, іҷезі, хыс туңмазы. Мында ол школаны тоосхан, арғыстарын тапхан. Аалның полған на чуртағҷызы сӧбірезінең чобалча. Хакасияның Ӧӧркі Чӧбінің депутады Роман Челтыгмашев, чон алнынзар сығып, таныхтаан:
- Сергей – прайзына кӧзідім. Ол тоғызын турыстыра толдырған. Оолғы аның махачызын пілерге кирек.
Республиканың чааҷылар комиссары Андрей Титовтың чооғынаң, Сергей Тюкпеев, махачы чаалазып, тынын пир салған. Чуртаста палалар паба-іҷені чыырға киректер, че пӱӱнгі кӱнде іҷелер оолларын тӱгенҷі чолға ӱдесчелер. Че Сергей чир-суу ӱчӱн чуртазын пир салғаны – тикке нимес. Ол пістің амыр чуртазыбысты арачылаан. Пістің чоныбыстаң тоғыр Илбек Ада чаада тооза чох итіртпеен фашисттер кӧдірілчелер. Сергей чуртазын пир салған даа полза, танк экипажын арачылап алған. Анзы сын иренні таныхтапча. Сергейнің чуртазы хысхаҷах полған даа полза, ол кӧп ниме идерге маңнанған.
Абрек Челтыгмашевтің таниинаң, пістің чоныбысха чир-суғҷыларын тігі чирзер ӱдезерге киліс парды. Ӱр ниместе Владимир Боргояковты чыып салғаннар. Ол ідӧк танк экипажының командирі полған. Амды чобағ Пилтір аалзар килді. Сергейні ӱдезерге аалдағы чон чыылысты, ӱгретчілері, арғыстары, хонҷыхтары килген. Ӏҷезі Валентина ӱс палазын чалғызан азахха турғысхан, чуртазы сидік полған. Ам пазох полысчаң кізі чох халды. Сергей армия устағҷылары турғысхан пӧгіннерні турыстыра толдырған.
Хада служба ирткен арғыстарының сӧстерінең, Сергей хаҷан даа полызыға маңзыраҷаң, сын ирен полған. Ӧнетін чаа пӧгінін толдырып, ол арғыстарының кистінде чазынмаан, тыны ӱзілгенҷе чааласхан. Хорылыстығ туста махачы тудынған ӱчӱн Сергей Тюкпеев «Мужество ордені» сыйыхха турысхан. Чонның сағызында ол хаҷан даа чуртазын.
Автор :
Антон Чертыков
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде