«СЫБЫҶАХ» ЧИИТ СӦБІРЕЛЕРНІ ӦРІНДІРДІ
20.04.2022
Хабарлар
«Демография» нацпроект. Ирткен неделяда Ағбандағы «Сыбыҷах» олған садының наа корпузы азылған. Амды ӱгредіг учреждениезінзер 440 иркеңек чӧрер, ол санда 1,8 частығ Дамир
ШКОЛА АЛНЫНДАҒЫ ӰГРЕДІГ УЧРЕЖДЕНИЕЗІНІҢ НАА КОРПУЗЫ 120 ОЛҒАНҒА КӦРІЛ ПАРҒАН. АНДАР 1,5 - 3 ЧАСТЫҒ ПАЛАЛАР ЧӦРЕРЛЕР. АЙМАХ ӦҢНЕРНЕҢ ЧАЗАЛҒАН ОЛҒАН САДЫНДА АЛТЫ ГРУППА ПАР, ОЙНАҶАҢ, УЗУҶАҢ ОРЫННАР, ПАЙРАМНАР ИРТІРҶЕҢ, ФИЗКУЛЬТУРАНАҢ АЙҒАСЧАҢ ЗАЛЛАР, ИМҶӀ КАБИНЕДІ, ТАСХАР ПЛОЩАДКАЛАР ПАЗА ДАА ПАСХАЗЫ, ӀДӦК ВИДЕОНАБЛЮДЕНИЕ ОБОРУДОВАНИЕЗІ ТУРҒЫЗЫЛҒАН.
Наа олған садының пӱдірии 2020 чылда сентябрьда пасталған. Пӱдірігҷілер аны 1,5 чылға тимге сығарыбысханнар. Таныхтирға кирек, халғанҷы он чыл аразына Ағбанда 12 наа олған сады пӱдіріл парған. «Сыбычах» ӱгредіг учреждениезі «Демография» национальнай проекттің «Ипчілерге тоғыс табарға хабазары» федеральнай проекті хоостыра пӱдірілген. Ағбанда ол проектче пу ла олған сады пӱдірілген.
- Амғы тустағы чуртас оңдайларынҷа кӧп іҷее ирте тоғысха сығарға килісче. «Ипчілерге тоғыс табарға хабазары» федеральнай проект хоостыра иң кічіг палаҷахтарға олған садтарын пӱдіріп, піс чиит іҷелерге сидіксіністерін пӧгерге оңдай пирчебіс. Ізенчем, город пу проектте аннаң андар аралазар. Кирексініс, тізең, улуғ, - таныхтаан чооғында Ағбан город пазы Алексей Лёмин.
- Иркеҷектерін олған садынзар ағыл салып, іҷе-пабалар, палаларының ӱчӱн сағыссырабин, истіг тоғынарлар. Пу учреждениеде палаларның соонҷа чахсы кӧрер, оларнаң айғазар прай оңдайлар тимнел парған. Ізенчем, пасха даа муниципалитеттер мындағ чахсы паза чуртағҷыларға уғаа кирек проектте аралазарлар, - таныхтаан Хакасия пазының орынчызы Ольга Пономарёва.
Ағбан чуртағчылары Александр паза Индира Теляшкиннер «Сыбыҷахсар» Дамир оолахтарын ағылдылар. Ағаа 1,8 час.
- Піс ӱс олған садынзар тееске тур салған полғабыс. Хайзынзар теес табырах чидер, андар Дамирні пирербіс тіп сағынғабыс. «Сыбыҷах» пістің тура хыринда орныхчатханнаңар паза ол наадаңар, иң пастап андар кіріп аларға сағынғабыс. Аның пӱдіриин сыбыра хайығда тутхабыс. Пастап ол кӱскӱзін тимге сых парар тіп искіргеннер, анаң чайғызын азылар тееннер. Че пӱдірігҷілер тоғыстарын иртеезін тоозыбысханнарында, піс сах андох олған садынзар чӧр сыххабыс. Ізенчем, оолғыҷаабыс табырах кӧнік парыбызар, андада мин дее тоғысха ниик чӱректіг сығарбын, сағыссырабаспын.
Я, кічіг паланы постаң чарарға айастығ, че кӧп ипчінің ибде одырар оңдайы чоғыл. Кӧбізіне иртеезінең тоғысха сығарға, ахча тоғынарға килісче. Аннаңар мындағ кічіг палаларға ӧнетін олған садтары пӱдірілчеткені уғаа чахсы тіп санапчам, - кӧңнінең ӱлесче чиит іҷе Индира.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде