ПРАЙ ОҢДАЙЛАРНАҢ ТУЗАЛАНАРҒА
20.04.2022
Хабарлар
Сомда: Виктор БОГУШЕВИЧ (ортызында) устапчатхан министерствода инвесторларнаң тоғынҷаң комиссия тӧстелер
Кризистең тоғыр штаб. Хакасия пазы Валентин Коновалов правительстводағы кризистең тоғыр штабтың теестегі чыылиин иртірген
Пу чыылығда кӱн суриина сығарылған: республика чонының амырын хайраллирынҷа, региондағы партияларның паза халых пірігістерінің чон чуртазын чахсыландырардаңар чӧптерін чуртасха кирерінче, чуға чуртапчатханнарға хоза хабазығлар пирерінҷе, ідӧк ағас пилетирінҷе участоктарны пирерін нииктирінҷе паза чуртағчыларның ағас тоғызына тартылчатханынҷа сурығлар.
Хакасияның юстиция паза региондағы безопасность киректерінче министрі Сергей Ромашовтың искіриинең, ирткен неделяда (хосхар айының 7 - 14-чі кӱннерінде) республикада хазна политиказынаң тоғыр акциялар иртірілбеен, че искірігліг абыластар тоозылбинча. Іди ВКонтакте социальнай сетьте хазнаның политиказынаңар паза Украинадағы ӧнетін чаа операциязынаңар тайма искіріглерні таратхан ӱчӱн, ипчі хатығласха тартылча. Ағбан городта гаражтарда хазна политиказынаң тоғыр хыйғылар пазылғаны табылған, сайбағҷыларны тілепчелер, пазылған сӧстер чох иділген. Хосхар айының 14-чі кӱнінде право хайраллаҷаң органнарның тураларында чара чачырастардаңар тайма искіріг кірген. Туралар сыныхталғанда, искіріг киречілелбеен. Істезіг управлениезінің Хакасияҷа істезіг комитеді хабарҷыдаң тоғыр уголовнай кирек азыбысхан. Ол Украинадағы ӧнетін чаа операциязынаңар тайма искіріглер таратханында чіглендіртче. Халых чон амырын ситкіп хайраллиры узарадылча.
Хакасиядағы партияларның паза халых пірігістерінің чон чуртазын чахсыландырардаңар чӧптерінің чардығы, штабтың алындағы чыылығларында чарадыл парғаннаңар, чуртасха кирілче. Олаңай чуртағҷыларға город холындағы чирлерде садығ апарардаңар сурығча Ағбан устағ-пастаанзар айланарға чарадылған. Чоох парча кӧп квартиралығ туралар хыринда чуртағҷылар сӱт, чир тамаан сатчатхан орыннардаңар.
Андағ орыннарда садығ апарчатханнарның ас-тамаан ӧӧнінде хости турчатхан тура чуртағҷылары алча, ағаа хоза паалар чырғаллардағызынинаң паза садығ тураларындағызынинаң тӧбін полча. Город устағ-пастаана олаңай ла чарадығ албасха, полған на андағ орынны таныхтап, чарадығ тимнирге чӧп пирілер.
Аннаң пасха, Хакасияның экономика тилізі министрі Виктор Богушевич город-аймахтарда кризистең тоғыр комиссиялар тӧстирге чӧптеен, олар ідӧк пааларны хайығда тударлар. Валентин Коновалов андағ чарадығнаң чарасхан паза республика штабынзар город-аймахтар пастарын кирерге чахаан.
Хакасияның ис-пай паза чир хайызығлары министрі Евгений Тарасовтың искіриинең, республиканың аал хонии чырғалында олаңай чуртағчыларға пос ас-тамаан садарға орыннар тикке пирілер. Аннаң пасха, республиканың собственнозын сыныхтаанда, сигіс садығ орнын, идінҷектерге хабазып, арендаа тикке пирері кӧрілче. Муниципальнай пӱдістер ідӧк ис-пайын сыныхтапчалар. Абаза паза Боград аймаа устағ-пастаа чуртха кӧрілбеен тибіреділбинчеткен ис-пай чоғыл тіп искіртірлер, Ширада - 3, Асхыста - 2. Пасха город-аймахтарда, ол санда Ағбан городта, андағ ис-пай чоғылох, Харатас, тізең, тӧлеге ле тимде пирерге. Хакасия пазы Валентин Коновалов, муниципальнай пӱдістерге, пу сурыға ситкіп хайып, чарадығларына килістіре алызығлар киріп, идінҷектерге хабазар пӧгіннең, садығ апарчаң муниципальнай ис-пайны тикке арендаа пирерінҷе айланыстар ызарға чахаан. Республика пазының орынҷызы Юрий Курлаев ідӧк федеральнай ис-пайның тузазы чох тузаланылчатханына хайығ айландырған. Аны хоостыра федеральнай кінзер айланыс тимнелерӧк.
Хакасияның аал хонии паза ас-тамах министерствозы аал хонии предприятиелеріне техника алған пааның 50 %-ін айландырарынҷа субсидияны тӧлеп пастабысхан. Пӱӱнгі кӱнде техника алып алары - иң сидік сурығларның пірсі, иң пастағызын, паалар ӱчӱн.
Республиканың аал хонии паза ас-тамах министрі Сергей Труфановтың таниинаң, «Агростартап» программаҷа кӧрілген 3 миллион салковай хабазығ уғаа асхынах, ол аал хонии техниказын даа аларына, теплица даа турғызарына читпинче, аннаңар Хакасия правительствозы адынаң ол хабазығ синін ӧскірердеңер айланыс федеральнай кінзер тимнелче.
- Хосхар айының 30-ҷы кӱнінде піс ат чарыстырхаң тусты асчабыс, - айланған министр. - Ол алғым таныхталар: аал хонии ярмарказына хоза аймах чӧрімнер паза флешмобтар иртірілер. Хығырчам прайзын.
Часхы таарығ тузы пір неделяа соона пасталар. Сылтағ - чир ам даа тоң. Пір ле хоных, Аршаннардағы, сула таарып пастабысханнаңар чарлаптыр. Хакасия правительствозы чарадиинаң хосхар айының 10-ҷы кӱнінең сілкер айының 9-ҷы кӱніне теере республика чолларынҷа аар таарлағ техниказына чӧрерге чарабас, че ол аал хонии техниказына теелбинче. Хыраҷыларның кӧңнін кӧдіріп, чайаачы ӧмелернең кӧзідіглер турғызарға тіп, аал хонии министерствозы культура министерствозынаң чӧптезіглер апарча.
Штаб араласчыларына республиканың істеніс паза социальнай арачыланыс министерствозы чуға чуртапчатханнарға хоза хабазығларҷа наа чӧптерін читірген. Чуртастың сидік оңдайларына кір парған чуртағҷыларға ахчалығ полызығ пар. Пӱӱл ол кӧстеге Хакасия бюджедінде 2 миллион салковай кӧріл парған. Министерство аны 5 миллион салковайға читірерге сурынча. Сурығ республиканың финанстар министерствозына читірілген паза ӱзӱрілче. Аннаң пасха, Хакасия пазының орынчызы Ольга Пономарёваның искіриинең, парызы тӧбін сӧбірелер, пала ахчазын иттірчетсе, сидіксіністерге урунчалар.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде