МАТЫРҒА - САБЛАНЫС!
20.04.2022
Хабарлар
Сомда: матырны халғанҷы чолға удесчелер
Хакасия чобалча. Республика столицазы позының матырын халғанҷы чолға ӱдескен
Россияның войсколары Украинада ӧнетін чаа операциязын иртірчеткенде, Руслан Матвеев талай пехотазының разведказында наводчик полған. Луганск облазын националисттер холынаң позыдар чаалазығда ол чуртазын пир салған. Руслан Матвеев Мужество орденінең сыйыхтатхан (ӱреен соонда), ағаа 19 ла час полған.
Ағбан городтың «Чиңіс» культура кінінде матыр оолны халғанҷы чолға ӱдескеннер. Анда кӧп чон чыылысхан. Руслан Ағбандағы 20 № школаны тоосхан. Кічігдең чааҷы поларға сағынған, аннаңар тимір чол войсколарында срочнай служба иртібізіп, контрактча чааҷы службазына парыбысхан. Іҷезіне пір дее ниме чоохтабаан, іди ол аны хайраллаан. Оолғын іҷезі Ольга Анатольевна Матвеева чалғызан ӧскірген нооза.
Пик хазыхтығ, чиит спортсменні чааҷы службазын иртерге талай пехотазынзар хынып алғаннар. Руслан чахсы спортсмен полған, кӧп чыл ол хол-азахнаң тудызар спортнаң паза баскетболнаң айғасхан. Спортта грамоталарнаң, дипломнарнаң паза медальларнаң сыйыхтатхан, баскетболҷа аның I разряд полған.
Траур митингінде Хакасия пазы Валентин Коновалов матырның туған-чағыннарына хомзынызын читірген:
- Пӱӱн Хакасияда улуғ чобағ - Руслан Матвеев, неонацизмнең, бандеровецтердең тоғыр кӱрезіп, Луганск облазының чуртағҷыларын, ідӧк прайзыбысты арачылап, чуртазын пир салған. Пілчебіс, андағ улуғ чідірігні айландырып алар оңдай чоғыл паза хайдағ чобағ кӧрчелер Русланның іҷезі, туған-чағыннары. Прай республика пӱӱн сірернең хада чобалча. Руслан чуртазында махачылар профессиязын таллап алған, чуртазы тоозылғанча службаа пирін салған. Ол - матыр. Сын гражданинні, махачы кізіні ӧскіріп алған ӱчӱн ічезінің алнында пазыбыс тӧбін тӱзірчебіс. Республиканың правительствозы сӧбірее прай кирек полызығ пирер. Хакасия правительствозының адынаң Русланның іҷезіне, туған-чағыннарына улуғ хомзынызыбысты читірчем. Аның чарых омазы піснең хада полар, матырға хачанға даа сабланыс!
Хакасияның Ӧӧркі Чӧп кнезі Владимир Штыгашев ідӧк хомзыныс сӧстерін читірген:
- Піс пӱӱн Ада чир-суубыстың арачылағҷызын халғанҷы чолға ӱдесчебіс, ол сын кирек ӱчӱн чуртазын пир салған. Руслан чаалазығда иң алнында полып чат халған: разведбатальонның разведказы - иң нандырығлығ кирек. Піс ам чобалчабыс. Че Руслан сын кирек ӱчӱн чуртазын пир салған, аннаң піс поғдархирға кирекпіс. Россия хаҷан даа чиңдірбеен, ол паза чиңдірбес. Амды Илбек Ада чаа матырларының кӧргенектері ӧс парғаннар. Пістің ӱлӱзібіс андағ - кӱс чохтарны арачылап, чабалларны чох идіп, чиңіс тудары. Русланның махачызы россияннарны чирібісті, Россияның кирексіністерін арачылирға кӧдірер. Махачы тудынызың ӱчӱн - улуғ алғыс!
Митингте ідӧк хомзыныс сӧстерін читіргеннер Ағбан город пазы Алексей Лёмин, городтың чааҷылар комиссары Сергей Кибирев паза даа пасхазы.
Руслан Матвеевті Ағбандағы 4 № сыыратта чыып салғаннар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде