ЧИР-СУУНА ПААРСАС - СІЛІГ ХООСТАРЫНДА
20.04.2022
Хабарлар
Сомда: кӧзідігнің тӧстегҷізі Михаил САРАЖАКОВ
Кӧзідіг. Алтай аймаандағы Хубачар аалның культура туразында Хакасияның хоосчылар пірігізінің сіліг тоғыстары кӧзідіге сығарылды. Таныхтирға кирек, пылтыр пу пірігіске 30 чыл толған
Чуртағӌыларның республикадағы чайаачыларның 80 азыра хоозын кӧріп алӌаң оңдай пар. Устарны тӧреен чир-сууна паза чир-чайаанға хыныс піріктірче. Тоғыстарында анзы іле кӧрінче.
- Чайаачы чир-суғҷыларыбыстың тоғыстарына ӧкерсінерге уғаа ӧріністіг. Пандемия алнында піс пу залда ікі мындағ кӧзідіг иртірерге маңнанғабыс. Анаң ікі чылға тохтат саларға киліскен. Че амды мероприятиелерні иртірерге пір дее ниме харығ полбас тіп ізенербіс, - чылығ сӧстернең асхан кӧзідігні Алтай аймаа пазы Татьяна Раменская.
Кӧзідігде Хакасияның хоосчылар пірігізі кізілерінің, Ағбандағы Д.И.Каратановтың адынаң олған хоос школазының паза Асхыстағы искусство школазының ӱгретчілерінің тоғыстарын кӧріп аларға чарир. Кӧп хоос тиксі Россияның пленэрлерінде толдырылған. Пленэрде чайаачылар, регионның прай пулуңнарынӌа чӧріп, хайхастығ орыннар таап, сіліг хоостар пасчалар. Хайди искірген Хакасия культуразының саблығ тоғынӌызы, республиканың хоосчылар пірігізінің кнезі, Ағбандағы олған хоос школазының директоры Александр Кобыльцов, пӱӱл май айда республиказар тиксі хазнадаң отысча хоосчы килер. Олар пазох Хакас чирінің сілиин тоғыстарында кӧзідерлер.
Пу кӧзідігні тархын наукаларының кандидады, ӱр чыллар Хакасияның Ӧӧркі Чӧбінің депутады полған Михаил Саражаков, тӧстеп, чуртасха кирген. Ол ідӧк хоостирға хынча. Михаил Алексеевич 50 азыра тоғыс чайап салған. Республикадағы хоосчылар кӧзідіглерінде паза пленэрлерде сыбыра араласча.
- Мин, мастерскойда хоосчыларыбыстың чир-чайааннаңар, кізілердеңер кӧп хайхастығ хоостарын кӧр салғанда, кӧс чӧрҷең кӧзідіг тӧстирге сағыныбысхам. Пу чӧбім прайзының кӧңніне кірген. Сынны чоохтаза, мындағ сіліг тоғыстар мастерскойларда турбасха киректер. Оларны чон кӧрзін. Чайаачы устарнаң чӧптескен соонаң пастағы кӧзідігні Алтай аймаанда иртіргебіс. Пасха аймахтарҷа чӧрерге пандемия харығ пол парған. Че, андағ даа полза, ол тоғысты апарарын узаратчабыс. Ідӧк Асхыс, Таштып паза пасха даа аймах-городтарзар чидербіс.
Пӱӱнгі туста прайзы Украинадаңар ла чоохтасча. Культура мероприятиелері пістің Тирігліг кӱстерге чарыдыл ча. Матыр оолларыбыс анда махачы тудынчалар. Аннаңар пӱӱнгі кӧс чӧрҷең кӧзідігні чааҷыларыбысха чарытчам, - теен Михаил Алексеевич.
Михаил Саражаков онӌа чыл хоос-тап парир. Читон чылларда Хызылчардағы институтта ӱгренчеткенде, хоосчылар студиязынзар чӧрген. Михаил Алексеевич Хакасияның чир-чайаанын чайирға хынча. Чапсых кӧзідігде аның пылтыр паза пӱӱл пазылған тӧрт хоозы сығарылған. Олар «Орай кӱскӱ», «Суғ тайыс пол парған», «Минсуғ азырығында - хосхар айы», «Катерлер причалда» адалчалар. Тоғыстары ӧӧнінде Ағбан суғ хазында чайалғаннар.
Ідӧк кӧс чӧрӌең кӧзідігде хоосчылар Софья Асочакованың . «Тағлар. Асхыс аймаа», «Піӌі пазы», «Ӱӱ тағ», «Райковтар аалы хыриндағы тағ», «Шира кӧл. Кӱскӱ», Денис Саражаковтың «Сафрон», Эльвира Чанкованың «Сюгеш-2020», Леонид Канзычаковтың «Шира кӧл», «Чалғыс тураӌах» чапсых тоғыстарын кӧріп аларға чарир.
Пу чапсых мероприятиеде Хубачардағы олған музыка школазының ӱгренӌілері аалӌыларға концерт кӧзіткеннер. Кӧзідіг 15 майға теере иртер.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде