АРМИЯНЫҢ КӰЗІ - МАТЫР ООЛЛАРЫБЫСТА
20.04.2022
Хабарлар
Сергей ТЮКПЕЕВ служба тузында
Чобағ. Ирткен позырах кӱнде Украинада иртчеткен ӧнетін чаа операциязында чуртазын пир салған чир-суғҷыбыс Сергей Тюкпеевті тӱгенҷі чолға ӱдескеннер
Пу чобағлығ кирек кӧп кізіні піріктірген. Матыр оолнаң анымҷохтазарға Асхыс аймаандағы Пилтір аалзар Хакасия пазының орынҷызы Ирина Войнова, Ӧӧркі Чӧп депутады Роман Челтыгмашев, Асхыс аймаа пазы Абрек Челтыгмашев паза республиканың чааҷылар комиссариадының кізілері килгеннер.
Украинада ӧнетін чаа операциязы пасталғаннаң пір ай артиинаң ирт парды. Россияның махачы ооллары пістің амыр чуртазыбысты, палаларның таңдағызын арачылапчалар. Полған на чаа операциязында чобағлығ киректер полча. Пістің чоныбыс чир-суубыстың арачылағҷызы, улуғ сержант, танк экипажының командирі Сергей Тюкпеевнең анымохтасхан. Ол іҷезіне паза хыс туңмазына чӧлег полған, хада хонғанына - хынчатхан ирі, палазына - ӧрінізін, хынызын тооза пир полбаан паба. Аның оолғыҷаана алты ла ай. Аның махачы тудынғаны кӧп чуртасты арачылаан. Россия армиязының кӱзі - мындағ матыр оолларда.
Хакасия пазының орынҷызы Ирина Войнова чоох тутхан:
- Чиит ооллар чуртастаң парчатханы - уғаа улуғ чідіріг. Пістің чииттерібіс, нацизмнең тоғыр чаалазып, тыннарын пирчелер. Ізенчем, піс хайди даа чиңіс тударбыс. Матырларыбысты сағыста хаҷан даа ал чӧрербіс. Оларны пала-пархаларыбыс ундутпастар. Сергей чӱреебісте хаҷан даа полар.
Сергейнің олған тузы Пилтір аалда ирткен. Мында аның ибі, іҷезі, хыс туңмазы. Мындох ол школа тоосхан, арғыстарын тапхан. Хакасия Ӧӧркі Чӧбінің депутады Роман Челтыгмашев, чон алнынзар сығып, таныхтаан: «Сергей - прайзына кӧзідім. Ол тоғызын турыстыра толдырған. Оолғыҷаа аның махачызын пілерге кирек».
Республиканың чааҷылар комиссары Андрей Титовтың чооғынаң, Сергей Тюкпеев, махачы чаалазып, тынын пир салған. Чуртаста палалар паба-іҷені чыырға кирек, че пӱӱнгі кӱнде іҷелер оолларын тӱгенҷі чолға ӱдесчелер. Сергей чир-суу ӱчӱн чуртазын пир салған, ол пістің амыр чуртазыбысты арачылаан. Чуртазын пир салған даа полза, танк экипажын арачылап халған. Анзы сын иренні таныхтапча. Сергейнің чуртазы хысхаҷах таа полған полза, ол кӧп ниме идерге маңнанған.
Абрек Челтыгмашевтің таниинаң, пістің чоныбысха чиит чир-суғҷыларын тігі чирзер ӱдезерге килісче. Ӱр ниместе Владимир Боргояковты чыып салғабыс. Ол ідӧк танк экипажының командирі полған. Амды чобағ Пилтір аалзар килді. Сергейні ӱдезерге аалдағы чон чыылысты, ӱгретчілері, арғыстары, хонҷыхтары килген. Іҷезі ӱс палазын чалғызан азахха турғысхан, чуртазы сидік полған. Ам пазох полысчаң кізізі чох халды. Сергей армия устағҷылары турғысхан пӧгіннерні турыстыра толдырған.
Хада служба ирткен арғыстарының сӧстерінең, Сергей хаҷан даа полызыға килҷең, сын ирен полған. Ӧнетін чаа операциязының пӧгінін толдырып, ол арғыстарының кистінде чазынмаан, тыны ӱзілгенҷе чааласхан. Хорылыстығ туста махачы тудынған ӱчӱн, Сергей Тюкпеев Мужество ордені сыйыхха турысхан. Ол чонның сағызында хаҷан даа чуртир.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде