ИЛБЕК АДА ЧАА ТУЗЫНДАҒЫ СИБИРЬ
21.04.2022
Хабарлар
21-22 апрельде Л.Р.Кызласовтың адынаң чир-суғ ӱгренҷең музейнiң ачыхтарында «1941-1945 чыллардағы Илбек Ада чаа тузындағы Сибирь. Тархынны хайраллаҷаң ӧӧн сурығлар» тиксi Сибирьдегi форум иртче. Аны хоостыра Ағбанның Георгиевскай паркында совет чааҷызының монументi алнынзар чахайахтар салылған.
Мероприятиенi Россия паза Хакасия культуразының саблығ тоғынҷызы Андрей Штарктың устаанынаң Ағбанның ӱбӱрҷең оркестрi пайрамни асхан.
21 августта 2021 чылда «Культура» национальнай проект хоостыра Георгиевский паркта совет чааҷызының монументi азылған. Илбек Ада чаа тузында Ағбан iстенҷең городха айлан парған. Ханнығ чаа муңарлап километр оортах таа полза, аның яңыланызы пiссер читчең. Мындартын фронтсар ас-тамах, кип-азах, чаа тирiглерi ызылҷаң. Сибирьнiң кiчiг городында чаа госпитальлары полған. Ағбаннаң 17 муң азыра матыр оол чааға парған. Илбек Чиңiс пiске аарлыға тур парған. 5198 чир-суғҷыбыс чуртазын пир салған, 12 муң матырыбыс, палығлат салып, кинек айланған.
– Пӱӱнгi кӱнде хазнаның экономиказынаңар, санкциялардаңар паза хайди ол чуртазыбысха теелчеткеннеңер кӧп чоохтасчалар. Че чонның кӱзiнеңер асхынах исчебiс. Пiске тархыныбысты хайраллирға кирек. Iкi чыл мының алнында пiс турчатхан орында тастал парған сад полған. Че Ағбан город чуртағҷыларының чӧбiнең ол чахсы паркка айлан парған. Парктың адын ағбандағыларох ӱн пирiп таллааннар. Хакасия правительствозының, Ағбан город администрациязының кiзiлерi паза чуртағҷылар субботник иртiрiп, пу орынны арығлаабыс паза ағас хорбыларын одыртхабыс. Пылтыр, тiзең, мында ӧӧн экспонат – совет чааҷызының монументi – турғызылған. Амды Георгиевскай парк хаҷан даа ээн турбас. Мында аймах чӧрiмнер сыбыра иртiрiлче, – чоох тутхан Ағбан город пазы Алексей Лёмин.
Хакасияның культура министрi Светлана Окольникова, Россияның чаа-тархын пiрiгiзiнiң директоры, тархын наукаларының докторы, МГИМО-ның профессоры Михаил Мягков (Москва), город пазы Алексей Лёмин паза чуртағҷылар совет чааҷының монументi алнынзар чахайахтар салған соонаң Ағбанның ӱбӱрҷең оркестрi чаа кӧглерiн толдырған.
22 апрельде «1941-1945 чыллардағы Илбек Ада чаа тузындағы Сибирь. Тархынны хайраллаҷаң ӧӧн сурығлар» форум хоостыра Ирт тағда митинг иртер.
Автор :
Тимнеен Татьяна Тютюбеева Сом Дина Карамчаковани
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде