ОРЫНДАҒЫ ПАСТЫХТАРНЫҢ ӦТКІНІ КИРЕК
22.04.2022
Хабарлар
Тиліс чӧбі. Хакасия пазы Валентин Коноваловтың устаанынаң республиканың Тиліс чӧбінің теестегі чыылии иртті. Кӱн суриинда - национальнай паза регион проекттері
Хакасияның Тиліс чӧбінің теестегі чыылии республиканың национальнай проекттерде араласчатханына чарыдылған. Министерство-ведомстволар 2019 -2021 чылларның салтарларын иткеннер паза 2022 чылға кӧрілген тоғыснаң таныстырғаннар. Тиксі салтарларны Хакасия пазы Валентин Коновалов искірген.
Республика 11 нацпроектте араласча. 2021 чылда оларны хоостыра 42 регион проекті чуртасха кирілген. Чылдаң чылға федеральнай кіннең тартылчатхан ахча сині алысча: 2019 чылда нацпроекттерге 3,3 миллиард салковай пирілген, 2020 чылда - 5,3 миллиард салковай, 2021 чылда - 4 миллиард салковай.
2022 чылда республика ідӧк 11 национальнай проектте аралазар, че регион проекттеріне ікі наа проект хозыл парған: «Хазых хайраллирының пастағы имнег полызиин нааҷылиры» паза «Чииттерге хабазарын тилідері». Пӱӱл оларны чуртасха киреріне тиксі 7,4 миллиард салковай кӧріл парған, ол санда федеральнай бюджеттең 5 миллиардха чағын салковай. Алындағох чіли, ӧӧн хорадығлар социальнай кӧстеге кӧрілгеннер: «Хазых хайраллиры» нацпроектті чуртасха киреріне - 2 миллиард азыра салковай алай тиксі хорадығларның 28 %-і, «Демографияа» - 1,5 миллиард азыра салковай алай 22 %, «Ӱгредіге» - 700 миллион салковай алай 10 %, «Чурт паза город ибіркізі» нацпроектке - 1 миллиард азыра салковай алай 14,5 %, «Хорғыс чох чахсы чолларға» - 1 миллиард азыра салковай алай 16 %.
2022 - 2024 чылларда регион проекттерін чуртасха киреріне тиксі 17,7 миллиард салковай позыдылары кӧрілче, ол санда федеральнай ахча - 13,7 миллиард салковай.
- Национальнай проекттерні чуртасха кирері - ол регионның даа, муниципалитеттернің дее ӱлгӱлері ӧмезінің тоғызы, - таныхтаан Хакасия пазы Валентин Коновалов. - Ол Россияның национальнай кӧстеглерін толдырарына кӧрілген.
Республика пазы регион проекттерін чуртасха кирҷең ӧӧн кирексіністерні таныхтаан, ол санда муниципальнай пӱдістернің тоғызын паза нандыриин. 2021 чылда Хакасияның город-аймахтары, 6 нацпроектте аралазып, 10 регион проектін чуртасха кирген. Турғызылған, тыхталған, тиріглер турғызылған пӱдіріглер санынаң кӧрзе, иң ӧткін Ағбан, Саяногорск паза Харатас городтар, Асхыс, Ағбан пилтірі паза Алтай аймахтары тоғынғаннар. 2022 чылда муниципальнай пӱдістер 12 регион проектін чуртасха кирерінде аралазарлар.
- Че, хайди кӧрчебіс, прай ла муниципальнай пӱдістер федеральнай даа, республика даа ахчазын пос чирінзер тартарынӌа ӧткін тоғынарға кӱстенминчелер, - таныхтаан Валентин Олегович. - Піс оңарчабыс, хай син пос устаныс ӱлгӱзі ӧткін тудынар, ол синӧк ахча пирілер. Пастағы хаалағ идеріне прайзының тиң оңдайлар. Кирек ахча синін, кирексіністерні кӧзідерге паза кӧстегліг министерстваа сурыныс тимнирге халча. Олох туста министерстволар алнында ідӧк прай саринаң хабазарға пӧгін турғысчам.
Аннаң пасха, республика пазы регион проектінің устағҷызы тоғызына хайығ айландырған. Аның таниинаң, устағҷы тоғызынаң регион проектінің чуртасха кирілген салтарлары палғалыстығ. Аннаңар ол прай сығысчатхан сурығларны хайығда тударға, сидіксіністерні сизінерге, оларны чапчаң пӧгерге паза муниципальнай пӱдістерге хабазарға кирек.
Валентин Олегович регион проекттерін чуртасха кирчеткеннернің алнында паза пір пӧгін турғысхан: удур-тӧдір пик палғалыс тударға, хада-пірге тӱзімніг тоғынарға, ол санда регион проекттерінің офизінең.
Тиліс чӧбінің чыылиинда регион проекттерін чуртасха кирчеткен полған на минис-терство-ведомство кізілері 2021 чылның салтарларынаңар паза 2022 чылға кӧрілген пӱдіріг паза тыхтағ тоғыстарынаңар искірген. Ирткен чылның тоғыс салтарларында регион проекттерінеңер чоох парған, піс аны министрлернің сан пирістерінде пиргебіс. 2022 чылда пӱдірілер паза тыхталар пӱдіріглерҷе тоғыстар кӧрілген хоостыра апарылчалар, че ӧӧн сидіксініс оларның прайзының даа проект-смета паазы алыс парған. Хакасия правительствозы прай алызығларңа искіріглерні федеральнай кінзер ысча паза ӱндезігні сағыпча. Республика пазының орынҷызы Ирина Войнованың таниинаң, федеральнай кіннең пастағы нандырығлар кіріп пастапча, че ӧӧн чарадығ алылғанҷа, кӧрілген тоғыс планынҷа тоғынарға киректелер.
Тиліс чӧбі араласчылары ідӧк Ағбан город пазы Алексей Лёминні паза Асхыс аймаа пазы Абрек Челтыгмашевті, регион проекттерінде иң маңнаныстығ араласчатхан муниципальнай пӱдістернің пастарын, искеннер. Олар пос опыдынаң ӱлескеннер. Абрек Васильевичтің таниинаң, ӧӧн хозымны ӧменең тоғынғаны итче. Ол пос чиріндегі поселок-аал пастарына, аймах устағ-пастааның паза регионның министерство-ведомстволары устағҷыларына алғызын читірген.
Сидіксіністер чох тоғынарға киліспинче, че хайдағ даа сурығдаң сыхчаң оңдай табылчаттыр.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде