Табығлар сурии.
26.04.2022
Хабарлар
Ағбан город депутаттары аразында тартыс пасталыбысхан. Прай кирек депутаттар ӧмезі аймастырылған табығ системазынаң парыбызарға, пір мандаттығ оңдайны ла артыс саларға пастағнаң сыхханында Табығ оңдайын алыстырарынаң тоғырлар
Хайди искірчелер орындағы СМИ-лер, ӱр ниместе Ағбан городтың Депутаттар чӧбінзер чӧп кирілген - Ағбан городтың уставынзар алызығлар киріп, аймастырылған табығ система-зынаң (хачан депутаттарны партия списоктарынча паза пір мандаттығ округтарча таапчалар) парыбызарға, пір мандаттығ оңдайны ла артыс саларға. Ол чӧпті депутаттар ӧмезі киртір.
Че пу пастағ оппозициядағы депутаттарның кӧңніне кірбинче. Олар пу чолны хазых политика конкуренциязынаң хыя парғаны тіп санапчалар.
Анастасия Мох, Ағбан городтың VI хығыртии Депутаттар чӧбінің депутады(2018-2023):
- Полған на табығлар алнында «Единая Россия» партия пар системаны алыстырыбы-зарға кӱстенче. Пу киректе чоох парча аймастырылған системанаң мажоритарнай системаа кірердеңер. Россияда кӧп партиялығ система тоғынча паза ӱн пиріс ідӧк списоктар хоостыра парча - ол орта. Система, хайда списоктаң паза пір мандаттығ округтарча парчатханнар пар, хай-хай тиң оңдайлығ полча. Мына амды, хачан чоннар аразындағы кирек чахсы нимес, хачан чаачы операциязы парча, Россия президенті паза пістің губернатор пірге поларға хығырчалар... олох туста «Единая Россия» партия хыйыстыра парча, табығ системазын сайбирға паза ыырлас сығарарға кӱстенче.
Евгений Панков, Ағбан городтың VI хығыртии Депутаттар чӧбінің депутады(2018-2023):
- Піске прайзына чазыт нимес - устапчатхан партия табығларда хачан даа администра-тивнай ресурснаң тузаланча. Мин сағынчам, аннаңар олар пір мандаттығ оңдайны ла артыс саларға кӱстенчелер - списоктарча парчатханнар оларға сидіксіністер ағылчалар нооза. Спи-соктарча табылған паза аймах партиялардаң полған депутаттар киректі сын паалап пос кӧрізін искірчелер.
Республика СМИ-лері искіриинең, Ағбан городтың Депутаттар чӧбінің 26 апрельде ирткен сессиязында пу сурығ кӧдірілген, че пӧгілбин халған. Ағбан город пазы Алексей Лемин ол сурығны кӱн суриинаң суурыбысхан, мындағ сурығлар федеральнай синде пӧгілчелер тіп. Че сурығны кӧдірген депутаттар тӧдір пазынмааннар, ӱр таластар соонаң сурығның ӱзӱриин пазағы сессияа артыс саларға чарадығ алылған.
Автор :
Тимнеен Альберт Толмашов
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде