ХАКАС АС-ТАМАА ПОЛЗЫН
27.04.2022
Хабарлар
Хакасия пазы Валентин КОНОВАЛОВ идінҷектернең чоохтасча
Кӧзідіг. Л.Р.Кызласовтың адынаң чир-суғ ӱгренӌең музейнің пастағы хадылында Хакасияның Садығ-промышленность палатазы араласчыларының регион кӧзідии азылған Хакасиядағы идінӌектер сығарчатхан ниме-ноо кӧзідиин кӧрерге килген Хакасия пазы Валентин Коновалов, Ӧӧркі Чӧптегі экономика политиказынӌа, промышленностьча, пӱдірігӌе паза транспортча комитет кнезі Василий Шулбаев, Хакасия пазының орынӌызы тоғызын толдырчатхан Сергей Комаров паза республиканың экономика тилізі министрі Виктор Богушевич.
Кӧзідігні асхан республиканың Садығ-промышленность палатазының президенті Владимир Сорокин. Анаң чоох тутханнар Хакасия пазы Валентин Коновалов паза Ӧӧркі Чӧптің комитет кнезі Василий Шулбаев. Оларның чооғынаң, амғы туста мындағ кӧзідіглер уғаа кирек. Ортымах бизнеснең айғасчатхан идінӌектерге хазна саринаң хайди даа полызығ кирек полча. Хакасияның Садығ-промышленность палатазы мындағ кӧзідігні пастағызын на иртірче. Пу организация маңнаныстығ тоғынчатхан идінӌектерні піріктірче, оларға полысча. Аннаң сығара бизнес тиліпче, ӧзер оңдай пирілче, наа сағыстар тӧріпче.
Анаң килген кізілер кӧзідіге сығарылған ниме-ноонаң танысханнар. Кӧзідімге алза, «Хакасия.ру» компания ӧмезі бизнесті тилідер паза ағаа ӱгредер хабазығлар пирче. Мында ідӧк кирек пічіктерні, бухгалтерия сан пирізін, электроннай оңдайнаң хол салары, онлайн-кассаларнаң тузаланарға паза даа пасха кирек нимелерні иртірерге полысчалар. «Хакасия.ру»-ның ӱгредігліг кінінде 7 - 17 частығ олғаннарны англия тіліне, 3 D-моделированиее, системнай администраторға, визуальнай программированиее, сайттар тӧстиріне ӱгретчелер.
Саяногорсктағы СТЭМИ техникум чииттерні туризмге, имнег киреене, юристке, экономика киреене ӱгренерге хығырча.
Страховой компанияларның кізілері постарының хабазығларынаң кӧрігӌілерні таныстырғаннар. Амғы туста суғ тазарынаң паза ӧрт сығарынаң саайлар удаа пол парчалар нооза, аннаңар ырах сағынчатхан кізілер постарының иб-чурттарына, хазаа-хахпахтарына страховой компанияларнаң чӧптезіг ит салчалар.
Пу кӧзідігде пӱдіріг организацияларының кізілері араласханнар. Оларның аразында тимір-бетон ниме-ноо сығарчатхан завод (ЖБИ), пӱдіріге кирек хум, сай паза пасха ниме-ноо тимнепчеткен «Катрина» ООО, сэндвич-панельлер, ПВХ, тимір листтер сығарчатхан завод, «Комфортный дом» сантехника фирмазы паза даа пасхазы.
Минің хайиимны чаӌын хабыӌахтарда «талған» пазыл парған столыӌах тартхан. Аның ээзі Павел Боргояков. Ол пеер Асхыс аалдаң килген. Павел Геннадьевич мындағ кӧзідіглерде тӧреміл араласча. Талған идерін ол 2004 чылдох пастаан. Амды ол паба-іӌезінең хада пу кирекнең айғасча. Идінӌек талған итчең тамахты Алтай аймаандағы фермерлердең садызып алча. Анаң талғаны тимде полза, андар садығӌы оптовиктер киліп, садызып алчалар. Аның талғанын Ағбандағы ас-тамах магазиннерінде кӧрерге чарир. Чоохтирға кирек, Павел Боргояковтың тимнеен ас-тамаа Хакасияның пасха даа городтарында садылча.
Кӱлӱк идінӌек соонаң талғаннаң пасха даа ас-тамах сығарарға пӧгінче. Піске аның пу сағызы толзын тіп алғирға халча. Хакастарның аймах ас-тамаан сығар ла турарға кирек.
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде