ПОС ТІЛІН ПІЛЧЕТКЕННЕРГЕ ЧОЛЛАР АЗЫЛЧА
27.04.2022
Хабарлар
М.Н.Боргояковтың адынаң республика олимпиадазының чиңісчілері паза призёрлары
Сыйыхтас. Ирткен неделяда хакас тілі паза литература предметтерінӌе М.И.Боргояковтың адынаң республика олимпиадазының чиңісчілерін паза призёрларын чеестееннер
Пӱӱл хакас тілінӌе паза литературазынӌа олимпиадада сыйыхтығ орыннарға 9 - 11 класстардағы 20-ее чағын ӱгренӌі турысхан. Оларзар алғыстаснаң айланғаннар Хакасияның ӱгредіг паза наука министрінің орынӌызы Юрий Сагалаков, тархын наукаларының кандидады, республиканың Улуғлар чӧбі кнезінің пастағы орынӌызы Андрей Асочаков, ӱгретчілернің узын тилітчең институттың хакас кафедразының устағӌызы Надежда Толмачева паза даа пасхазы.
Пӱӱл хакас тілінӌе олимпиадада чиңісчі полыбысханнар: Алтынай Боргоякова (Асхыстағы лицей-интернат, 9 класс), Елизавета Угдыжекова (Кызластағы школа, 9 класс), Даяна Саражакова (Хакас национальнай гимназия-интернат, 10 класс) паза Аима Боргоякова (Хакас национальнай гимназия-интернат, 11 класс).
Призерлар - Елена Сульбирекова, Владимир Бурнаков, Дарина Килижекова, Дарина Киргинекова, Анна Албычакова, Кира Мамышева, Маргарита Сербигешева, Евгения Мурусупова, Сабетр Мамышев, Николай Сагалаков.
Хакас литературазынӌа чиңісчі полыбысханнар: Алтынай Боргоякова (Асхыстағы лицей-интернат, 9 класс), Ольга Томочакова (Ӱс чулдағы школа, 10 класс) паза Аима Боргоякова (Хакас национальнай гимназия-интернат, 11 класс). Призерлар аразында Елена Сульбирекова, Анна Карачакова, Маргарита Сербигешева, Ксения Сагатаева, Юлия Сагалакова, Мария Мамышева, Сабетр Мамышев.
Ӱгренӌілерні тӧреен тілге паза культураа кӧніктірер тоғысты чалтырама апарчатхан ӱчӱн Хакасияның Улуғлар чӧбінің алғыстас пічиинең Алтынай Боргоякованың паба-іӌезі Юрий Васильевичнең Валентина Георгиевна таныхтатханнар паза Елена Сульбирекованың паба-іӌезі - Владимир Андреевич паза Любовь Николаевна.
- Пу олимпиадаа Алтынайны ӱгретчі Лидия Семёновна Сафьянова тимнеен. Ол хызыхаабысты мындағ пӧзік чидіге читірер ӱчӱн прай кӱзін салған паза тіл олимпиадазында аралас полар оңдайын сизінген. Піс Лидия Семёновнаа улуғ алғызыбыс читірчебіс, - таныхтаан чооғында Алтынайның пабазы Юрий Боргояков.
Танығлығ кӱнде олғаннарны олимпиадаа тимнеен ӱгретчілерні ідӧк алынӌа сыйыхтааннар. Іди алғыстас пічіктеріне турысханнар: Лидия Сафьянова (Асхыстағы лицей-интернат), Фаина Майнагашева (Кызластағы школа), Виктория Томочакова, Юрий Боргояков (Ӱс чулдағы школа), Татьяна Казанаева паза Марина Идимешева (Хакас национальнай гимназия-интернат).
Хакас тілінӌе паза литературазынӌа олимпиаданың чиңісчілеріне хайдағ чоллар азылчатханнаңар искірген Хакасияның ӱгредіг паза наука министрінің орынӌызы Юрий Сагалаков.
- Ӱр ниместе Саха-Якутияда улуғ чыылығ ирткен. Ол Сибирьнің паза Ыраххы Востоктың тӧреен тіллерін хайраллиры темаа чарыдылған. Чыылығ араласчылары пӱӱл майда тӧреен тіллерхе регионнар аразындағы олимпиада иртірердеңер чарадығ алғаннар. Аны хоостыра сірер, М.И.Боргояковтың адынаң республика олимпиадазының аарлығ чиңіс чілері паза призерлары, анда аралазарзар. Хакасияның адын кӧдірерге паза уламох улуғ чидіге чидерге оңдай полар.
Ідӧк Сочидегі «Сириус» ӱгредігліг кінде Сибирьнің паза ЬІраххы Востоктың олғаннарына ӧнетін смена азардаңар сурығ ӱзӱрілген. Андар нинӌе-де регионның 15-че ӱгренӌізі парар, неке. Смена 21 кӱнге кӧріл парған. М.И.Боргояковтың адынаң республика олимпиадаларында чиңіс тутхан олғаннарға ол чахсы оңдай тіп санапчам. Аннаңар кӱстеніңер, пілістерің тыыт турыңар, - искірген Юрий Гаврилович.
Н.Ф.Катановтың адынаң Хакас хазна университедінде хакас тілінӌе паза литературазынӌа олимпиада чиңісчілеріне хайдағ льготалар пирілчеткеннеңер чоохтаан хакас кафедразының устағӌызы, филология наукаларының кандидады Инга Кызласова. Аның искіриинең, таңдағы профессияны хакас тілінең палғалыстырарға сағынчатхан олимпиада чиңісчілеріне хакас тілі предметче 100 балл пирілер. Абитуриенттің орыс тілінӌе ЕГЭ салтары 75 баллдаң пӧзік полза, сыныхтағлар иртерге кирек чох полар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде