ХАКАСИЯНАҢ БЕЛОРУССИЯ ПІРГЕ ТОҒЫНАРЫН АЛҒЫТЧАЛАР
29.04.2022
Хабарлар
Валентин КОНОВАЛОВ паза Александр ПОЗНЯК
Тоғазығ. Хакасия пазы Валентин Коновалов Беларусь Республика посольствозының Хызылчардағы пӧлии устағӌызы Александр Познякнаң тоғасхан
Хакасияны паза Белоруссияны пик партнёр хайызығлары палғалыстырча. Пірге тӱзімніг тоғыс 2021 чылның салтарларында кӧрінген. Ниме-ноо садии пір чылға экспортча даа, импортча даа 3 хати ӧс парған. Пӱӱлгі чылның 3 айына ӧзіс ідӧк пілдірче.
Кидеркі хазналар хатығ санкциялар киріп хыза пасчатхан оңдайларда Хакасия харындас Беларусь Республиканаң садығ-экономика хайызығларын паза удур-тӧдір тузалығ пірге тоғысты алғыдарын кирексіпче.
- Амғы киректер пістің республикаларның пірге тоғынары алғып одырарын кирексіпче. Пістің пірге тоғынҷаң оңдайлар кӧп. Иң пурун - аал хонии. Аны паза пасха даа кӧстеглерні піске ӧткін паза прай саринаң тилідерге кирек, - таныхтаан Валентин Коновалов.
Іди Хакасия импорт ниме-ноозын Белоруссияда сығарылчатхан товарларға алыстырарға пӧгінче. Иң пастап пӱдіріг сферазында, ідӧк кабель паза электротехника садызарында.
Таныхтирға кирек, Хакасияда тиксі тыхтағ программазынҷа алыстырылчатхан лифттер Белоруссияда сығарылча. Хакасияа Белоруссиядаң чир ис-пайын аныпчатхан промышленностьха техника аларын алғыдары, БелАЗ-тар паза пасха техника кӧрімнерін тыхтаҷаң хоза сервис-кіннерін тӧстирі киректелче.
Республика ідӧк Хакасия чирінде аал хонии техниказын сығарарынҷа Белоруссиянаң пірге предприятие тӧстирін кирексіпче. Пу чылның июньында хакас делегациязы Белоруссияның агропромышленность неделязында аралазарға сағыс тутча. Ол санда ас-тамах сығарчатхан промышленность предприятиелерінде пол килерге.
Белоруссия позы саринаң Хакасияда сығарылчатхан ас-тамахты садызарын кирексіпче.
- Ӧзіс орыннары сынап кӧп. Мин хайдағ-да пірге промышленность производствозын тӧстиріне хайығ саларңыхпын. Пілдістіг, пір-ікі кӱнге ол иділбинче, хайзы тоғыстарға айлар паза чыллар даа парыбызар. Че ӧӧні, кӧстегні пілерге кирек, хайзынҷа піс пірге тудынып алнынзар парарбыс, - теен Беларусь посольствозының Хызылчардағы пӧлии устағҷызы Александр Позняк.
Александр Позняк Хакасия пазын Беларусь Республиказар тоғыс чорығынаң кил парарға хығырған. Валентин Коновалов ааллап хығырғаны ӱчӱн улуғ алғызын читірген. Чорых пӱӱл кӱскӱзін полар тіп кӧрілче.
Оларның саринаң пістің республиказар Белоруссияның финанстар министріне кил парҷаң оңдай кӧрілче. Республикалар аразында садығ-экономика, наука-техника паза культура саринаң пірге тоғынардаңар чӧптезіг 6 чыл мының алнында иділген. Пӱӱн ол чӧптезігҷе 2022 чылға теере кӧрілген мероприятиелер чуртасха кирілче.
Чӧптезігні толдырарынҷа пазағы 4 чылға мероприятиелер планында, Белоруссия делегациязы Хакасиязар килген туста, хол саларлар тіп кӧрілче. Делегация пӱӱл чайғызын килерге кирек.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде