ОЛҒАН САДЫ ПӰДІРІЛДІ, ШКОЛА НААҶЫЛАЛДЫ
29.04.2022
Хабарлар
Хакасия пазы Валентин КОНОВАЛОВ, Шира аймаа пазы тоғызын толдырчатхан
Сергей ЗАЙЦЕВ паза олған сады директоры Лариса КОПЫЛОВА хызыл лента хыплапчалар
«Демография» нацпроект. Пу неделяда Хакасия пазы Валентин Коновалов Шира аймаанзар тоғыс чорығынаң чӧрген
Хакасия Правительствозының, республиканың Ӧӧркі Чӧп кізілері паза муниципалитеттің устағ-пастаа Шира аалның Ит кӧл микрорайонында «Малыш» олған сады пайрамни азылғанында араласханнар паза Сон пилтірі аалдағы школа хайди нааӌылалғанын паалааннар.
2015 чылда Хакасияда хорғыстығ ӧрттер полған соонаң Ширада чурт чох халған чуртағӌыларға Ит кӧл микрорайонда наа туралар пӱдіргеннер. Пу тусха, туралардаң пасха, анда наа ФАП пӱт парған, ол тӱрчедең тоғын сығар. Алынӌа котельнай пӱдірілгенӧк, пу неделяда, тізең, олған сады тимге сығарылған! Хайди чоохтапча Шира аймаа пазының орынӌызы Андрей Диринг, олар «Малыштың» хыринда ортымах школа пӱдірерге пӧгінчелер. Пастағы кӧріснең, сағынчазың, нимее кирек мында ФАП, олған сады, школа... Ит кӧл микрорайонда кӧп сӧбіре чуртабинча, нинӌе-де ле орама, че аймахтың администрациязы Ит кӧлні тиліс микрорайонына санапча.
- Мында піс 400 азыра чир участогын, пӧліп, тимнеп салғабыс. Оларны муниципалитеттің льготалығ категория чуртағчыларының аразында ӱлестірербіс. Аннаңар пу орын илееде алғыдыл парар. Ширадағы 17№ школа, тізең, хаҷаннаң изел сыххан, аның ӱчӱн сыныхтағлығ органнар пісті сыбыра хатығлапчалар. Анда килкім тыхтағ тоғыстарын иткенңе, наа школа пӱдірерге чӧпке килгебіс. Ит кӧл, тізең, школа пӱдірерге иң килістіре орын. Ол аал тастында даа полза, олғаннарны автобуснаң тарт чӧрербіс, - чоохтапча Андрей Диринг.
Школа - ол Ит кӧлнің таңдағызы. Амды, тізең, анда наа олған сады азылды! Таныхтирға кирек, «Малыштың» иргі туразы Ширада орныххан. Ол 50 чыл мының алнында пӱдірілген. Пу тусха, школох чіли, изел парған полған. Ағаа хоза, анда ӱс ле группа полған, тиксі 60 пала чӧрген, ол уғаа асхынах.
Ікі хадыллығ наа олған садында, тізең, прайзына орын читкіӌе. Анда истіг паза чарых 14 группа тимнелген. Андар 260 пала чӧр полар. Учреждениеде палаларны хорғыс чох кӧрер, оларны тилідер оңдайлар прай тимнелген: ойнаӌаң паза узуӌаң орыннар, физкультура паза музыка занятиелерін иртірӌең заллар, ас-тамах, имнег блоктары, олған площадкалары паза даа пасхазы. Чолда орта тудынар правилоларға ӱгренер, аймах опыттар турғызар кабинеттер дее кӧріл парғаннар.
Шира аймааның чуртағӌыларын наа олған сады азылғанынаң Хакасия пазы Валентин Коновалов алғыстаан.
- Аал чуртағҷыларын ӱр сахтаан олған сады азылғанынаң алғыстапчам! Наа учреждениені хайраллаңар, иптіг тудыңар. Мында «наа чылтыстар» тӧрізін, - айланған чыылған чонзар Валентин Олегович.
Пу олған садынзар 6 частығ Дарья чӧрер.
- Хызыҷаабыс «Малыш» олған садынзар хаҷаннаң чӧрче. Ол иргі дее полған полза, анда истенгебіс. Амды пу наа олған садынзар чӧрербіс. Ачырғастығ, пір ай пазынаң піс аннаң анымҷохтазарбыс. Наа учреждениеде истіг нооза, андар олғаннар хынып чӧрчелер, - чоохтапча чиит іӌе Наталья Ускова.
Шира аймаанда олған сады азылғанда, чуртағӌыларға хоза тоғыс орыннары пол килген. Андар воспитательлер паза ортын персонал алылған. Олған сады «Демография» нацпроект хоостыра пӱдірілген. Федеральнай, республика паза муниципалитет бюджеттерінең 175,5 миллион салковай позыдылған. Пӱдіріг тоғыстары пастағызынаң ала аар парған. Пастап пӱдірігнең айғазар подряд организациязы ӱр табылбаан, анаң, тоғыстар тоозылчатханда, тізең, подрядчиктің тоғысты аннаң андар апарар оңдайы чох пол парған. Аннаңар муниципалитеттің устағ-пастаана, орындағы подрядчиктернең чӧптезіглер идіп, оларнаң хада пӱдірігні тоозарға киліскен.
Пӱдіріг тоғыстары тоозылғанда, лицензия аларынаң сидіксіністер пол сыххан. Че амды пу прай сидіксіністер соонда халды, «Малыш» азыл парды! Хайди таныхтаан Хакасияның ӱгредіг паза наука министрінің орынӌызы Анатолий Бутенко, Ширадағы паза Новокурсктағы олған садтары халғанӌы школа алнындағы ӱгредіг учреждениелері, хайзылары «Демография» нацпроектче пӱдірілчелер. Мыннаң федеральнай программа республикада чуртасха кирілері ӱр нимеске тохтадылча.
- Пу проекттің ӧӧн пӧгіні кічіг палаҷахтарға олған садтарында орыннар тӧстирі полған. Пу пӧгін республикада толдырыл парды, - таныхтаан чооғында Анатолий Алексеевич.
Ікінӌі ӧріністіг тоғазығ Сон пилтірінде полған. Ирткен чылда пу аалдағы школада тиксі тыхтағ тоғыстары парған. Пӱдірігӌілер фундаментті тыытханнар, стене-потолоктарны нааӌылабысханнар, чарытхы системазын алыстырыбысханнар, чылығлабысханнар паза даа пасха тоғыстар итклебіскеннер. Наңмырлар соонаң школа ибіре суғ турбас ӱчӱн ӧнетін траншея хазылған. Школа пӱкӱлее нааӌылалғанынаң пасха, анда прай наа оборудование паза мебель алыстырылған. Аннаңар директор Светлана Бривкольн поғдархап чоохтапча.
- Информатика кабинедінде полған на ӱгренҷінің позының компьютері пар, ӱгретчі интерактивнай досканаң тоғынча, футбол, волейбол, баскетбол площадкалары пӱдірілген, - ӧрінізін чазырбинча Светлана Ивановна.
Сон пилтіріндегі ортымах школа пӱӱл кӱскӱзін пайрамын таныхтир. Хакасияның правительствозы, аны нааӌылап, чахсы сыйых ит пирген тіп таныхтааннар школа тоғынӌылары.
Шира аймаанзар тоғыс чорығынаң чӧргенде, Валентин Коновалов муниципалитет чуртағӌыларынаң тоғасхан. Анда олар регион устағӌызына аймах сурығлар пиргеннер. Аны хоостыра чуртағӌыларны хайдағ ағырсымнығ сурығлар сағыссыратчатханын піліп аларға чарир - ол имӌілер чидіспинчеткені, социальнай учреждениелер пӱдірілбинчеткені паза нааӌылалбинчатханы, халых орыннарын иптирі, кресен-фермер хоныхтарына паза идінӌектерге хабазары, ас-тамахха паалар ӧсчеткені, спортты тилідері, аалдағы специалисттерге чал ахчазын ӧскірері паза даа пасхазы.
Хакасия пазы Валентин Коновалов чыылығда искірілген сурығларны профильліг министерстволарға муниципалитеттің администрациязынаң хада пӧгер оңдайлар таап саларға чахығ пирген.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде