АВТОКОЛОННА ААЛЛАРҶА ПАРЧА
29.04.2022
Хабарлар
Хакасия пазының орынҷызы Юрий КУРЛАЕВ паза
культура министрі Светлана ОКОЛЬНИКОВА мемориалзар венок салчалар
Чӧрім. Илбек Чиңіс кӱні алнында Хакасияда чыл сай «Автопробег» патриот акциязы иртірілче
Илбек Ада чаадағы Чиңіс кӱніне чарыдылған республиканың автомобильлер чӧрізі Ағбандағы Чиңіс паркынаң пасталған. Пу патриот акциязына кӧп чон чыыл партыр, кӧглер, сарыннар истілче. Анда-мында чааӌылар, юнармеецтер турчалар. Олаңай даа кізілер илееде кӧрінче.
Кибір хоостыра автомобильлер чӧрізінде Илбек Ада чааның ветераннары, тыл істенӌілері, чаа палалары, министерство-ведомстволарның, ДОСААФ-тың региондағы пӧлиинің, чаа-патриот клубтарының паза чӧрімнерінің кізілері, чииттер паза юнармеецтер араласчалар.
Автоколонна ӱс кӱнге пір муң азыра километр чолны иртче. Ол кірчеткен 10 аалда пайрамнығ митингтер, тоғазығлар иртірілче, чааӌыларны сабландырчатхан хумартхы тастарзар, мемориалларзар паза обелисктерзер чахайахтар салылча. Мероприятие Хакасия правительствозының паза ДОСААФ хабазиинаң иртірілче. Ідӧк автоколонна полған аалларда орындағы чииттерні Юнармияа алчалар.
Чиңіс паркындағы Чааӌылар сабланызы мемориал хыринзар парадха кисчең кип-азахтығ чааӌылар Россияның Знамязын паза Чиңіс флагын ағылғаннар, оларның соонӌа юнармеецтер - постарының флагын. Россияның паза Хакасияның гимннері толдырылған соонда митинг пасталған.
Аны, чоох тудып, асхан Хакасия пазының орынӌызы Юрий Курлаев:
- Аарлығ нанҷылар! Илбек Чиңіс кӱні чағдапчатханда, піс кӧп мероприяие иртірчебіс, чаа араласчыларын сағысха кирчебіс. Хомзынысха, оларның саны асхынах ла полып одырча. Піс, прай оңдайларнаң тузаланып, оларны алғыстирға кӱсғенчебіс. Автомобильлер чӧрізі пӱӱл 10-хы хати иртірілче, ол кибірге кір парған. Анда чиит тӧл, чаа матырларының кӧргенектері араласчалар. Олар, аймах муниципалитеттерче парып, кізілернең танысчалар, постарының кӧрізін алғытчалар.
Амды олох чиит тӧл Украинаны фашизмнең арығлапча. Пістің оолларыбыс амыр чуртас ӱчӱн кӱресчелер. Юнармеецтерге, ДОСААФ-ха, культура паза ӱгредіг министерстволарына мындағ акция иртірчеткен ӱчӱн алғыс сӧстерін читірчебіс. Автомобильлер чӧрізі тузалығ ползын. Ӧӧні - улуғ тӧлге, тыл істенҷілеріне улуғ аарлас читірілчеткені.
Митингте ідӧк чоох тутхан Россия ДОСААФ-ының региондағы пӧлиинің кнезі Михаил Куимов. Хайди ол таныхтаан, пістің хазна 77 чыл орудиелер атызы чох чуртапча, піс амыр чуртасты хайраллапчабыс. Че тархында прай ниме хатап полып одырча, Западтың хабазиинаң Украинада фашизм пазын кӧдірче. Россия ам аннаң тоғыр кӱресче. Пістің правительстваа, анда кӱресчеткен чааӌыларыбысха хабасчабыс.
Анаң стройда турған юнармеецтер сирт пиргеннер, оларға Юнармияның значоктары читірілген. Соонаң пір минута сым турары чарлалған, чааӌылар, автоматтардаң тиңе атып, салют иткеннер. Анаң Хакасияның чон артизі, саблығ ырӌы Герман Танбаев «Журавли» сарынны толдырған.
Митинг араласчылары Чааӌылар сабланызы мемориал тӧзінзер веноктар салғаннар, Успас от хыринзар - чахайахтар. Мыннаң митинг тоозылған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде