ОЙЫННАР ПАЗА КӦЗІДІГЛЕР «ПУШКИНСКАЙ КАРТАҶА»
29.04.2022
Хабарлар
Пресс-конференция тузында
Пресс-конференция. Хакасияның культура министерствозында сілкер айында «Пушкинскай картаҷа» хайдағ ойыннарға, кӧзідіглерге паза чайаачы иирлерге чӧрерге чарирын искіргеннер
Пресс-конференцияда Хакасияның культура министрінің орынӌызы Лариса Киштеева, министерствоның амғы искусство пӧлиинің ӧӧн чӧпчізі Ольга Воропаева, «Читіген» театрның директоры Ирина Чустугешева, М.Ю.Лермонтовтың адынаң драма театрының директоры Юлия Трошкина паза «Мисс Абахай-2022» марығның араласчызы Ксения Чебодаева араласханнар.
«Пушкинскай карта» - Россия президентінің кӱстенізінең чуртасха кирілген федеральнай проект. Аны хоостыра 14 - 22 частығ чииттерге культура учреждениелерінзер паза пӱӱлдең сығара кинотеатрларзар тикке чӧрерге чарадылча. Хакасияда проект 2021 чылда 1 сентябрьдаң тоғынып пастаан. Таныхтирға кирек, республикадағы чиит улус ӧткін. Сигіс ай аразына 13 муң азыра оол-хыс, «Пушкинскай картаны» ээленіп алып, амды аймах культура мероприятиелеріне сыбыра чӧрче. Пӱӱнгі кӱнге республикада 19 культура учреждениезі проектке киріл парған.
Амды ӧӧн ӱлӱкӱн чағдапча. Илбек Чиңіс кӱні регионда паза хазнада чуртапчатхан прай чонны піріктірче. Таныхтирға кирек, пӱӱл 9 Май аймах мероприятиелерге пай полар. Театрлардағы наа спектакльлар даа чаа темазына чарыдылчалар.
«Читіген» театр хосхар айының 30-ҷы кӱнінде паза сілкер айының 6-ҷы кӱнінде «Ізі чох чіт парғаннар» (12+) ойынға хығырча. Илбек Ада чаадаңар драма кӧрігӌілерге ағаларыбыс хайди чир-суубысты арачылааннаңар чоохтапча. Оларның сылтаанда піс чарых тигір алтында амыр чуртапчабыс. Итсе, халғанӌы тустарда пістің истіг чуртазыбысха изі чохтанчатханнар табыл сыхтылар.
Ідӧк сілкер айының 1 - 10 кӱннерінде С.П.Кадышевтің адынаң чон чайаачызының национальнай кіні чииттерні «Чиңіс знамязы» сомнар кӧзідиине хығырча. Ол Илбек Чиңістің 77 чылына чарыдылча.
В.Г.Чаптыковтың адынаң Хакас филармониязында сілкер айының 2-ҷі кӱнінде композитор полған Кирилл Молчановтың «Зори здесь тихие» операзының кӧзідии иртер. Анда Хакасия искусствозының саблығ деятельі Вячеслав Инкижековтың устаанынаң симфоническай оркестр аралазар.
А.М.Топановтың адынаң Хакас драма театры сілкер айының 4, 5 паза 6 кӱннерінде «Первая Ленинградская» (12+) спектакль кӧзідер.
М.Ю.Лермонтовтың адынаң театрда хосхар айының 30-ҷы кӱінніде паза сілкер айының 7-ҷі кӱніде «Посчитай, Господи!» (16+) паза сілкер айының 6-ҷы кӱнінде «Документальное рондо для бега с препятствиями» ойыннар иртер.
Ағбан, Саяногорск, Сорығ городтарның паза Асхыс, Пии аалларның кинотеатрлары паза кинозаллары Илбек Ада чаадаңар фильмнер кӧзідерлер.
Ідӧк пресс-конференцияда «Мисс Абахай-2022» марығның «Мисс чайаачы» номинациязының чиңісчізі Ксения Чебодаева «Пушкинскай картанаң» хайди тузаланчатханнаңар чоохтаан.
- Мин «Мисс Абахай» марыға арғыс-ӧӧрелерімні хығырғам, олар минің ӱчӱн «ағырзыннар» тіп. Че хай піреезінің билетке ахчазы чох полған. «Пушкинскай карта» піске уғаа тузалығ пол парған. Прайзы, ол картаны иттіріп алып, абахайлар мариин кӧрерге килген.
«Пушкинскай карта» кӧп культура мероприятиезін кӧрерге оңдай пирче. Чииттер школа соонаң пасха регионнарзар даа ӱгренерге парыбысчалар. Анда олар «Пушкинскай карта» полызиинаң театрларзар, музейлерзер чӧрчелер. Пу проект піске чахсы хабазығ пирче, - теен ӧткін хыс.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде