ХАДА-ПІРГЕ ТОҒЫС - ЧӦПСІНІСТІГ
18.05.2022
Хабарлар
Хакасияның пудіріг паза ЖКХ министрі Валерий КЕЛИН республика пазы
Валентин КОНОВАЛОВХА суғ арығлаҷаң станцияның наа тиріглерін кӧзітче
Тоғыс чорығы. Хакасия пазы Валентин Коновалов ирткен неделяда Шира аймаандағы Хутухтығ паза Жемчужнай аалларда пол килген. Хутухтығ аалда ол суғ тартчаң паза арығлачаң станция хайди наачылал парғанын сыныхтабысхан. Чоохтирға кирек, Ит кӧл хазындағы станция 1965 чылда пӱдірілген. Ол тустаң сығара анда алғым тыхтағ тоғызы иділбеен полған. Пу ла чыл, Жемчужнай аал чӧбіне «Арығ суғ» хазна программазынзар кіріп аларға оңдай киліскенде, станцияны пӱкӱлеезінең нааҷылабысханнар. Ахча федеральнай, республика паза аймах бюджеттерінең пирілген -100 миллион азыра салковай!
- Тоғыстарны пылтыр апрель айда пастаабыс. Чӧптезіг хоостыра объектті пу чыл апрельнің халғанҷы кӱннерінде тузаланысха пирібізерге кирек полған. Иң пастап піс станция туразының тастын, хырын нааҷылаабыс, істінде тыхтағлар иртіргебіс, анаң кирек тиріглерні, насостарны турғысхабыс. Амды прай тоғыс автоматика пастыра толдырылча, - чарытхан подряд пірігізінің прорабы Анатолий Кайнаков.
Владимир Стародубцев «Жилищно-коммунальный комплекс» ООО-ның холындағы станцияда 15 чыл азыра істен парир. Ол - машинист-оператор. «Пастап піс прай хол кӱзінең итчеңміс. Олох суғны арығлирға кирек хумны, тусты хаптарнаң тазычаңмыс. Амды, тізең, прай нимені автоматика толдырча. Мағаа кнопкалар ла пазып одырарға кирек», - ӱлескен Владимир Викторович.
Предприятие устағ-пастааның искіриинең, тӱрчедең станцияда специалисттер саны хозыл парар. Пӱӱнгі кӱнде ӱс кізі ӧнетін курстар иртче. Анаң олар пеер тоғынарға килерлер.
Ит кӧл хазындағы станциядаң арығ суғ Хутухтығ паза Жемчужнай ааллар чуртағҷыларына пирілче. Хакасия пазы Валентин Коновалов, станция істінде полып, наа тиріглерні кӧріп теен: «Амды чон хомай суғ ізерінде ікінчілес чох полар».
Чоохтирға кирек, суғ тартчаң паза арығлаҷаң станциязар алылған тиріглернің ӧӧн чардығы пістің хазнадағы заводтарда сығарылча. Жемчужнай аалда республика устағчызы Валентин Коновалов пурнада «Озеро Шира» курортта пол килген. Хайди искірілген полған, пу предприятие 2015 чылдаң сығара банкротство киреен тоос полбинча. Пӱӱнгі кӱнде ол идінчектің холында.
Предприятиенің имнег корпустарынча чӧр килгенде, ағаа сынап улуғ полызығ киректелчеткені харахха тасталча. Аны пӱкӱлеезінең нааҷылирға кирек, имненерге килчеткен чонға кӧрілген тиріглер най иргі.
Жемчужнай аал чуртағҷыларынаң азых чоохтазығда курортты хайраллап халарынаңар сурығ кӧдірілгенӧк. Хайди нандырған Хакасия пазы Валентин Коновалов, республика правительствозы ағаа, курорттың кӧстеглерін паза тоғынҷыларын хайраллап халар ӱчӱн, инвесторлар тілирінде ле хабазар оңдайлығ. Пӱӱнгі кӱнде ол тоғыс апарылча.
Пу тоғазығда чонны сағыссыратчатхан пасха даа сурығлар пирілген регион устағ-пастаана. Кӧбізі Жемчужнай аалда чуртир истіг оңдайлар тӧстирдеңер сағыстарынаң ӱлескен - аал орамаларын иптирінеңер, чазағ чӧрчең чоллар, тынағ парктарын тӧстирдеңер паза даа пасхазы.
- Хакасия правительствозы полған на аймах-городха хабазығ пирерге кӱстенче. Национальнай проекттерде, хазна программаларында тӧреміл араласча. Кӧзідімге, ӱр ниместе «Культура» нацпроект хоостыра Хутухтығ аалда наа Культура туразы пӱдіріл парған. Ағаа тиксі 50 миллион салковай позыдылған. Амды «Арығ суғ» хазна программазы хоостыра Ит кӧл хазындағы суғ тартчаң паза арығлаҷаң станция нааҷылал парды.
Муниципальнай пӱдістер постары ідӧк ӧткін хайынарға киректер - республика программаларында аралазып, пос бюджедінзер ахча кирерге. Хакасияның национальнай паза территориальнай политика министерствозы чыл сай муниципальнай пӱдістер аразында социальнай проекттер мариин иртірче. Ағаа асхынах нимес ахча позыдылча. Аннаңар сірерге дее, анда аралазып, олох тынағ паркын тӧстирге алай Илбек Ада чаа ветераннарына чарыдылған хумартхы тас турғызыбызарға чарир, - теен Валентин Коновалов.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде