ТОҒЫС ЧОХТАР САНЫ - ХАЙЫҒДА
18.05.2022
Хабарлар
Сомда: Хакасияның ӧӧн чуртас экономиказынаңар сан пиріс итчеткен ӧӧн министрлер
Кризистең тоғыр штаб. Хакасия правительствозы кидеркі хазналар Россиядаң тоғыр хатығластар кирілчеткен туста республиканың чуртас-экономика алызығларын хайығда тударын узаратча
Хакасия пазы Валентин Коноваловтың устаанынаң кӧстегліг министерство-ведомство пастыхтары чонға хорғыс чох поларын паза паалар ӧзізін, кічіг паза ортын пос кирее тӱзімніг тоғынарын паза чон тоғыстығ поларын хайығда тутчалар. Прай кӧстеглерге федеральнай синнең хабазығ пирілче, че ре-гион ідӧк пос киреенең айғасчатханнарға паза чуртастың сидік оңдайларына кіргеннерге хабасчаң оңдайлар тілепче паза чуртасха кирче.
Кризистең тоғыр штабтың теестегі чыылиинда ирткен неделядағы чонға хорғыс ағылчатхан киректер ілезіне сығарылғаны, ас-тамахха, имнерге паза пӱдіріг ниме-ноозына паалар алысханы, чуртағҷыларның тоғыс чох халарына хорғыстар паза тӧбін парыстығларға, кӧп палалығ сӧбірелерге хабазар оңдайлар ӱзӱрілген.
Хакасияның юстиция паза региондағы безопасность киректерінҷе министр Сергей Ромашовтың искіриинең, Россия Украинада ӧнетін чаа операциязын пастааннаң сығара республикада ӱлгӱдең паза аның политиказынаң тоғыр чӧрімнер иртірілбеен. Олох туста оох-теек сайбағлар сығысча. Пу неделяда Ағбандағы бетон заводында ӱлгӱні хомайлапчатхан сӧстер пазылғаны табылған, сах андох оларны чох иткеннер, сілкер айының 12-ҷi кӱнінде, тізең, Ағбандағы ӧӧн мылчаның стенезіндегі Георгиевскай чаламанаң Z пазылған баннерні тӱзіре тартыбыстырлар. Прай сайбағларҷа істезіг апарылча.
Сергей Ромашов ідӧк Чиңіс кӱніне чарыдылған прай мероприятиелер чонға хорғыс чох поларынҷа иң пӧзік синде ирткеннеңер искірген. Аннаңар министр МВД паза УФСБ органнарына Хакасия правительствозы паза республика пазы адынаң алғыстастар читірердеңер чӧпнең сыххан. Хакасия пазы Валентин Коновалов министрнің чӧбінең чарасхан паза алғыстастарны тимнирге чахаан.
Республикада паалар ӧзізі ідӧк азығ айынаң сығара хайығда тудылча. Хакасияның экономика тилізі министрі Виктор Богушевичтің искіриинең, олар ам Орджоникидзе паза Боград аймахтарында иб хыриндағы садығ тураларында ас-тамахха пааларны сыныхтапчалар. Специалисттер таниинаң, андағы паалар Ағбандағы ортымах паалардаң даа, Росстат пааларынаң даа сала тӧбін. Виктор Богушевич кӧзідімге палых паазын пирген. Тиксі алза, чир тамаана паалар ам даа ӧсче, ортымахти 2 %-ке, че муксунға - 9,2 %-ке. Аннаң пасха, чир тамаанаң консерваларға паза пала чиизіне паалар 4 %-ке ӧскені таныхталған. Министерство ідӧк пааларны Росстаттың сыныхтағ салтарларынаң тиңнестірче.
Пӱдіріг ниме-ноозына пааларның алысханынаңар искірігнең чоох тутхан республиканың пӱдіріг паза ЖКХ министрі Валерий Келин. Іди алынҷа садығ тураларында чарытхы кабельіне паза 5 мм арматураа паа тӱскені таныхталған. Пасха пӱдіріг ниме-ноозына паалар олох синде халтыр. Валерий Келин ідӧк федеральнай синде алылған наа чарадығларны чарытхан. Амды тиксі тыхтағ тоғыстарына аванс сині ӧскірілген паза чӧптезіг паазын тӱзедерге чарадылча, городтағы осхас истіг оңдайларны тӧстирінҷе хазна программазында инфраструктура облигациязын тузаланарға чарадылча. Ирткен неделядағы чыылығда опер-штабтың араласчылары аалдағы ипотекаа ахча регионнар аразында ӱлестірілгеніне ӧрінген полғаннар, че амға теере ахча орындағы банктарға читірілбеен.
Чонға иң кирек имнер паазы 4 - 15 %-ке тӱстір, пірее имнер паазы 2,2 %-ке ӧскені таныхталған. Пасха имнер паазы 5,2 %-ке ӧстір, піреезінің паазы тӱстірӧк. Аптекаларда паза имнег тураларында имнер читче. Нинҷе-де аарлығ имнең сидіксініс пар, че ол Россияда даа сығарылча тіп искірген республиканың хазых хайраллаҷаң министрі Олег Ананьевский.
Виктор Богушевичтің таниинаң, кічіг паза ортын пос киреене читірілчеткен хабазығларны хати кӧргенде, ас-тамах промышленнозы паза социальнай кӧстегліг коммерческай нимес пірігістер хабазығ албинчатханы сығысхан. Оларға хабазар оңдайларны тілирге чахаан Валентин Коновалов, ол санда федеральнай бюджеттең. Республика бюджедінең хабазарға итсе, пасха хорадығлардаң ахча аларға килізерінеңер искірген финанстар министерствозының кізізі. Олох туста республика пазы хабазығ алар идінҷектер пӱӱнгі чуртас-экономика оңдайларының кирексіністеріне нандырарға киректер: тоғыс орыннарын хайраллирға, ахча айланызын паза ниме-ноо сығарызын хызырбасха, бюджеттерге тӧлеглер синін ӧскірерге кирек.
Хакасияның істеніс паза социальнай арачыланыс министрі Владимир Чебодаевтің искіриинең, пӱӱнгі кӱнде республикада прай чуртағҷыларға хабазығ читірілче. Валентин Коновалов штаб араласчыларын сӧбіреде ӱзінҷі паза пазағы пала тӧреен ӱчӱн пирілчеткен регион капиталы чарадылғаннаң сығара ӧскірілбееніне хайығ айландырған. Ідӧк аннаң тузаланар тусты хызырарға чарир теен ол. Оларны килчеткен дее чылдаң кирердеңер сағызынаң ӱлескен республика пазы. Пу алызығларны кирерінҷе ӱс кӧстегліг министерство: финанстар, экономика тилізі, істеніс паза социальнай арачыланыс - республика бюджедінің оңдайларын паалир.
Чыылығда республика пазының орынҷызы Ольга Пономарёва пірее предприятиелер тоғыстарын ӱр нимеске тохтатчатхан сылтаанда, оларның тоғынҷыларынаңар сағыссыразынаң ӱлескен. Теестегі чыылығда Владимир Чебодаев тиксі республикада істеніс рыногындағы киректерні чарытхан.
- Пӱӱнгі кӱнде 2200 кізі тоғыс чох саналча алай тоғынҷаң чуртағҷыларның 1,3 проценті, чыл пасталғаннаң - 4000 кізі алай 1,7 проценті. Ирткен чылда кӧрік айында тоғыс чох 8200 кізі саналған, 2021 чыл пасталарына - 16200 кізі. Тоғыс чохтар сині 3,5 процентке тиңнелген, 2021 чыл пасталарына - 6,4 процентке. Тоғыс пирчеткеннер пӱӱнгі кӱнде 6000 азыра тоғыс орнын сӧлепчелер, - чарытхан Владимир Петрович.
Министерство чуртағҷыларның тоғыс чох халарын кӱннің хайығда тутча. Ол искіріг ідӧк федеральнай ӱлгӱлерге читірілче. Тоғыс пирчеткен 59 идінҷектің 862 тоғынҷызы тоғыс чох халарға айабас, чыл пасталарына оларның саны 1146 кізее тиңнелген. Ол санда 634 кізі тоғыстаң сығардырар, 109 кізі толдыра нимес кӱн істенер, 119 кізі тоғыс тохтадылған сылтаанда істенмес. Тоғыс пирчеткен 13 предприятиенең, хайзылары 600 азыра кізіні тоғыстаң сығарарға пӧгінче, чӧптезіглер апарылча. Чонға тоғыс тапчаң кіннерде ідӧк чуртағҷыларға искірігліг полызығ читірілче.
Валентин Коновалов тоғыс чохтар саны хайдағ предприятиелердең паза хайдағ сылтағнаң сығарылчатханнарын істезерге чахаан. Сағам, тізең, ол ӧӧнінде кізілер тоғыс орнын алыстырчатханынаң палғалыстығ тіп искірген Ольга Пономарёва.
Оперштабтың халғанҷы сурии - чуртағҷыларның пос кирексіністеріне, ол санда пӱдірінерге, тиксі тыхтағ идерге, хазаа-сиден турғызарға ағас пилетирге праволарының чуртасха кирілчеткені ӱзӱрілген. Ӧӧн искірігнең Хакасияның чир-чайаан ис-пайы паза экология министрі Владимир Лебедев чоох тутхан. Піс «Хакас чирі» газетада пу сурығны алғыда чарыдарбыс.
Мыннаң кризистең тоғыр штабтың теестегі чыылии тоозылған. Пазағы чыылығ сілкер айының 19-ҷы кӱнінде иртер.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде