ПОС ТІЛІ ААРЛАСТА
18.05.2022
Хабарлар
Н.Ф.Катановтың адынаң национальнай гимназияда олимпиада парчатхан туста
Пос тіллерінде олимпиада. 12 майда Сибирьдегі паза Ыраххы Востоктағы чоннар тіллерінҷе регионнар аразындағы олимпиада ирткен
Анда Алтай, Тыва, Пӱрӱт, Хакасия, Саха-Якутия республикаларының паза Кемеров облазының Кузбасс городының 9 - 11 класстардағы ӱгренӌілері араласханнар. Олар прайзы постарының регионнары синіндегі пос тілінӌе олимпиадаларның чиңісчілері паза призерлары полчалар. Паза пу онлайн олимпиадада татарстандағылар пос кӧңнінең араласханнар.
Пістің республикадаң анда хакас тілінӌе паза литератураӌа М.И.Боргояковтың адынаң олимпиадада сыйыхтығ орыннарға турысхан оол-хыстар пілістерін сынааннар. Оларға ікі орын кӧріл парған: Н.Ф.Катановтың адынаң национальнай гимназияда паза Асхыстағы М.И.Чебодаевтің адынаң лицей-интернатта.
Регионнар аразындағы олимпиада ікі чардыхтаң пӱткен. Пастағызынзар 30 сурығлығ тест кирілген. Анда Россияда чурттығ тӱрк чоннарның тіллерінӌе, культуразынӌа, фольклорынӌа сурығлар полғаннар. Пу тоғысты толдырарына 90 минута пирілген. Ікінӌі чардыхта, тізең, улуғ класстардағы ӱгренӌілерге хоос произведениені ӱзӱрерге паза таллап алған темаӌа эссе пазарға киректелген. Чайаачы тоғыстарны толдырарға 120 минута кӧріл парған.
- Мындағ синніг олимпиаданы чуртасха кирер алнында піс пылтыр декабрьда Сибирьдегі паза Ыраххы Востоктағы чоннар тіллерінце тоғысчы ӧме тӧстеп алғабыс. Андар пу округтардағы ӱгредіг министерстволарының пос тілі сурығларынаң айғасчатхан пӧлік устағҷылары, специалисттері, эксперттері кирілгеннер. Оларнаң хада, чыылызып, мындағ олимпиада иртірерге хайди даа кирек тіп чоохтасхабыс. Ол чыылығ пӱӱл апрельде Якутск городта ирткен. Піс андар Хакасияның ӱгредіг министрінің орынҷызы Юрий Сагалаковнаң паза Ӧӧркі Чӧптің культураӌа, ӱгредігӌе паза наукаӌа комитет кнезі Оксана Разваринанаң хада чӧргебіс. Мин анда нандырығлығ хачы полғам. Анда регионнар аразындағы олимпиаданың положениезін тимнебіскебіс. Алтай Республика аның тӧстегӌізі поларға ынабысхан. Олимпиада тоғыстарын тимниріне ідӧк ӧнетін комиссия тӧстелген. Пістің республикадаң андар ХакИРО тоғынҷызы Алефтина Балгазина кирілген, - чарытхан Хакасияның ӱгредіг министерствозындағы наука паза национальнай ӱгредіг пӧлиинің устағӌызы Ольга Доможакова.
Хайди ол аннаң андар чарытхан, пастағызын на иртірілген Сибирьдегі паза Ыраххы Востоктағы чоннар тіллерінӌе регионнар аразындағы олимпиаданың тузазы улуғ полар. Олар аны федеральнай ӱгредіг мероприятиелері санына киріп аларға пӧгін тутчалар. Анаң анда чиңіс тутхан саарбахтарға, хоза баллар алып, олимпиаданы иртірерге хабасчатхан вузтарзар кіріп алар оңдай пар полар. Паза олар орыс тілінӌе пірге хазна сыныхтаанда 75 баллдаң азыра алып алзалар, пу вузтарзар сыныхтағ чох алыларлар.
- Че кирексіністер хоостыра анзын ікі чыл сахтирға кирек. Аннаңар пастағы олимпиаданы пуох чылда иртірібізерге чаратхабыс, - теен Ольга Васильевна.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде