ИЛБЕК ЧИҢІСКЕ ЧАРЫДЫП
18.05.2022
Хабарлар
Марығ Илбек Чиңістің 77 чылына паза СССР Матырлары М.И.Чебодаевтің паза П.Ф.Поповтың хумартхызына чарыдылған. Арға-мӧрійге спортсменнер Кемеров облазынаң, Тувадаң, Хызылчар крайынаң килгеннер. Ідӧк Хакасияның кӱресчілері кибіске сыхханнар.
Спортсменнер ӱчӱн «ағырарға» Дагестаннаң улуғ аалӌылар килгеннер: республиканың спорт министрінің орынӌызы, 2004 чылда Афиныда ирткен Олимп ойыннарының чиңісчізі, боксер Гайдарбек Гайдарбеков паза олаңай кӱресче Россияның піріктірілген командазының улуғ тренері, олаңай кӱресче тилекей паза Европа чемпионы Магомед Курбаналиев.
Марығ пайрамни азылчатханда, спортсменнер паза кӧрігӌілер, Совет Союзының Матырларын хумартхылап, пір минута сым турғаннар. Кӱресчілерні алғыстирға Асхыс аймаа пазының орынӌызы Евгений Костяков сыххан. Аның таниинаң, спортсменнер пу марығ иртерін ӱр сахтааннар. Коронавирус чуғынӌах ағырығ тарапчатханнаңар, кӧп чон чыылчатхан мероприятиелерні иртірерге чарадылбинчатхан. Пу арға-мӧрій Илбек Чиңіске чарыдылған. Хорғыстығ чаада чуртастарын пир салған матырларыбысты хаӌан даа ундутпаспыс.
Ідӧк спортсменнерні С.З.Карамчаковтың адынаң спорт школазының директоры Виссарион Кольчиков, Хакасияның піріктірілген командаларын тимнепчеткен кіннің директоры Николай Ельчанинов алғыстааннар.
Магомед Курбаналиевтің чооғынаң, мындағ спорт пайрамнары аймах чоннарны піріктірчелер. Чиит спортсменнердең постарын турыстыра тудынарға, «ыырӌыларны» улуғлирға сурынған.
Хакасияның Ӧӧркі Чӧп депутады, республикадағы олаңай кӱрес федерациязының кнезі Геннадий Канзычаков, спортсменнерні алғыстап, оларға прай устарын кӧзіт пирерге алғаан.
Марығ азыл парғанда, оол-хыстар кибіске сыхханнар. Арға-мӧрій ікі кӱн ирткен. Полған на кӱрезіг уғаа хазыр парған. Ооллар аразында чиңіс тутханнар: Радислав Чучунов (Асхыс, 48 кг кӧдірімде), Артур Кичеев (Ағбан, 51 кг), Сергей Масленников (Новокузнецк, 55 кг), Илья Балахчин (Асхыс, 60 кг), Ильяс Палтушев (Ағбан, 65 кг), Игорь Петенев (Кемеров, 71 кг), Павел Макаров (Новокузнецк, 80 кг), Егор Боцман (Сорығ, 92 кг), Егор Черков (Ағбан пилтірі, 110 кг).
Хыстар аразында алтын медальларға турысханнар: Софья Агафонова (Ағбан, 46 кг), Валерия Косточакова (Асхыс, 49 кг), Валерия Карамчакова (Ағбан, 53 кг), Ульяна Суздаленко (Новокузнецк, 57 кг), Елизавета Шулбаева (Таштып, 61 кг), Елизавета Павленко (Асхыс, 65 кг).
Магомед Курбаналиевтің таниинаң, мындағ пӧзік синдегі марығларны удаа иртірерге кирек. Олар спортсменнерге устарын кӧдірерге хабасчалар. Саблығ спортсменнер чииттерге кӧзідім ползыннар. Хакасиядаң кӧп кӱресчі улуғ чидіглерге читкен. Чииттер, оларға кӧӧгіп, тренировкаларда прай кӱстерін салзыннар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде