5 муң километр дее харығ нимес
18.05.2022
Хабарлар
Пӱӱн Беларусьтың ööн телеканалында Хакасияны кöзітчелер. Пу наада Минсктің хабарӌылары чир-суубыста пол парыбысханнар! Оларның таниинаң, Беларусь паза Хакасия аразындағы 5 муң километр республикаларға пірге тоғынарға пір дее харығ полбинча.
- Хакасияның экономиказы уғаа пай. Пістің ööн öзеннерібіс - металлургия, энергетика, чылығ паза чарытхы пирчеткен комплекстер паза хара тас. Пістің палғалыстар тыыдылча, оларны алғытчаң илееде кöстеглер пар, ол санда чир ис-пайын аныӌаң техника, - таныхтапча Хакасия пазы Валентин Коновалов.
Чоохтирға кирек, Беларусь Республиканың техниказы ідöк аал хониинда маңнаныстығ тузаланылча. Хандых айында республика делегациязы Беларусьтағы аал хонии неделязында аралазарға, ідöк ас-тамах тимнеӌең паза ниме-ноо сығарӌаң предприятиелер тоғызынаң танызарға пöгінче. Ол, тізең, хайызығларны тилітчең наа оңдайларны пирер.
- Пістің республикада Беларусьта сығарылған 4 муң азыра техника тоғынча: хыра тартча, ӱртӱн кисче, чир ис-пайын аныпча. Техниканы тыхтаӌаң паза сыныхтаӌаң кіннер парох, - чарытча Хакасияның экономика тилізі министрі Виктор Богушевич. - Аннаң пасха Беларусьтаң ас-тамах паза кип-азах читірілче.
Анзын Ағбан город чуртағӌылары паза аалӌылары чахсы сизінче полар. Халғанӌы туста ыраххы Беларусь ас-тамааның алынӌа садығ туралары даа азылча. Кип-азах, тізең, хаӌанох республика чуртағӌыларының кöңніне кірче.
Че мыннаң хайызығлар уламох пиктелче. Амды ікі республиканың ӱгренӌілері удур-тöдір тöреен чирлерінің культураларынаң таныстырчалар. Іди пу наада Н.Ф.Катановтың адынаң Хакас национальнай гимназия-интернаттың ӱгренӌілері Гродно городтың ӱгренӌілері телемост пастыра танысханнар. Мыннаң мындар наа арғыстар аймах проекттерні чуртасха кирерге чаратханнар. Оларның пірсі - наука-практикалығ онлайн-конференция. Ол Илбек Ада чааға чарыдылар. Ӱгренӌілер матыр чир-суғӌыларынаңар, чаа араласчыларынаңар чоохтирлар.
Беларусьтың делегациязы Чааӌылар сабланызы мемориалында пол килгеннер. Ирт тағдағы хумартхы тас ідöк чир-чуғӌыларыбыстың Илбек Ада чааға улуғ хозымынаңар киречілепче!
Чахсы оңдайлығ паза пір кöстег адалча - туризм. Беларусь чуртағӌылары Хакасияның пай тархынын паза тархын ис-пайын ам на асча тиирге чарир. Арғыс хазнаның делегациязын республиканың тағларынаң азылчатхан хайхастығ кöрімнерінең таныстырған Татьяна Тюкпеева, Улуғ Нонып аалның чуртағӌызы. Хабарӌы Марина Романовская ідöк “Казановка” музей-заповедникте пол килтір. Мында, аның таниинаң, туристтер чоныбыстың пурунғы культуразынаң паза чуртазынаң чағын танысчалар. Чорыхты хабарӌылар Сойан-Сус ГЭС-тың килкім кӱзінеңер искірігнең тоосчалар. Ким суғӌа чапчаң парчатхан кименең ибіркі чир-чайаан, кöгер турчатхан, саллығ ағастарға ибірт салған тағлар уламох сіліг кöрінчелер. Оларның аразында Ким суғның ағынынаң чарытхы сығарчатхан килкім тулғор уламох илбек пілдірчетпес пе!
Беларусьтағы телевидение кöзідиин YouTube-каналында пу ссылкаӌа табарға чарир: https://www.youtube.com/watch?v=kuKmP1QUq3c.
Автор :
Тимнеен Наталья Субракова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде