ТАҢ ХАҶАН ДАА АМЫР ЧАРЫП ТУРЗЫН
20.05.2022
Хабарлар
Сомда: Пресс-конференция тузында
Культура. Хакасияның культура министерствозында Санкт-Петербургта ирткен «Зори здесь тихие» опера ойынының салтарлары чарыдылған
РСФСР ИСКУССТВОЗЫНЫҢ САБЛЫҒ ДЕЯТЕЛЫ, КОМПОЗИТОР КИРИЛЛ МОЛЧАНОВТЫҢ ОПЕРАЗЫНА ТУРҒЫЗЫЛҒАН ОЙЫН СІЛКЕР АЙЫНЫҢ 13-ҷi ПАЗА 14-ҷi КӰННЕРІНДЕ ЛЕНСОВЕТӀҢ АДЫНАҢ КУЛЬТУРА ӦРГЕЗІНДЕ ПАЗА ЛЕНИНГРАД ОБЛАЗЫНЫҢ ИСКУССТВО ӦРГЕЗІНДЕ ИРТКЕН. КӦРІГҶӀЛЕРНІҢ ТИКСІ САНЫ - 5-6 МУҢ КІЗІ. ОЛАРНЫҢ САНЫНДА ӦӦНІНДЕ ЧААҶЫЛАР, КАДЕТТЕР, РОСГВАРДИЯ ПАЗА ОМОН ТОҒЫНҶЫЛАРЫ, АФГАНИСТАНДАҒЫ ЧААЛАЗЫҒЛАРДА АРАЛАСХАН ВЕТЕРАННАР ПАЗА ӰГРЕНҶӀЛЕР ПОЛҒАННАР. ОЛАРҒА ЧАА ТЕМАЗЫ ЧАҒЫН.v
Гастрольда Хакас филармониязының кӧгҷілері, музыка колледжінің студенттері паза «Каданс» хор араласханнар. Хакас Республикаа Россияның культура министерствозының «Піс - Россия» федеральнай программазы полызиинаң хазнаның алтынзархы ӧӧн городының сценаларында ойынны турғызарға оңдай полды.
- Кӧрігҷілер турып, ӱр ізіг айа сапханнар. Оларның санында Санкт-Петербургтың тастындағы палғалыстарҷа паза культураҷа комитеттерінің тоғынҷылары, Мариинскай театрның артисттері, Санкт-Петербургтағы консерваторияның ректоры полғаннар. Мындағ уғаа кӱстіг публика «Зори здесь тихие» ойында харах чазын тудын полбаан. Культураҷа комитет кнезінің орынҷызы мындағ ізіг айа сабызын кӧрерге ӱр киліспеен теен. Кӧрігҷілер он минутача артисттерні сценадаң позытпааннар. Мин Нева суғ хазында турчатхан городтың чуртағҷыларының чӱреен аптап алған пістің хайхастығ труппаа улуғ алғызым читірчем, - теен Хакасияның культура министрі Светлана Окольникова.
Санкт-Петербургсар чӧрген чорыхтаңар филармонияның директоры, Хакасия искусствозының саблығ деятельі, симфоническай оркестрнің дирижёры Вячеслав Инкижеков позының кӧңнінең ӱлескен. Аның алнында оой нимес пӧгін турған - хысха тус аразына пістің филармония кӧгҷілерінең паза Санкт-Петербургтағы Н.А.Римский-Корсаковтың адынаң консерватория студенттерінең піріктірілген оркестр тимнебізері.
- Пастағы кӱнде піс хада тимненіп пастаанда, ноға ла пістің оркестрнің прай кӧгҷілерін албаабыс тіп сағынғам. Че соонаң чииттер постарын ӧткін тудын сыхханнар. Анаң сілкер айының 13-ҷі кӱніндегі тун ойында прайзы матлама ойнаан. Студенттер постарының устарын чахсы кӧзіт пиргеннер, - таныхтаан Вячеслав Инкижеков.
Хакас филармониязының «Каданс» хорының устағҷызы Марина Штарк Санкт-Петербургтағы кӱннерні, чӱрексіп, сағысха кирче. Аның артисттері, чиит хыстар, «Зори здесь тихие» опера ойынында ӧӧн матырлар полғаннар нооза.
- Пістің ӧмее улуғ сценада ойниры сыныхтағ чіли пілдірген. Хорға пылтыр пайрамнығ 35 чыл толған. Анча кӧп тус пір ӧменең устап, мин аарлығ сыйых алдым - Санкт-Петербургтағы спектакль. Аның ӱчӱн тың ӧрінчем! Минің хызыҷахтарым пу сыныхтағны турыстыра иртібіскеннер, - теен Марина Штарк.
Хакасияның культура министерствозында иртчеткен пресс-конференцияа видео палғалысча Санкт-Петербургтаң опера ойынының режиссёр-постановщигі Ольга Маликова хозылған. Ол чайаачы ӧмее паза улуғ проекттің араласчыларына алғызын читірген.
- Мин кӧрігҷілернең хада залда одырғам. Ойын сынап пӧзік синде толдырылған. Режиссёр полып, спектакльзар паза пір дее ниме хозарым паза хыйа аларым килбинче, - таныхтаан Ольга Маликова.
Амды «Зори здесь тихие» операны Россияның пасха регионнарында паза піснең ынағласчатхан хазналарда кӧзідерге пӧгінчелер. Луганск паза Донецк чон республикаларынзар чидерге сағынчалар.
- Ол республикаларзар парарға хорыхпинчазар ба? - сурған чиит артист хыстардаң культура министрі.
- Чох, хорыхпинчабыс, - нандырғаннар «Зори здесь тихие» ойынның ӧӧн матырлары.
Таң хаҷан даа амыр чарып турзын!
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде