КӦС КИЛГЕННЕРГЕ - ЮРИСТ ПОЛЫЗИИ ТИККЕ
20.05.2022
Хабарлар
Хакасияның Ӧӧркі Чӧп президиумының араласчылары
Президиум. Хакасияның Ӧӧркі Чӧбі президиумының теестегі чыылии азых иртті тиирге чарир. Тымо тузында чыылығда президиум араласчылары паза чоох тутчатханнар ла араласханнар
Президиумның теестегі чыылиинда 12 сурығ ӱзӱрілген. Хакасияның Ӧӧркі Чӧбінің кнезі Владимир Штыгашевтің устаанынаң комитет-комиссиялар кнестері теестегі сессия ӱзӱриине нинҷе-де закон проектін сығарарға чаратханнар паза Хазна Думазы депутаттарының паза Федерация Чӧбі сенаторларының хай пірее пастағларынаң чарасханнар.
Республика правительствозы Луганск паза Донецк чон республикаларынаң кӧс килген чуртағҷыларға тикке юрист полызиин ал полар чуртағҷылар санына кирер ӱчӱн, «Хакас Республикада тикке юрист полызиинаңар» законға алызығлар кирер пастағнаң сыххан. Конституция законнарын сығарарынҷа, хазна пӱдіриинҷе, законностьча паза правопорядокча комитет кнезі Светлана Могилина закон проекті тӱзедіглер киректепчеткеннеңер искірген. Оларны комитет пу чағында иртер сессияа тимнеп салар. Комитет араласчыларының кӧрізінең, юрист полызиинаң тикке тузалан полар чуртағҷылар санын паза сурығларны алғыдарға кирек, кӧзідімге, I паза II группа кинектеріне турада истіг чуртир оңдайларны тӧстирінҷе айланарынҷа.
Хакасия правительствозы паза пір закон проектінең сыхча. Ол муниципалитеттерде паза муниципалитеттер аразындағы чонны тартчаң транспортта паалар турғызарына теелче. Сағам ол право республика правительствозының полномочиеліг органының на пар, закон проектінҷе аны ідӧк муниципалитеттерге пирері кӧрілче. Президиумның закон проектінҷе сурығлар сығысса даа, аны теестегі сессияның ӱзӱриине сығарарға чарадылған.
Табығ комиссиязы ікі закон проектінең сыхча. Пірсінде «Хакасия пазының - Хакасия правительствозы кнезінің тоғызын тохтадар оңдайдаңар» республика законының паза алынҷа закон акттарының тоғызы тохтадыларынаңар чоох парча, ікінҷізі - табығлардаңар паза референдумнардаңар закон акттарына алызығлар кирердеңер.
Пу пастағлар ікізі пістің законнарны федеральнай законнарға килістіре алыстырарынаң палғалыстығ. Ирткен чылда 21 декабрьда «Россияның субъекттеріндегі ӱлгӱнің пірге оңдайларынаңар» закон алыл парған. Наа законда табығҷыларның регион пазын тоғызынаң азынада суурар правозы кӧрілбеен. Пу закон проекттері ідӧк теестегі сессияда ӱзӱрілер.
Хакасияның Ӧӧркі Чӧбі ідӧк Чииттер парламентінің араласчыларын чарадыбысхан. Парламенттегі партия фракциялары чииттернің халых чӧбінзер постарының кізілерін сығарғаннар: «Единая Россия» партиядаң - 12 кізі, КПРф-таң - 7, ЛДПР-даң - 3, «Справедливая Россия - за правду» фракциядаң - 2 паза «Россия коммунисттерінең» - 1.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде