ПІР ЧӦПКЕ КИЛЕРІ - ӦӦН ПӦГІН
20.05.2022
Хабарлар
Сомда: Чыылығ тузында
Чыылығ. Хакасия правительствозының пістің республикада чуртапчатхан аймах киртіністіг чоннаң тоғынчатхан чӧбі теестегі чыылиин иртірген. Анда терроризмнең паза экстремизмнең тоғыр кӱрезер сурығ ӱзӱрілген
Киртініс - уғаа чуға сурығ. Мында син андағ худайға пазыр алай саңай пасха кирекнең айғас тіп чахығлар пир полбассың. Полған на кізі позы кӧңні хоостыра хайдағ-да киртініске килче. Аннаңар чыылығ тузында чоох тутханнарның полғаны ла сӧстернең сибер тузаланарға, кемнің-де кӧңнін тибіретпеске харасчатханы харахха тасталчатхан.
- Пасха хазналардаң, республикалардаң киліп, Хакасияда чуртапчатхан аймах киртіністіг чон чыылысчатхан орыннарны піс сыбыра хайығда тутчабыс, чарыдығлығ паза сыныхтағлығ тоғыс апарчабыс. Іди 2019 чылдаң сығара 26 сайбағ ілезіне сыххан. Че ол сайбағлар хоостыра пір дее уголовнай кирек азылбаан, пір чӧпке кил турғабыс, - таныхтаан республика прокурорының улуғ полысчызы Виктор Ошаров.
Виктор Валерьевичтің сӧстерінең, ӧӧн сайбағлар машиналар турғысчатхан орыннарға килісчеткен осхас. Тигіриблерзер, мечетьтерзер, олаңай даа тураларзар худайға пазырарға килген кізілер машиналарын хайди ла полза алай хайда ла полза турғыс салчалар. Андағ орыннарда чарыдығлығ тоғыс апарчатхан осхастар. Тилекейдегі теракттарны санға алза, олар кізі кӧп чыылған орыннарда иртірілчелер. Ӱрӱккен чон удур-тӧдір пасхласча, киненге кіргеннер санын кӧптелдіріп. Хакасияда андағ кӧзідімнер чоғыл, анзына ӧрінерге кирек. Че машиналарны килістіре орыннарда турғызарын ундутпасха чӧп пирчелер.
- Чон чыылысчатхан тураларның тастында паза істінде видеокамералар турғызылбинчалар, чарытхы читкіҷе полбинча. Ідӧк ӧрт ӱзірҷең тиріглерні, турадаң сыхчаң хоза ізіктерні паза даа пасха кӧп нимені сыныхтапчабыс. Ол сайбағларны чох идері хоостыра сизіндірчебіс, - чоохтаан республика прокурорының улуғ полысчызы Виктор Ошаров.
Ағаа ӱндескен чіли, Хакасиядағы христиан-баптисттернің улуғ пресвитері Сергей Стальмаков, позын ада Сергей тиирге чаратча, ол сайбағҷылар санында мин полчам теенде, чыылысхан чон кӱлімзірес салған. Чыылығда аралазарға Хубачардаң килтір. Хаҷан прокуратура тоғынчылары аның чон чыылысчатхан туразын сыныхтирға пастағызын килгенде, сағызы саңай сыхтыр. Харын даа, пір киртіністіг кізілер хада полтыр, прай кӧртірлер паза истірлер. Сах андох чӧптезіп пастаптырлар. Пола-пола килгенде, мындағ чарадыға килтірлер: пір дее хорыхчаң ниме чоғыл, ағырин-кӧӧлче читпестерні тӱзедерге сыдан саларлар.
Сынап таа, ада Сергей прихожаннарынаң хада тоғысха чапсынтыр, таныхталған читпестерні тӱзедіп пастаптыр. Сала ӧткін хылыхтығ ирен пос кӧңнінең аның полысчызы полыбыстыр, кізілердең ахча чыып пастаптыр. Кем нинҷе пирче, анча алча. Іди илееде сайбағлар чох иділтір. Мында иң ӧӧні: прокуратура тоғынҷылары оларны тың на маңзыратпинчалар, хатығлабинчалар, че табылған сайбағларны чох идерге кирек тіпчелер.
Ада Сергей орта сағынча, чоннаң кӱстіг ниме чоғыл, ӧменең чапсынза, хайдағ даа сидіксіністерні тобыр парыбызарға чарир. Ол сылтағнаң пасхазынзар мындағ чӧпнең айланған: сыныхтағнаң килген кізілердең хорығарға чарабас, полғаныбыс ла пос тоғызын толдырча. Табылған сайбағларны тузында тӱзедерге маңнанмазаң даа, пірдеезі хысхырбинча. Тоғыс иділчеткені кӧріндіре нооза.
Андағох хайығ тартхан Александр Ереминнің чооғы. Александр Владимирович Хакасия правительствозы аппарадының терроризмнең тоғыр комиссиязының устағҷызы полча. Ол чайғызын Хакасиязар ахча тоғынып аларға пасха-пасха чон кӧп чыылысчатханын таныхтаан. Ол санда Ортын Азияның паза Кавказ чирінің чуртағҷылары. Орындағы диаспораларның устағҷыларына андағ кізілерге алынҷа хайығ айландыр турарға чӧп пирген. Оларның санында хайдағ-да чаалазығларда араласханнар пар поларға айабас. Алай ба сыбыра чалғысхан на тудынчатханнарға хайығ айландырарға чӧп пирген - арса, пірее чазыттығ, хомай пӧгіннер ал чӧрче.
Ідӧк Александр Владимирович орындағы диаспораларның устағҷыларына иртірілчеткен ӱгредіглерге чӧрерге кирек теен. Оларны Москвадаң килген ӧнетін ӱгредігліг специалисттер иртірчелер нооза. Кӧп тузалығ чӧптер истіп аларға чарир.
Хакасияның национальнай паза территориальнай политика министрінің орынчызы Лев Сафьянов республиказар хырығ озаринаң, пасха республикалардаң килген кізілерге пастағы туста хайдағ полызығ пирілчеткеннеңер чоохтап пирген. Пасха чирде чуртапчатханнар Хакасиязар туғаннары алай таныстары хоостыра килглепчелер. Че пастағы туста полызығ пирчең кізілері чох полза, андағлар Россия правительствозы синінде алылған программа хоостыра хабазығ алчалар. Че прайзы ла пістің чирзер чахсы сағыснаң килбинчеттір. Іди Таджикистанның чуртағчызы, пеер килгендӧк, позын хомай саринаң кӧзіт сыхтыр, экстремизм чӧрімінде аралазарға хығырып пастаптыр. Аны, тудып алып, тӧреен чирінзер нандыра ызарға киліскен осхас.
- Аймах киртіністіг чоннаң ипти чоохтазып, пір чӧпке килерге харасчабыс. Пу тоғыс мыннаң мындар узарадыларға кирек, - теестегі чыылығны тоосхан Хакасияның национальнай паза территориальнай политика министрі Михаил Побызаков.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде