«ТАБАН ШОУНЫҢ» ХАЙХАСТЫҒ ТУЗЫ
20.05.2022
Хабарлар
Хормачы иир. Пу кӱннерде «Табан шоуның» чітіг тілліг ооллары С.П.Кадышевтің адынаң чон чайаачызы кінінің улуғ залында тығырама чыылысхан кӧрігҷілерні ікі час тохтағ чох ээреде хатхыртханнар
Хормачы оол Виктор Сагалаков, сценазар сығып, кӧрігҷілер республиканың хайдағ пулуңнарынаң килгенін . пілібіскен. «Табан шоуға» Ӱс чулдаң, Асхыстаң, Чаптыхтаң, Таштыптаң, Ағбаннаң паза пасха даа аал-городтардаң чон чыылыстыр. Че кӧбізі Пии аймаандағы Хызыл хара суғ аалдаң полған. Анзы пілдістіг, «Табан шоуда» Андрей Тюкпиеков, Алексей Сагатаев паза Виктор Сагалаков араласчалар нооза. Пу ӱс оол ол аалдаң сыххан. Ідӧк Виктор Сагалаков «Пушкинскай картача» билеттер алған кізілер пар ба тіп сурған. «Пар!» тіп хысхырғаннар залдаң. «Че, халявщиктер парох полтыр», - хормачыланған чиит оол.
Кӱлкістіг иирге ооллар нинҷе-де хысха ойын тимнеп салтырлар. Пастағы ойын «Асхыстағы гаишник» адалған. Аның ӧӧн матыры Каскар Чаптыков полған, ойында - инспектор Турғузаков.
- Гаишник поларға аар. Асхыста гаишник поларға уламох аар. Асхыста тадар гаишник поларға тимеер аар. Асхыста най кӧп туғаннығ тадар гаишник поларға, андағ сӧстер чоғыл, хайди иртіре аар, - ойынны пастаан Виктор Сагалаков.
Анаң сценазар ГАИ тоғынҷызы формазын кис салған инспектор Турғузаков кӧг хоостыра хойралып ала сых килген.
- Пілчезер бе, ноға мин Асхыстағы гаишник полчам, а? Мині школада прайзы соххан. Мин армия соонаң гаишник полып тоғынчам, Асхыстағы трассада ӱлгӱ полчам. Хырых саннығ танығ турза, нинҷедең ойладарға кирек, а?
- Алтоннаң! - нандырғаннар залда одырчатхан иреннер.
- Хайди алтоннаң? Хырыхтаң! Асхыссар килзер, мин сірерге штраф сал пирербін, - теен гаишник оол. - Минің пір дее сайбағҷы чоғыл. Мин туюххан даа ахча албинчам.
Ол арада «Трасса чарых ползын, ээлері інектерін чолға сығарбазыннар, сайбағҷылар піске ахча кӧп тӧлезіннер» чоохтанып ала Асхыстағы чолны «подполковник» Виктор Сагалаков, ирбен отнаң аластап, чарыт сыххан. Ағаа пастыхтары андағ чахығ пиртірлер. Анаң ол чӧре халған. Ол арада гаишник, чолдағы сайбағчыларны китеп, хайа алтында чат салған.
Кемні ле тохтатпаан Асхыстағы гаишник. Пастағызын ағаа пайрамнаң ибзер нан париған изірік ирепчі орта пол парған. Олар Турғузаковха ыраххы таныстары пастыра туған полыбызарға итчелер. Че чоохтаза килгенде, Асхыстағы инспектор хайдағ-да Светазар «суғ ізерге» сыбыра чӧрчеткенін піліп алчалар. Аны пірдеезіне таратпазыннар тіп, Турғузаков ирепчее пір муң салковай пирче.
Ідӧк инспектор «Кӱн сузы» теелбек ансамбльының артизі, Хакас телевидениезінің ведущайы Алексей Торбастаевті тохтадыбысхан. Ол Ағбанзар «Табан шоуға» маңзырап париған. Инспектор документтерін сурғанда, Алексей Торбастаев ағаа телевидение хабарҷызы Альберт Кулумаевтің, соонаң оператор Евгений Чаптыковтың удостоверениелерін кӧзіткен. Ол служебнай транспорттығ ойлат париған полтыр. Хада тоғынчатхан нанҷыларының документтері машинада полтыр.
Гаишник Турғузаков машиналығ ойлат париған ипчіні (артист Алексей Сагатаев) тохтадыбысханын кӧрерге хынығ полған. Ол хойнында чурухха ораалых час пала хучахтап салтыр. Инспектор, «форточканы азыңар» тіп, машина кӧзенеензер тохладыбысхан.
- Мында форточка чоғыл. Ирім оода сабысхан. А син, форма кис салып, кізіні таныбиныбыстьщ ма? Мин синің харындазың Витяның ипчізі полчам, - нандырған ніске ӱнінең.
- Ноға паланы олған креслозына одыртпинчазың? - сурған Турғузаков.
- Витя ахча тоғын полбинча, аннаңар кресло ал полбинчабыс, - ылғабысхан палалығ ипчі.
- Мин Витяны ГАИ-зар тоғынарға хығырғам. Кізі чооғын испинче нооза. Минің мында чал ахчазы уғаа пӧзік, 17 муң салковай алчам. Хынзам - халас алып алчам, хынзам - албинчам. Хынзам - садығ туразынзар чӧрбинчем, - ӧкпелен сыххан гаишник.
Анаң Турғузаков нигеҷізіне, пала тойында полбаан ӱчӱн, пис муң салковай пирген.
Іди, чолдағы сайбағҷыларны тудып, штраф салар орнына, гаишник Турғузаков оларға позының ізебінең ахча пир турған. Хормачы иирде «Хайхастығ тус» хысхаҷах ойын пасталыбысханда, зал ээреп тохтап полбин сыххан. «Табан шоуның» ооллары «Великолепный век» тӱрк кинозын хакас оңдайына алыстырыбыстырлар. Аның полтазы хоостыра Хакас чирінде Хара Хусхун сулейман (артист Алексей Торбастаев) чуртаптыр. Ол гаражында улуғ нимес гарем туттыр. Сулейман абахайларына аттарны позы пиртір. Пастағы ипчізінің ады Тистір полтыр. Ол ипчі хаҷан-да тистір, анаң Хусхун аны алтыр. Ікінҷізінің ады - Килтір. Ол . позы килтір. Хара Хусхун хайдар парар, аны алтыр. Ӱзінҷізінің ады Істір полтыр. Ол сағарбинча одыр, че Хара Хусхун аны алыбох алтыр. Тӧртінҷі ипчізінің ады Пиртір полтыр. Хара Хусхун аны хайди алғанынаңар тархында чоохталбинча одыр. Хара Хусхун прай хыстарны алтыр, іди «Алтыр» мода театры тӧстел партыр.
Сулейманның ипчілерінең таныстырчатхан арада чон алнынзар «Алтыр» мода театрының абахай хыстары сыхханнар. Тӧрт хыс сценаа толдыра кеен турыбысханда, оларның кистінҷе сулейманның пизінҷі ипчізі Сӱремні (артист Каскар Чаптыков) сӧӧртеп килгеннер. Тутхыннар аны хайда-да тудып алтырлар. Сӱремге орыс чонның кӧгенеен кизірт салтырлар. Анаң «Хайхастығ тус» ойынның иң хынии пасталыбысхан. Сӱрем Хара Хусхунның алнында брейк-данс толдыр сыхханда, залдағы чон ээреп саңай тохтап полбин сыххан, харах чазы ахханҷа хатхырған. Ол теелбегінең Хара Хусхунның чӱреен аптап алча. Іди гаражтағы гаремде сулейманның «оң холы» полыбысча.
«Табан шоуның» оолларына улуғ алғызыбыс читірчебіс. Хормачы иир парчатхан арада олар кӧрігҷілерні «Хакас чирі» республика газетазына пазынарға хығырғаннар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде