Максим Константинович Чаптыков
23.05.2022
Хабарлар
72-чі чазын апарчадып, ағырған соонда, ах чарыхтаң парыбысты «Хакас чирі», анаң «Хабар» газетаның ӧӧн редакторы полған
Максим Константинович 7 сентябрьда 1950 чылда Асхыс аалда тӧреен. Ортымах школа тоосханда, геологтарнаң хада чир-чайаанның ис-пайын тілир тоғыснаң айғасхан, лаборант полыбысхан. 1980 чылда Иркутсктағы университеттің журналистика факультедін тоозып, Ағбан пилтірі аймааның «Путь к коммунизму» газетазында сомҷы полып тоғын сыххан. Пӧзік ӱгредігліг хабарҷыны «Советская Хакасия» газетазар алып алғаннар. Анда ол олаңай сомҷыдаң пасти ӧӧн редакторның пастағы орынҷызына читіре ӧс парыбысхан.
2005 чылда М.К. Чаптыковты «Хакас чирі» газетаның редакторына турғысханнар. Ол мында 9 чыл тоғынған, пос тілінең хабарлар пазарға кӧнігібіскен. Аның пастааны хоостыра пістің газетада «Чоным, минің чоным» рубрикалығ улуғ материаллар сых сыхханнар. Аның пӧгіні - тӧреен чирібістегі 272 аалның тархынынаңар, саблығ кізілерінеңер чарыда пас пирері. Пастағы сығарыстаңох ол хабарлар хығырығҷылар хайиин тартхан, кӧңнілерін тибіреткен.
Чайаачы кӧңніліг хабарчы 3 чыындының авторы полча. Максим Константиновичтің саблығ кізілердеңер очерктері уғаа пызығ, хоос сӧстернең пазылых полҷаңнар. Хаҷан ол Москвада сыхчатхан «Федерация» газетаның Хакасияҷа, Туваҷа, Хызылчар крайынҷа собкоры полчатханда, аның чайаачы оңдайнаң пазылған хабарларын хығырҷаң полғабыс, ӧрінісчеңміс, махтаҷаңмыс.
Хабарҷы тоғызына ол 34 чыл пир салған. Ол тустың аразына кӧп аймах сыйыхтарнаң таныхталған. Оларның иң ӧӧннері «Россия Федерациязының саблығ журнализі», «Хакасия культуразының саблығ тоғынҷызы» паза даа пасхалары.
Ах чарыхтаң парыбысты чалыннығ чӱректіг хабарҷы. Ол тӧреен чирібісті тиксі сабландырарға харасхан, сіліг чир-чайааныбыстаңар тохтағ чох кӧглеен тиирге чарир. Аның чарых омазы пістің чӱреебісте саңайға халар.
Піс аның сӧбірезінең, туған-чағыннарынаң улуғ хомзыныснаң ӱлесчебіс. Чатханың нымзах, чабынғаның торғы ползын, аарлығ арғызыбыс.
Автор :
«Хакас чирінің» тоғынҷылары
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде