ХАҶАНҒЫ СИДІКСІНІС ПӦГІЛ ПАРДЫ
25.05.2022
Хабарлар
Сомда: Хакасия пазы Валентин КОНОВАЛОВ «Коммунаровский рудник» ПАО-ның директоры тоғызын толдырчатхан
Игорь БОГАТЫРЕВНАҢ хада наа ЛЭП-тың картазын кӧрчелер
Тоғыс чорығы. Хакасия пазы Валентин Коновалов республиканың аймах муниципалитеттерінче тоғыс чорығынаң чӧрерін узаратча. Іди ирткен неделяда ол Шира аймаандағы Коммунар аалда пол килген
Коммунар Хакасияның иң ырах орныхчатхан аалына саналча. Орындағы чуртағӌылар ӧӧнінде «Коммунаровский рудник» ПАО-да істенче, итсе-де, Ортын Азиядаң килгеннер анда улам кӧп пілдірче.
Чорыхтың пастағы тохтағ орны - Коммунар алнында орныхчатхан пӧзік вольттығ линия. Ур ниместе Коммунар - Мирнай ааллар аразында наа ЛЭП тартылған. Аның узуны 48 километрге тиңнелче. Наа линия тартарын чуртағӌылар 10 чыл азыра сахтааннар. Пу тусха Коммунар аал чӧбінің пастары, депутаттары алысханнар, чарытхынаң на сидіксіністер пӧгілбеен. Коммунарда паза Мирнайда чарытхы ӧӧнінде хысхызын, хатығ соохтарда, ус парӌаң, аның кӱзі дее аар-пеер «сегірӌең», аннаңар ибдегі техника удаа кӧй парӌаң паза даа пасхазы. Пу ағырсымнығ сурығнаң ікі аалның чуртағӌылары республиканың устағ-пастаанзар сыбыра айланӌаңнар. Іди 2019 чылда Хакасия пазы Валентин Коноваловтың чахиинаң республиканың энергетикаӌа паза тарифтерӌе хазна комитеді «Коммунаровский рудник» ПАО-наң хада пу сурығнаң тирең айғас сыххан.
1968 чылда турғызылған ағас столбалар чох иділгеннер. Оларның орнына амғы тусха килістіре, прай кирексіністерге нандырчатхан 400 азыра тимір-бетон тірег, турғызылған, хайзылары нинӌе-нинӌе чыл пик турарлар. Наа ЛЭП-ты кӧріп, Хакасия пазы Валентин Коновалов таныхтаан: «Амды Коммунарның паза Мирнайның 2800-че чуртағӌызының паза социальнай объекттернің чарытхынаң сидіксіністер полбас. Улуғ тоғыс иділ парды».
ЛЭП-тың ээзі «Коммунаровский рудник» ПАО пӱӱл ідӧк наа подстанция пӱдірерге пӧгінче. Хайди чоохтапча предприятие директорының тоғызын толдырчатхан Игорь Богатырев, рудник алтын анирын чылдаң чылға алғытча, аннаңар чарытхы пирерінең сидіксіністер полбасха кирек.
Муниципалитеттерзер тоғыс чорығынаң парза, Хакасия пазы Валентин Коновалов хайди даа чоннаң тоғасча, харахтаң харахха тіл алысча. Хайдағ сурығларнаң айланғаннар коммунардағылар регион пазынзар? Чурт-коммунальнай хоныхха теелчеткен сурығ полған на муниципалитетте иртчеткен, полған на тоғазығда кӧдірілче. Коммунардағылар ирткен хысхыны хайди полза, иртіп алғабыс тіп искіргеннер, амды килчеткен хысхыны иптіг иртіп алары ікінӌілестіг. Коммунальнай система 90 процентке уурап парған. Хайди нандырған Валентин Олегович, пӱӱл хысхаа тимненеріне Коммунарға 3 миллион салковай позыдылча. Ол чидіспезе, Хакасияның пӱдіріг паза чурт-коммунальнай хоных министерствозы Коммунар аал чӧбі пазынаң хада хоза ахча позыдардаңар чӧптезерлер. Ідӧк чуртағӌылар аалға ікінӌі школа автобузы, чахсы чол, участковай тоғынӌызы кирек тіп искіргеннер. Че иң кӧп сурығ имнег киреене теелген полар. Коммунар аалның имнег туразы устағӌызының тоғызын Лариса Гончарова толдырча. Хайди ол искірген, орындағы имнег учреждение уғаа уйан оңдайда: сантехника, канализация паза вентиляция системалары саба турғызылғаннаңар, наңмырлығ кӱнде, суғ тура істінзер тамӌылапча. Аннаңар иң пастап пӱдірігнің хырынаң сидіксіністі пӧгібізерге кирек.
Аннаң пасха, учреждениенің тоғынӌылары имнег туразына табырах полызығ пирӌең машина, учреждение алнындағы чолны иптебізерге, чарытхы кирек тіп таныхтааннар. Наа машина хоостыра сурығ пӧгіл парған. Хайди тоғынӌыларға искірген Валентин Коновалов, пӱӱл Коммунарның имнег туразына табырах полызығ пирӌең ікінӌі машина пирілер. Пу искірігні орындағылар хол сабызынаң удурлааннар.
Чоннаң тоғазығда имнег киреене теелчеткен кӧп сурығ кӧдірілгенде, тоғазығ соонаң Хакасия пазы Коммунардағы имнег туразынзар чол тутхан. Ол аал тастында, тағ тӧзінде, орныхча. Часхызын хар хайылчатса, сууӌахтар имнег туразының подвалында чыылчалар, аннаңар даа анда сыбыра сыхтығ. Валентин Олегович Хакасияның пӱдіріг паза чурт-коммунальнай хоных министерствозына учреждениенің хырын алыстырар, чарытхы тартар, асфальт тӧзир сурығларны орындағы аал чӧбінең хада пӧк саларға чахаан.
- Тура хыры сайбал сыхса, аның стенелері, поллары даа іріктеп сыхчалар. Ағаа хоза оборудование сайбалча, - чооғында таныхтаан Хакасия пазы Валентин Коновалов.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде