ХАЗНА ХАБАЗИИ - ТУДЫҒ ЧОХ
25.05.2022
Хабарлар
Кризистең тоғыр штаб. Хакасия пазы Валентин Коноваловтың устаанынаң республика правительствозындағы кризистең тоғыр штабтың теестегі чыылии ирткен
Кибірли пастағы искірігнең Хакасияның юстиция паза региондағы безопасность киректерінӌе министр Сергей Ромашов чоох тутхан. Аның искіриинең, ирткен кӱннерде республикада ӱлгӱ политиказынаң тоғыр чӧрімнер санға алылбаан, ідӧк чонға алғым мероприятиелер иртірілбеен. Хакасия правительствозының туразында чара чачырастаңар искіріг кірген. Тураны, чонны сығарбин, сыныхтааннар. Чара чачырас табылбаан. Тиксі алза, чонға хорғыс ағылчатхан киректер санға алылбаза даа, республика пазы сизіктіг поларға паза ситкіп тоғынарға киректелчеткенін таныхтаан.
Хакасияның экономика тилізі министерствозы ас-тамахха пааларны хайығда тударын узаратча. Ирткен неделяда Орджоникидзе паза Боград аймахтарында алтылар садығ туразында, ол санда ікі сетьтің садығ тураларында, паалар сыныхталтыр. Пааларның тың пасхалалчатханы таныхталбинча, морковь ла 9 %-ке ӧскені санға алылған. Хызылчарстаттың таниинаң, морковь паазы ӧскені таныхталчаох, че пірее 4-5 %-ке. Аннаң пасха, рис паазы 2 %-ке ӧстір, хой иді - 8 %-ке. Яблах паазы, тізең, аны пасха чирдең читірчеткен сылтаанда 1,5 %-ке тӱстір.
Пӱдіріг материалларын алза, республиканың пӱдіріг паза ЖКХ министрі Валерий Келиннің искіриинең, чарытхы кабель паазы алынӌа садығ тураларында 35 %-ке ӧс парған, кірпис паазы - 4 %-ке, тимір эмек (6 мм) паазы 6-7 %-ке тӱстір, рубероид паазы - 15 %-ке. Бетон, газобетон, цемент паза пасха ниме-нооға паалар алыспаан. Ідӧк Россия правительствозы хай пірее пӱдіріг кирексіністерін нииктебіскен сылтаанда, кӧзідімге, чол пӱдіриин пір чылға чапчаң толдырарға чарир.
Имнер паазы алысханынаң Хакасияның хазых хайраллаӌаң министрінің орынӌызы Павел Шоев таныстырған. Амды имнернің паазы тӱсчеткені таныхталча, чыындылар ідӧк читкіӌе.
Сілкер айының 19-ӌы кӱніне хыра тоғыстары хайди толдырылғаннаңар Хакасияның аал хонии паза ас-тамах министрі Сергей Труфанов искірген. Ол тусха тоңастығлар 50 % таарыл партыр. Ізіг кӱннер турып, Алтай аймаандағылар таарығ тоғыстарын тохтадыбысханнар. Ікінӌілестіг кирек Боград аймаанда полған. Чир сых ниместеңер, хорбыӌахтар хурғапчатханы таныхталтыр. Аннаңар пірее аймахтарда сағыбас саай режимін дее кирердеңер чоох парған. Чир тамаа Ағбан пилтірі паза Пии аймахтарында одыртылча. Аал хонии техниказы паза хоза чардыхтар читчеткеннеңер сан пиріс иткен министр.
Хазна хабазии хайди читірілчеткеннеңер искір пирерге сурынған республика пазы Валентин Коновалов.
- Пӱӱл Хакасияның аал хонии ниме-ноозын сығарчатханнарға 677 миллион салковай позыдылар. Ахча тудығ чох, тузында ызылча, - нандырған Сергей Иванович. - Регионға аал хонии техниказын садызарына субсидияларға 130 миллион 900 муң салковай позыдылған. Ол ахчаа пӱӱнгі кӱнде 20 трактор, 7 комбайн, от кисчең 14 техника, тамах хурутчаң 2 техника, таарыӌаң 2 техника паза пасха аал хонии техниказы алылған.
Тиксі 288 миллион салковай хорадылған, ол санда хазна хабазии - 126 миллион салковай. Часхы хыра тоғыстарына: таарыға, ГСМ-ға, ӱреннерге паза удобрениелерге - 82 миллион салковай позыдылған. Ағаа хоза федеральнай кіннең хоза 150 миллион салковай позыдарынҷа тоғыс апарылча. Сӧбіре фермаларын тилідеріне марығ пастыра 78 миллион салковай позыдылған, аал хонии кооперативтеріне - 36 миллион салковай, «Агростартап» программа араласчыларына - 26,9 миллион салковай.
Хакасияның істеніс паза социальнай арачыланыс министрі Владимир Чебодаевтің искіриинең, хосхар айының 12-ӌі кӱнінең сілкер айының 12-ӌі кӱніне республикада тоғыс чохтарның саны 200 кізее, 2195-тең 2395 кізее теере, хозылғанын істескен. Салтарларӌа ӧзіс істеніс рыногындағы хорғыстығ алызығларнаң палғалыстығ нимес.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде