ӰГРЕНҶӀЛЕР ШКОЛАНАҢ АНЫМҶОХТАСЧАЛАР
27.05.2022
Хабарлар
Халғанҷы саң. Пу кӱннерде Хакасияның аймах пулуңнарында школа тоосчатхан ӱгренҷілернің халғанҷы саңына чарыдылған линейкалар ирткеннер. Ідӧк пу неделяда 11 класс тоосчатхан олғаннарның пастағы хазна сыныхтағлары пасталыбысты
ХАКАСИЯНЫҢ ӰГРЕДІГ ПАЗА НАУКА МИНИСТЕРСТВОЗЫ ИСКІРИИНЕҢ, ПӰӰЛ РЕСПУБЛИКАДА 2 МУҢ АЗЫРА ОЛҒАН 11 КЛАССТЫ ТООСЧА, 9 КЛАССТЫ - 6 МУҢ АЗЫРА. АҒБАНДАҒЫ Н.Г.БУЛАКИННІҢ АДЫНАҢ ЛИЦЕЙДЕ 85 ӰГРЕНҶІ 11 КЛАССТА ӰГРЕНЧЕ. ЧИИТТЕРНІ ШКОЛА ТООСЧАТХАНЫНАҢ ХАКАСИЯ ПРАВИТЕЛЬСТВОЗЫ КІЗІЛЕРІ АЛҒЫСТИРҒА КИЛГЕННЕР, ОЛ САНДА РЕСПУБЛИКА ПАЗЫ ВАЛЕНТИН КОНОВАЛОВ.
Ағбандағы Н.Г.Булакиннің адынаң лицейнің ӱгренҷілеріне халғанҷы саң сыңырапча.
- Аарлығ ӱгренҷілер, школа соонаң сірернің чуртазыңарда наа чардых пасталар. Хайдағ ол полар? Амды пілдістіг нимес, аннаңар іче-пабаларың сірернің ӱчӱн матап чӱрексіпче поларлар, итсе-де, хаҷан-да олар даа выпускник полғаннар. Сірернің амды андағ тус, хачан алныңарда прай ізіктер азых, хайзын таллап аларзар, іди чуртазыңар парар. Ізенчем, кӧбізі таңдағызына кӧстег таллап алған полар. Ӧӧні - профессия сірернің чӱрееңерге чағын полары. Андағ полза, тоғыс ӧрініс ағылар паза анда пӧзік чидіглерге чидерзер. Школада алған пілістер сірерге улуғ туза ағылар паза сидіксіністерні тобырарға полызар, - таныхтаан чооғында Валентин Олегович.
Кибір хоостыра чииттерзер школа устағ-пастаа, ӱгретчілер, іӌе-пабалар чылығ сӧстернең айланғаннар. Халғанӌы саңны сыңырадыбызар право, тізең, тиксі Россия, вузтар аразындағы, республика паза муниципальнай синдегі марығларда, олимпиадаларда чиңіс тутхан ӱгренӌілерге пирілген. Турыстығ ӱгренӌілернің аразында Анара Ачитаева полған. Піс аннаңар «Хакас чирі» газетаның «Чиит тус» хоза сығарызында пасхан полғабыс. Танығлығ кӱнде чиит хыснаң хада линейкаа аның іӌе-пабазы паза кічіг туңмаӌаа килгеннер.
- 11 чыл аразына піс хызыҷаабысты улуғ чуртасха чахсы тимнеп алғабыс тіп санапчам, аннаңар ол школа соонаң позының чолын орта таллап аларына ікінҷілебинчебіс. Ол хаҷан даа позының алнында пӧзік пӧгіннер турғысча. Амды ағаа иң пастап хазна сыныхтағларын чахсы тудыбызарға кирек, аннаң палғалыстығ полар аның аннаң андархы чуртазы. Хазнаның ӧӧн городының вузтарынзар кірерге сағынча, че мында даа, республикабыста, халарға айабас. Піс анзына улам ӧрінерчікпіс, - тіпче Анараның іӌезі Алла Валерьевна.
- Пала кӱстенҷік паза часкалығ ӧзер ӱчӱн, ағаа хынарға кирек тіп санапчам. Ідӧк полған на пастаанына хабазарға, - чоохты узаратча сӧбіре пазы Алексей Алексеевич.
Таныхтирға кирек, пӱӱл ӱгредіг организацияларында прай пайрамнар пандемия алнындағы оңдайӌа иртчелер. Хайзына ӱгренӌілер дее, улуғлар даа ӧрінчелер. Кізі школаны пір ле хати тоосча нооза, ол сағыста ӱрге халарға кирек...
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде