РЕГИОН ТИЛІЗІНІҢ СУРЫҒЛАРЫ ӰЗӰРІЛГЕН
27.05.2022
Хабарлар
Сомда: Валентин КОНОВАЛОВ паза Анатолий СЕРЫШЕВ Хакасияның тиліс сурығларын ӱзӱрчелер
Тоғазығ. Хакасия пазы Валентин Коновалов, Новосибирсксер тоғыс чорығынаң чӧріп, Россия президентінің Сибирьдегі федеральнай округтағы полномочиеліг кізізі Анатолий Серышевнең тоғасхан
Тоғазығ сілкер айының 24-ҷi кӱнінде ирткен. Пастыхтар регионның амғы тилізін, хатығластар тузында экономиканың паза социальнай кӧстегнің тӱзімніг тоғынарында хаалағларны ӱзӱргеннер.
Хакасия пазы Валентин Коновалов федеральнай кіннің полызиин киректепчеткен сидік сурығларны таныхтаан. Кӧзідімге, регионның, хазна паза муниципалитет учреждениелерінің консолидированнай бюджедінің тузы ирт парған ӧдістерні чох идерінеңер чоох парған. Аннаң пасха, Валентин Коновалов президенттің полномочиеліг кізізінің аппарадынзар регионнаң хара тасты іскеркі саринзар сығарар синні паза региондағы ӧӧн предприятиелерге кризистең тоғыр хабазығны ӧскірерінҷе сурығларны федеральнай синде пӧгерге хабазығ сурап айланған.
- Полномочиеліг кізінің аппарады мин кӧдірген сурығларны сыныхтабызар паза федеральнай синде оларны пӧгерге полызар хабазығны читірер, - тоғазығ салтарларын читірген Валентин Коновалов.
Ідӧк чылығ пирҷең тусха чурт-коммунальнай хоныхтың тимненізі ӱзӱрілген. Пу сурығ полпредтің алынҷа хайиинда. Ол республиканың хай пірее город-аалларына сала ситкіп хайарға киректелчеткенін таныхтаан.
Республикада президенттің чахығлары хайди толдырылчатханы паза нацпроекттернің чуртасха кирілчеткені ӱзӱрілген. Анатолий Серышев национальнай проекттерні тузында толдырарға киректелчеткені, кӧрілген тоғыстарның толдырылчатханын сыныхтиры паза ілезіне сығарылған сайбағларны тузында чох идері ӧӧні полчатханын искірген.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде