ПІРГЕ ХАЗНА СЫНЫХТАҒЛАРЫ ПАСТАЛЫБЫСТЫ
27.05.2022
Хабарлар
Сомда: Хакасияның ӱгредіг министрінің орынҷызы Елена КОНЕВА ӱгренҷілерге ЕГЭ чахсы тудыбызарға алғапча
ЕГЭ-2022. Киӌее тиксі хазнада 11 класс тоосчатхан ӱгренӌілернің пірге хазна сыныхтағлары пасталыбысхан. Пастағы сыныхтағ химия, география паза литература предметтерӌе ирткен
Хакасияда пу предметтерні 500 азыра ӱгренҷі таллап алған. Оларның кӧбізі, 356 пала, химияҷа тутхан. Пу предмет ӧӧнінде чуртазын имнег киреенең палғалыстырарға сағынчатхан выпускниктерге кирек. Паза 32 олған географияҷа паза 130 ӱгренҷі литератураҷа пілізін кӧзіткен. Экзаменнер иртірерге 14 орын тимнелген. Пӱӱл пір олған немец тілінең экзаменні таллап алған. Че андағ даа полза, сыныхтағ прай чахығлар хоостыра иртірілер: аудитория тимнелер, экзаменационнай комиссия, эксперттер тоғынарлар.
Таныхтирға кирек, пӱӱл прай хазна сыныхтағлары пандемия алнындағы оңдайҷа иртчелер. Коронавирус пандемиязы тарапчатхан сылтаанда, ікі чыл изере ЕГЭ иртірерінде илееде хатығлас кирілген. Пӱӱл пу хатығластардаң олғаннарны зигзаг оңдайынҷа, аудиторияда 8 кізідең кӧп нимес одыртары паза ит ізиин синирі кирексіністер ле халған. Пӱӱл ідӧк информатикаҷа сыныхтағны тутчатханнар, ирткен чылдағы чіли, аны компьютер пастыра тударлар. Чылдаң чылға ӱгренҷілер обществознание, тархын паза информатика предметтерні таллап алчалар. Таныхтирға кирек, мының алнында информатикаҷа экзаменні ӧӧнінде чиит ооллар тутхан ползалар, пӱӱл, тізең, хызыҷахтар оларға хозылдылар.
- Аннаң пасха, пу чыл пастағызын на хоптар комиссиязының чыылии дистанционнай оңдайңа иртер. Амға теере ЕГЭ салтарынаң чараспинчатхан ӱгренҷілер паза оларның іҷе-пабалары чыылыға Ағбанзар кил турҷаңнар. Анзы оларға килістіре ле полбаан. Аннаңар пу чылдаң пасти прай сурығларны интернет пастыра ӱзӱрербіс, - таныхтаан чооғында Хакасияның ӱгредіг паза наука министрінің орынҷызы Елена Конева.
Ағбанда химия, география паза литература предметтерҷе экзаменні ӱгренҷілер 20 № школада тутханнар. Пу кӱнде оларға ЕГЭ-ны тӱзімніг тудыбызарға алғирға ӱгредіг министерствозының паза город управлениезінің устағ-пастаа килген.
- Ӧӧні - маңзырабасха паза чӱрексібеске. Анзы мындағ нандырығлығ туста сірерге харығ ла полар. Школада алған пілістеріңні чахсы кӧзіт пиріңер, -теен Елена Павловна.
Сынап таа, маңзыраҷаң сылтағ чоғыл. Экзаменде піліс кӧзіт пиреріне 3 час артиинаң пирілче. Аудиторияларда сыныхтағлығ тоғыстар компьютердең сығарылғаннар. Экзамен тоозылғанда, тізең, ол тоғыстар Хакасиядағы искіріглернең тоғынчатхан региондағы кінзер ызылғаннар.
Пірге хазна сыныхтаана школа тоосчатхан оол-хыстар пір ле кӱн тимненмееннер. Экзаменде пӧзік балл алып алар ӱчӱн, олар кӱннің сай пілістерін тыытханнар. Аннаң палғалыстығ полар оларның таңдағы профессиязы.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде