КИНДЕЛЕР ХАЗНАЗЫНДАҒЫ «ТАДАР ИБ»
27.05.2022
Хабарлар
Хакасияның олған библиотеказының чир-суғ ӱгренҷең паза
национальнай литература пӧлиинің устағҷызы Елена ТОХТОБИНА
Пӱӱн - Россиядағы библиотекалар кӱні. Хакасияның олған библиотеказының тоғынҷылары, кічіг частығ хығырығҷылар санын хозып алар ӱчӱн, аймах чапсых проекттерні чуртасха кирчелер
Іди ӱр ниместе чир-суғ ӱгренӌең паза национальнай литература пӧлииндегі «Тадар иб» олғаннарның пілізін алғытчаң орын нааӌылал парған. Амды пу пӧлікте экскурсиялар интерактив оңдайлары полызиинаң иртірілчелер.
- QR-коднаң тузаланып, піссер килген олғаннарға «Тадар иб хайдағ полча?», «Хакас национальнай кип-азах хайдағ полча?», «Хакастарның национальнай ас-тамаа хайдағ?» видеороликтерні кӧріп аларға чарир. Анаң оларға, кӧзідімге, постарына «потхы пызырарға» оңдай пирчебіс. Видеоларны кӧріп, оолах-хызыӌахтар хаӌан ниме салылчатханын сағын салчалар нооза. Піс палаларға кирек ниме-нооны прай тимнеп салғабыс - ас-тамахтың аттары пазылых чаӌынахтарны улуғ нимес пластик ідістерге суххлап салғабыс: «ӧріңме», «тус», «ун», «нымырха». «Хазанах» парох. Олғаннарға уғаа хынығ полча. «Ибзер парза, потхыны сынап пызыр кӧрербіс», - тіпчелер олар, - чарытхан пӧлік устағӌызы Елена Тохтобина.
Мындағох оңдайнаң пу площадкада піліс алғытчаң пасха даа ойыннарда палаларға аралазарға чарир.
- Библиотеказар килчеткен олғаннар, ойнап ала, кічіг синніг тадар ибнің істінзер кирек ниме-нооны орта турғысчалар алай тӱӱстегі тапчаң нымахтарны таапчалар. Хайзына-да, сундухты азып, андартын хакастарның кип-азаан таныхтапчатхан сӧстерні тілирге кӧңніне кірче, - чарыдарын узаратхан пӧлік устағӌызы.
2022 чыл Хакасияда Археология чылы тіп чарлал парған. Республиканың олған библиотеказында ағаа чарыдылған пулуңас тимнелібӧк парған. Анда кічіг частығ хығырығӌыларға, археологиядаңар кинде-журналларны хығырып аларынаң пасха, археолог тоғызында постарын сынап кӧрерге оңдай пирілче. Библиотекарьлар улуғ нимес хараҷахсар хум ур салғаннар, хыринда кічіг кӱрӌегестер чатчалар. Палалар, оларны алып, хасчалар, алтынаң кічіг сӱлейке ідістер сығарчалар. Ол ідістерде - Хакасияның тархынынаң, культуразынаң палғалыстығ сурығлар пазыл парған чаӌынахтар. Палалар оларға нандырыбызарға киректер. Че мындағ «археология тоғыстарын» пастир алнында, библиотекарьлар олғаннарға археологтың рюкзагын чыыбызарға чахығ пирчелер. Пурнада, тізең, кӱрген-обааларны хазарға парчатса, археолог ниме хада алчатханынаңар чарытча. Анаң оолах-хызыӌахтар ідӧк библиотекада тимнел парған «азых-тӱлӱкті», «кӱрӌек-масханы» рюкзаксар сухчалар.
Ана піди, туснаң хада-пірге хаалап, тоғын парчалар Хакасияның олған библиотеказының специалисттері. Піс оларны паза пасха даа библиотекарьларны профессия ӱлӱкӱнінең алғыстапчабыс. Чайаачы кӧңнілері оларның хаӌан даа пӧзік ползын.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде