Кем мобилизацияа тартылар?
28.09.2022
Хабарлар
Брифинг. Хакасияның юстиция министерствозының мобилизация тоғызынҷа департаментінің устағ паза искіріг пӧлии устағҷызы Сергей Максимов чардыхти мобилизациядаңар чарыда чоохтап пирген
Хакасия правительствозы туразында 23 сентябрьда чардыхти мобилизацияа чарыдылған брифинг ирткен. Анда Хакасияның юстиция министерствозының мобилизация тоғызынҷа департаментінің устағ паза искіріг пӧлии устағҷызы Сергей Максимов пістің республикада кемнерні мобилизацияа тартарларын чарыт пирген.
– Ӱр ниместе Хакасиязар мобилизация телеграммазы килген, – искірген ол. – Иң пурун Тирігліг кӱстерде служба ирткен, алынҷа чааҷы специальнозы паза килістіре опыды пар чуртағҷылар хығыртығ аларлар.
Россияның арачыланыс министерствозы нинҷе чааҷы хығыртардаңар пирген пӧгін муниципальнай пӱдістернің прай комиссариаттарынҷа ызыл партыр. Город-аймахтарның пастарына мобилизация пӧгінін толдырарына хабазарға чахығ пирілтір.
– Хакас Республикадаң пастағы разряд запазында полчатхан чуртағҷылар хығыртылар, – таныхтаан Сергей Максимов. – Кемнер олар? Ол 35 часха теере чааҷылар паза сержанттар (Халғанҷы искіріглерҷе запастағы офицерлер ідӧк хығыртыларлар). Чааҷыларны паза сержанттарны тимнир тоғыснаң чаалазығларда араласхан опыды пар офицерлер айғазарлар.
Сергей Максимовтың искіриинең, амғы туста студенттерні, срочнай службаа хығыртылчатханнарны мобилизацияа тартардаңар пір дее чоох чоғыл. Ідӧк суурылбаан алай тоозылбаан чарғылатханы пар чуртағҷыларны хығыртпастар.
Кемнер хығыртылбас:
– срочнай чааҷы службазын апарчатханнар;
– хазна вузтарында, училищелерде, колледжтерде паза техникумнарда очнай оңдайнаң ӱгренчеткен, запаста полбинчатхан студенттер, ӱгренҷілер;
– бакалавриат тоосхан соонаң магистратураа алай аспирантураа ӱгренерге кіріп алған студенттер;
– суурылбаан алай тоозылбаан чарғылатханы пар чуртағҷылар;
– мобилизация пӧгіннері пар алай оларны толдырарына хабасчатхан организацияларның тоғынҷылары;
– хазии хоостыра чааҷы службазына чарас нимес полчатханнар;
– хығыртығдаң позыдыларына пасха законнығ тӧстеглері пар чуртағҷылар.
Хазнада чааҷы запазында полчатхан тиксі 25 миллионҷа кізі саналча осхас. Хакасияда – 100 муң артиинаң. Че чардыхти мобилизация тузында хазнадаң 300 муңҷа ла кізіні хығыртары кӧрілче – служба ирткен, алынҷа чааҷы специальнозы паза килістіре опыды пар полғаннарны. Хакасиядаң нинҷе кізі хығыртыларынаңар саннар искірілбеен.
Че мобилизация тоғызынҷа департамент кізізі таниинаң, Хакасия улуғ нимес регион, аннаңар мыннаң тың кӧп кізі апарбастар. 22 сентябрьдаң пасти хығыртығ пічіктерін ыс сыхтырлар. Хығыртылғаннарға комиссариатсар кирек пічіктерні ағыл килерге кирек: хығыртығ пічиин, паспорт, чааҷы биледін, водитель правазын паза пасхазын. Полған на кізі имнег комиссиязын иртер.
Хакасияның чааҷы тимненізін иртірҷең килістіре полигоны чоғыл, аннаңар хығыртылғаннарны Центральнай чааҷы округының чааҷы частьтарынзар ызарлар. Анда оларға чааҷы кип-азаа, кирек тиріглер пирілер. Андағы полигоннарда тимненіс иртерлер.
– Пірдеезі атыс алтында полбаан, ӱгреділбеен кізілерні ызарға сағынминча, – таныхтаан Сергей Максимов.
Ідӧк ол хығыртылған чааҷыларға прай кирек социальнай хабазығ, ол санда Хакасия правительствозы саринаң – амғы туста регион синінде льготалар пирҷең паза полысчаң оңдайлар тимнелчеттір, пирілер тіп ізендірген. Оларның тоғыс орыннары хайраллалар, льготалар хоостыра олар контрактча служба апарчатханнарға тиңнелерлер.
Сергей Максимов, брифингті тоозып, мобилизацияа тартылар кізілерзер айланған:
– Аарлығ иреннер! Піс Ада чир-суу арачылағҷызы полчабыстар. Ундубаңар, сірернің кистіңерде сӧбіреңер, сірернің ипчіңер паза палаларың, іҷе-пабаңар... Пістің пӧгінібіс – постың конституциядағы ӧдізібісті толдырары. Киртініңер, хорғыс сынап пар. Сірер аны прайзы кӧрчезер – ол Запад саринаң хорғыс. Россия хаҷан даа пик полған, чааҷы-сибиряктар хаҷан даа пір чӧптіг полғанынаң паза Чир-сууна хынызынаң сабланҷаңнар. Ол пӧзік сӧстер нимес, мин сағынчам, полған на ирен аны оңарып аларға кирек. Піреезінің минуталығ хорығыс пар полза, ағаа сыданарға кирек. Мин киртінчем, пістің чуртағҷыларның кӧбізі – сынға тудынчатхан, пілінчеткен кізілер, хайзылары пістің Чир-суубысты арачылирына турыбызарға тимделер.
Автор :
Альберт Толмашов
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде