Тузында алылған чарадығ
28.09.2022
Хабарлар
Пос кӧрiзi. Хакасия чуртағҷылары Россия президенті чардыхти мобилизация чарлааннаңар пос кӧрізінең ӱлесчелер
Юрий Шпигальских, Хакасияның Ӧӧркi Чӧп кнезiнiң пастағы орынҷызы:
– Сизiнгенде, пу чарадығны тиксi хазна чуртағҷылары сағаан, олох туста прайзы пу киректi тохтирын сағыпча. Чон ӧнетiн чаа операциязы хысха тусха толдырылар сағынған. Че кирек хай-хай сидiк полтыр. Ноға сидiк? Ол Украинада чаалазығ аар парчатханынаң палғалыстығ нимес, мында тиксi кидеркi чардых пу кирекке ситкiп хайчатханы теелче. Россияны тохтадарға улуғ кӱс тузаланысха позыдылча.
Россияның иң пӧзiк ӱлгӱ синiнде, тилекейде чардыхти мобилизация иртiрердеңер алылған чарадығның кирексiнiзiн оңарчалар. Ол чарадығ киректелген! Аннаңар Россия президентi тузында паза кирек сурығҷа чоох тутхан!
Чарлалған чардыхти мобилизацияны чон аймах кӧрiснең паалапча, че пiлерге кирек, Россияның Конституциязында чаа обязательствозы пазыл парған, полған на чуртағҷының Ада чир-суун арачылир долгы пар. Пӱӱн, тiзең, хазнабысты арачылирдаңар чоох парча! Аннаңар пу чарадығ кидеркi хазналарға Россияның кибiр-чозахтарынаң на нимес, iдӧк чонынаң кӱстiг полчатханынаңар сағба пирче! Пiс турғысхан пӧгiнiбiстi толдыр поларбыс.
Хакасия улуғ полбаза даа, аның чуртағҷылары пу чарадыға тимде полғаннар, Чир-суубысха хынып, хазна пазы турғысхан чахығны толдырарлар.
Пётр Воронин, Ӧӧркi Чӧптiң аал хонии политиказынҷа, ас-тамахча паза чирнең тузаланарынҷа комитет кнезi, хакас чонның Улуғлар чӧбiнiң кнезi:
– Россия президентiнiң чахиинҷа чардыхти мобилизация иртiрерi пасталыбысты, ол ӧнетiн чаа операциязының кирексiнiзi. Аннаңар орта ба, саба ба чарадығ алылғанын ӱзӱрерге киректелбинче. Президент кирексiнiстi чахсы чарыт пирген. Сағынчам, пiс ағаа хабазарға кирекпiс! Мин аннаң чарасчам!
Чоохтирға кирек, хакас чонның Улуғлар чӧбi ӧнетiн чаа операциязы пасталғанынаң сығара Россияның Тирiглiг Кӱстерiне хабасхан. Ноға? Ол прай саринаң паалалып алылған чарадығ! Iди полбаан полза, чаалазығлар Россияның чирiнде иртерҷiктер. Нацисттер тимде полғаннар.
Хакас чонның Улуғлар чӧбiнiң президиумы чардыхти мобилизация суриинҷа чыылысхан, пiс Россия президентiнiң чарадиина хабасчабыс. Тиктең нимес ол пу чарадиинаңар чонға позы искiрген. Ол чарыт пирген: ноға андағ чарадығны алған, кем хығыртылар…
Аннаңар мин Россия президентiнiң, арачыланыс министрiнiң сӧстерiне киртiнчем. Олар тiпчелер, мобилизацияа запастағы чааҷыларның 1 процентi тартылар. Хакасиядаң нинҷе кiзi хығыртылардаңар чоохтирға сидiк, аннаңар республикада Валентин Коноваловтың устаанынаң ӧнетiн комиссия тӧстелген. Ол пу тоғыснаң айғазар.
Пiстiң, Хакасия правительствозының, муниципальнай пӱдiстер пастарының пӧгiнi – запастаң Россияның Тирiглiг Кӱстерiнзер службаа хығыртылған кiзiлернiң туған-чағыннарының, сӧбiрелерiнiң чуртас синi тӧбiн тӱспес ӱчӱн, оларны хайығда тударға! Пiс андағ полған на сӧбiренi алынҷа хайыға аларға кирекпiс!
Василий Шулбаев, Ӧӧркі Чӧптің экономика политиказынҷа, промышленностьча паза транспортча комитет кнезі:
– Мин сағынчам, ол орта чарадығ. Ноға? Россия Украинада ӧнетін чаа операциязын иртірче. Украина, тізең, ол тиріг. Аннаң хада тиксі кидеркі хазналар. Олар прай саринаң ағаа полысчалар: тирігнең, чааҷыларнаң паза пасха ниме-ноонаң. Оларнаң тиң кӱрезер ӱчӱн чонны кӧдірерге кирек. Мин сағынчам, кидеркі хазналарның ӧӧн пӧгіні – Россияның тилізін тохтадарға. Февральда ӧнетін чаа операциязын чарлабаан ползабыс, Украиназар чыылған кӱсті сығарып аларға хай-хай сидік поларҷых. Пілдістіг, хазнабысха хорғыс полған.
Пістің президент Владимир Владимирович Путин 1990 чыллар соонаң, хаҷан экстремизм, терроризм тараан паза хазна пӱдізіне хорғыс полған, пістің чонны піріктіріп алған. Пӱӱн Россия тиліпче. Тархын хазнабысты тастынаң сайбап полбазын кӧзітче, аннаңар амды істінең чох идерге кӱстенчелер.
Сағынчам, Россия чуртағҷыларының кӧбізі президентнең чарасча, ағаа хабасча. Прай ӱлгӱлерге пірігерге кирек, ол санда Хакасия Правительствозына паза Ӧӧркі Чӧбіне. Экономика паза чуртас сині тӱзімніг тоғынарға кирек. Чардыхти мобилизацияа тартылған кізілернің сӧбірелеріне прай саринаң хабазарға, полызығларны кӧрерге! Ӧнетін чаа операциязы тузында иреннер сӧбірее сағыссырабасха кирек. Олар пілерге кирек: ибде прай ниме чахсы!
Автор :
Пазып алған Наталья Сюптерекова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде