Чуртасха наа кӧрiс асчатхан ойын
30.09.2022
Хабарлар
Культура. А.М.Топановтың адынаң Хакас национальнай драма театры А.П.Чеховтың чоохтары хоостыра «Антон VS Антоша» наа ойын кӧзiткен
Ойынны iкi режиссёр тимнеен. Пастағы чардығын Хакасия искусствозының саблығ деятельi, режиссёр Саяна Ултургашева турғысхан, iкiнҷi чардығын – театрның ӧӧн режиссёры Тимур Казнов.
Писатель паза драматург Антон Чехов чиит тузында, Москвадағы университетте имҷее ӱгренчеткенде, журнал-газеттерде позының хормачы чоохтарын паза фельетоннарын Антоша Чехонте солалығ сығарҷаң. Режиссёр Саяна Ултургашева авторның студент тузында пазылған чоохтарын сценада турғысхан. Хысха ойыннарда театрның чиит артисттерi араласханнар. Пастағы чардых кӧӧленiске чарыдылча.
«Пропащее дело» ойында хоных тӧстир алнында посты хайди тудынарға чарабазынаңар чоохталча. Анда артисттер Митхас Абдин (ипчi аларға тимненчеткен оол) паза Алина Гетманова (Варвара Петровна) матырларының кӧӧленiстерiн чахсы кӧзiтчелер. Оларның талбырапчатхан чӱректерi кӧксiлерiнең сала сығара сегiрбинче. Пастап кӧрзе, чииттер сын хыныснаң тойға тимненчеткенге тӧӧйлер. Че сынында оол хысты пайы ла ӱчӱн алчаттыр. Хыстың чӱрее аның холында паза той хайди даа поларын пiлiп, оолның тiлi позып парча. Ол аны хайдағ пӧгiннең ипчее алчатханын сығарыныбысча. Артисттер Митхас Абдин паза Алина Гетманова матырларының хылых-оңдайларын, тастындағы омаларын, кӧңнiлерiн кӧрiгҷiлерге толдыразынаң читiр пиргеннер. Ойынның ӱзiгi посты орта тудынарға, артых ниме чоохтанмасха ӱгретче.
«Шуточка» ойында Митхас Абдин (чиит оол) Камилла Кокованаң (Надежда Петровна) ойнапчалар. Кирек хысхызын чылҷаң тағыҷахта полча. Надя аттығ хыс чиит оолға хынча. Оол аны тағыҷахтаң чыларға кӧӧктiрiп алча. Надя, пӧзiктең хорыхса даа, кӧӧленчеткен оолғынаң чарасча. Тағдаң чылчатханда, оол хыстың хулаана «Надя, мин сағаа хынчам» тiп сыбыхтабысча. Надя истiл парды ба тiп пiл полбинча. Арса, чил ӱбӱрген, аннаңар хулаана андағ ниме истiл парған? Cоорыҷах тағ тӧзiнде тохтап парғанда, хыс оолзар кӧрче, че аның кӧрiзiнде хыныс оды парынаңар пiр дее ниме чоохтабинча, оол Надязар олаңай ла кӧрче. Ол сӧстернi истiп алар ӱчӱн, Надя оолны тағдаң чыларға пазох хығырча. Тағдаң инген сай оол «Надя, мин сағаа хынчам» тiп сыбыхтаан. Хысхы тоозылғанҷа паза хар хайылғанҷа чииттер тағдаң чылғаннар. Надя ол сӧстерге кӧнiк парған, че аны соонда одырчатхан оол сыбыхтапчатханын сизiнмеен.
Ойынны кӧрзе, пiлдiстiг, оолнаң хыс кӧӧленiс ниме андағ полчатханын пастағызын на сизiнчелер, аннаңар посты хайди орта тудынарын, удур-тӧдiр ниме чоохтанарын пiлбинчелер. Олар ам даа олған тузынаң сыххалахтар, соорыҷахнаң катайланчалар. Оол хыстың кӧӧленiзiнең ойнапча. Итсе, аның позының даа чӱрее Надяа чатча. Надя пасха кiзее ирге парыбысча, че аның хулаанда «Мин хынчам сағаа, Надя!» саңайға халған. Ойын хынысха кӱлбеске ӱгретче.
«За яблочки» ойында Россияның саблығ артизi Геннадий Чаптыков (Трифон Семёнович), Михаил Карачаков (Карпуша) паза Митхас Абдиннең Алина Гетманова (гимназия ӱгренҷiлерi) ойнааннар. Таныхтирға кирек, Геннадий Чаптыков харам помещик Трифон Семёновичтi матлама ойнабысхан. Аның яблоколар ӧсчеткен улуғ сад пар полча. Кӱскӱзiн яблоколар, хызарта пыс парып, ағастаң тоолапчатхан туста садсар удур-тӧдiр кӧӧленiсчеткен чиит оолнаң хыс кiр парчалар. Ағастаң пiр яблоко ӱзіп алып, олар ӧрчiлiг чiп парчатханнар.
Харам Трифон Семёнович оларны тудып алча. Ол даа пiр яблокаа хараныбысча. Эрiстiг чуртапчатхан помещик, позын ӱтертiп алар ӱчӱн, оолнаң хысты хайди ла полза иреелеп сыхча. Пастап оолны нымах чоохтирға кӱстепче, хысты Худай сӧзiн хығыртча. Соонаң хысха оолны сырайынаң cабызарға, анаң сазынаң тартарға чахығ пирче. Хыс чооғын испезе, салғанахнаң чыртар тiп чочытча. Хыс, салғанахнаң cахтырарынаң хорығып, помещиктiң чахиин толдырча. Анаң Трифон Семёнович оолға хысты соғарға тiпче. Оол даа хысты ӱр паза тың сохча. Ол нименi кӧрiп, чииттерге тосханҷа хатхырып алып, Трифон Семёнович ибiнзер азыранарға парыбысча.
Пу ойында пiс помещиктiң хомай сарин кӧрчебiс. Че iдӧк удур-тӧдiр кӧӧленiсчеткен чииттернiң хыныстары сынында пик полбиндыр тiп пiлiп алчабыс. Полғаны ла позына хынчаттыр, айапчаттыр. Хыс, салғанахнаң сахтыртып албас ӱчӱн, оолғын сох салча. Оол даа хызынаң ӧдiс алча. Мындағ сыныхтағ соонаң оолнаң хыс паза тоғаспааннар.
«О том как я в законный брак вступил» ойында артисттер Митхас Абдин (ипчi аларға итчеткен оол) паза Карина Ултургашева (Зоя Андреевна) удур-тӧдiр кӧӧленiспинчеткен, че iҷе-пабалары кӱстеенiнең хоных тӧстеп салған чииттердеңер ойын кӧзiткеннер. Оларның чооғынаң, хыныс чох тӧстелген хоных хырыс-табыста ла иртче.
10 минуталығ антракт соонаң Хакас драма театрының ӧӧн режиссёры Тимур Казнов А.П.Чеховтың «Неосторожность (Керосин)», «Старость», «Выигрышный билет», «Тина», «Супруга» чоохтарына кӱлкiстiг ойын турғысхан. Пу ойында Хакасияның чон артизi Иван Салайдинов (Иван Дмитриевич улуғда), Хакасияның саблығ артизi Мария Кыстоякова (Шушечка), Хакасияның чон артизi Юрий Котюшев (Шапкин), чиит артист Михаил Карачаков (аптека тоғынҷызы), артист Сергей Доможаков (ортын частығ Иван Дмитриевич), Хакасияның саблығ артизi Светлана Селигеева (Маша), Хакасияның саблығ артизi Максим Султреков (Сокольский), чиит артист Дарья Тачеева (Сусанна Моисеевна) араласханнар.
Режиссёр Тимур Казнов «Антон VS Антоша» ойынның iкiнҷi чардығында харам, ахчаа хыҷыхтығ кiзiлернiң омаларын кӧзiтче. Полған на ӱзiк соонаң кӧрiгҷiлер iзiг айа сапханнар.
«Антон VS Антоша» ойын iкi час артиинаң парча. Аны кӧрiп, тосханҷа хатхырып аларға чарир.
Автор :
Татьяна Тютюбеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде