Паарсас паза хыныс – абахайларға
13.03.2024
Хабарлар
Саблығ ырҷы Артур Марлужоков абахайларның чӱректерін хайылдырча
Концерт. 8 Мартха чарыдылған ӱлӱкӱн С.П.Кадышевтің адынаң чон чайаачызының национальнай кінінің улуғ залында таныхталған
Ипти тігілген, прайзының хайиин тартчатхан сіліг кип-азах кізіні хайди хайхастығ оңдайнаң алыстырыбысча. Аннаңар чазағлығ тонанғлап салған ипчілер аразында удаа ӧрчіліг сӧстер истерге чарир полған: «Ӧӧреҷеем, синзің ме? Танып полбин халғам. Пай поларзың». Аның соонда чалахай кӱлімзірестер, ачых-чарых кӧңніліг хатхырыстар, алғыстастар.
Ипчілернің чоннар аразындағы кӱнінің пайрамына пістің республикадағы иң артых абахайлары хығыртылғаннар нооза. Оларның аразында сыйыхтар аларға килгеннері ундар даа кеен пастырыс чӧрчеткеннер. «Кӧр халыңар пістіңнерні! Пасхазынаң сала даа кинек нимеспіс, хай-хай артыхпыс» теен чіли тудынчалар, таныстарына тоғас парзалар, оңнығ ла сууласпинчалар.
Ізе-а, чалахай часхы ӱлӱкӱні пайрам кибірли пасталар алнында оларға прай ниме чарадылча. Ол даа сылтағнаң таныстарыбысты Ипчілернің чоннар аразындағы кӱнінең алғыстирға, сыбыра мындағ абахай поларға алғирға ла маңнанминчабыс. Чылығ, чалахай сӧстерні истіп, олар харах кӧзіне ӧңненіп пастабысханға тӧӧй полыбысчалар. Оңдай-хылыхтары даа саңай алысча. Иптігес ӱннері хайди нымзах тарап пастапча.
Абахайларыбысты 8 Мартнаң алғыстирға чон алнынзар сыххан Хакасияның пазы Валентин Коновалов пастағы туста сым турған – чазағлығ кӧрімніг чир-суғҷыларыбысха ӧкерсінчеткенін чазырбинчатхан. Анзын ол позының алғыстас чооғында сыбыра таныхтап турған, чылығ, паарсах сӧстернең ӧріндірген.
Анаң Хакасия пазы – Хакасия Правительствозының кнезі Валентин Коновалов республиканың істеніс матырларына, тоғыста маңат чидіглерге читчеткеннерге сыйыхтар читірген. Іди Саяногорсктағы 7 № лицейнің директор орынҷызы Марина Косых «Хакасия ӱгредиинің саблығ тоғынҷызы» аарластығ атха турысхан, пуох городтағы «Визит» культура туразының устағҷызы Лидия Крашенникова – «Хакасия культуразының саблығ тоғынҷызы» аарластығ атха.
Республикадағы М.Ю.Лермонтовтың адынаң орыс драма театрының режиссер полысчызы Ольга Чемерская паза Харатастағы ветеринар станциязының имҷізі Надежда Басистая Хакасия правительствозының Аарластығ пічиинең таныхтатханнар. Нинҷе-де кізі Хакасия правительствозының Аарластығ пічіктерін алған. Сыйыхха турысханнарны Валентин Олегович тоғыста наа чидіглерге чит турарға алғаан, Ипчілернің чоннар аразындағы кӱнінең чылығ алғыстаан.
Анаң сӧс пирілген Хакасияның Ӧӧркі Чӧп кнезі Сергей Соколға. Сергей Михайлович ӱлӱкӱнге чыылысхан прай абахайларны 8 Мартнаң ідӧк чылығ алғыстаан, сыдамах хылыхтығ полып, иреннернің алыхтарын ал турарға, палаларын ипти ӧскірерге алғаан. «Сірер пісті махачы киректерге кӧӧктірчезер, сидік тустарда полысчыбыс полчазар. Аның ӱчӱн прайзына алынҷа алғыс», – чооғын тоосхан Сергей Михайлович.
Чалахай часхының Ипчілер ӱлӱкӱні ыр-сарыннарнаң узарадылған. Республикадағы В.Г.Чаптыковтың адынаң филармонияның симфоническай оркестрі сценаа толдыра одырыбысхан. Аннаңар чон алнынзар ырҷылар ла сых турғаннар. Абахайларыбысты ӱлӱкӱннең алғыстирға филармонияның устағ-пастаа килістіре оңдай сағын таап алтыр. Кӧрігҷілернің харахтары алнында совет ӱлгӱзі тузында сабланған хоос фильмнернің кизектері ирт турғаннар. Анда толдырылған хыныстаңар, сіліг хыстардаңар чарых кӧңніліг сарыннарны, тізең, филармонияның ырҷылары, чон алнынзар сығып, уғаа даа чӱрексіністіг толдырғаннар.
– Чиит тузымда ла пол парғанға тӧӧйбін... Хайдағ сіліг сарыннар, я?.. Хайдағ саблығ ырҷылар кӧглеҷеңнер... Пістіңнер дее соона халбинчалар, – сыбыхтазып ала постарының сағыстарынаң ӱлесчелер улуғ частығ кӧрігҷілер.
Анаң пазох ла пістің саблығ ырҷыларыбыснаң хада хаҷаннаң чахсы таныс кӧглерні толдырып пастабысчалар. Кӧрігҷілер саринаң андағ чылығ хайығ салылчатханы сіліг ӱнніг чайаачы устарның кӧңнілерін уламох кӧдірчеткен. Абахайларыбыс постарының ӱлӱкӱніне ӧнетін чарыдылған чалахай иир хайди тоозылғанын даа сизінмин халғаннар.
Сом Дмитрий Сунчугашевти
Автор :
Анатолий Султреков
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде