Саблығ чир-суғҷыбысха чарыдып
20.03.2024
Хабарлар
Музей тоғынҷызы Игорь Таштандинов кӧзідігнең таныстырча
Кӧзiдiг. Хакасияның ӧӧн музейiнде «Мемориальный зал Леонида Романовича Кызласова» экспозиция азылған. Музей тархынынаңар алғым проект саблығ учёнайның пайрамнығ 100 чазына чарыдылча
Ол кӧзiдiг пайрамни кӧрiк айының 18-ҷi кӱнiнде азылған. Хакасияның чир-суғ ӱгренҷең музейi саблығ ученай-археологтың, этнографтың, тархын наукалар докторының адын 2007 чылдаң сығара ал чӧрче. Леонид Кызласовтың нааҷылалған экспозициязында аның кӧп саннығ наука тоғыстары кӧзiдiлче, iдӧк археология экспедицияларының салтарлары, орденнер паза сыйыхтар, аның тузаланған ниме-ноолары паза даа чапсых нимелер.
Саблығ ученайға чарыдылған экспозицияны пайрамни азарында Хакасияның культура министрiнiң тоғызын толдырчатхан Светлана Окольникова, республиканың ӧӧн музейiнiң директоры Андрей Готлиб, тархын наукаларының докторы Валентина Тугужекова паза даа пасхазы араласханнар.
– Пӱӱнгi экспозицияны тӧстирiнде паза аны чуртасха кирерiнде улуғ тоғыс иткен кiзiлернi прайзын алғыстабызарға сағынчам. Минiң кӧрiзiмнең, кӧзiдiгнi тимнеен дизайн амғы тусха килiстiре паза турыстығ. Ағаа хоза, чуртағҷыларға уғаа киректелчеткен, тузалығ паза пiлiстерiн алғытчатхан сағыстар ағылча. Аннаңар мин прайзын саблығ хакас учёнай Леонид Романович Кызласовха чарыдылған кӧзiдiг азылғанынаң алғыстапчам, – теен Светлана Окольникова.
Музейде Леонид Кызласовтың археология экспедицияларында табылған ниме-ноолар кӧзiдiге сығарылған. Оларның аразында иң танығлығ экспонаттар пар. Кӧзiдiмге, пурунғы тюрк чонның руническай пiчiктерi паза ах кииктiң нааҷылалған скульптуралары. Экспонаттарда чахсы кӧзiдiл парған изер кизiртiлгенi, анзы ах кииктер ибдегi малларға саналғанын киречiлепче.
Зал iстi иптелген, кӧрiмi саңай алыстырылған. Iдӧк кӧзiдiге Тувадағы экспонаттар сығарылған.
Чоохтирға кирек, Хакас чирiнiң сын оолғының 100 чазына чарыдылған мероприятиелер пу неделяда Хакас национальнай музейде иртер. Оларның аразында «Кызласовтың хығырығлары-2024» паза наука-практикалығ конференция. Кӧрiк айының 23-ҷi кӱнiнде, Леонид Кызлаcовтың тӧреен кӱнiнде, саблығ хакас учёнайға национальнай музейнiң ачығында хумартхы тас турғызылар.
Сом Альбина Чистогашевани
Автор :
Наталья Тюкпеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде