ХАРАТАСЧЫЛАР ХАКАСИЯНЫ ЧАХСЫ ТИЛІТЧЕЛЕР
30.08.2016
Хабарлар
ПЯТНИЦАДА АҒБАҢДАҒЫ С.П.КАДЫШЕВТІҢ АДЫНАҢ КУЛЬТУРА КІНІНДЕ ХАРА ТАС АНЫҶАҢНАРҒА КОНЦЕРТТІГ ӰЛӰКӰН ИРТКЕН. ОЛАРНЫҢ ПРОФЕССИЯЗЫ ХАҶАН ДАА УЛУҒЛАСНАҢ ТУЗАЛАНЧА. ХАРА ТАС АНЫҶАҢНАР ПІСТІҢ ХАКАСИЯНЫ ЧАХСЫ ТИЛІТЧЕЛЕР. АННАҢАР ОЛАРҒА ПОҒДАРХИРҒА ЛА ХАЛЧА. КӰСТІГ ПАЗА ТІСПЕН ІСТЕНҶІЛЕРНІ ХАКАСИЯ ПАЗЫ ВИКТОР ЗИМИН ЧЫЛЫҒ СӦСТЕРНЕҢ АЛҒЫСТААН ПАЗА ПУ ОТРАСЛЬНЫҢ ИҢ АРТЫХ ТОҒЫНҶЫЛАРЫНА СЫЙЫХТАР ЧИТІРГЕН. РЕСПУБЛИКА ПАЗЫНЫҢ ХОЛЫНАҢ ААРЛАСТЫҒ ПІЧІКТІ ПАЗА АХЧАЛЫҒ СЫЙЫХТЫ ІДӦК «ВОСТОЧНО-БЕЙСКИЙ» РАЗРЕЗТІҢ ЭКСКАВАТОР МАШИНИЗІ МИХАИЛ ТОПОЕВ АЛҒАН.
- Хакасияа Шахтёрлар кӱні танығлығ ӱлӱкӱн полча, хара тас аныҷаң отрасльда пістің муңар чир-суғҷыбыс тоғынча. Кӧп сӧбіре тӧлдең тӧлге пу сфера да істенче. Оларны аарлирға кирек. Хара-тасчыларның тоғызы аар паза хорғыстығ, че олох туста уғаа кирек! - таныхтаан регион пазы. - Пістің республикада чахсы хара тас пар, матлама специалисттер тоғынчалар паза алнында пісті пӧзік чидіглер сағыпча. 2015 чылда Хакасияда 15 миллионҷа тонна хара тас анылған. Шахтерларның тоғызы кӧп чылларға чидер. Мин прайзының сӧбірезіне часка, чидіглер паза хазых чуртас алғапчам! Иң ӧӧні - тоғыстарың хорғыс чох ползын!
Ӱлӱкӱнде харатасчыларға Хакасияның артисттері ыр-сарыннарын сыйлааннар. Че сценазар саблығ ырҷы Иосиф Кобзон сығарын пірдеезі сағыбаан. Аны айа сабызынаң чылығ удурлааннар.
Пӧзік сыйыхнаң таныхтатхан Михаил Топоев концерт соонаң ӧрінізінең ӱлескен. Ол позынаңар піди чоохтаан:
- Мин Асхыс аймаандағы Ис пилтірі аалда тӧреем, че Ағбанда чуртаам. Харатастағы тағҷылар техникумын тоосхам. 1992 чылдаң экскаватор машинизі полып тоғынчам. Мин «Изыхский» паза «Степной» разрезтерде істенгем. «Восточно-Бейский» разрезте 8 чыл тоғын парирбын. Тоғызым кӧңніме кірче. Пірееде экскаватор, оодылып, турыбысса, сидіксіністер сығыс килче. Аны тыхтирға нинҷе-де тус парыбысча. Хысхының соох кӱннерінде тимір дее чарыл сыхча. Чайғызын наңмыр харығ полча. Мин илееде чыл экскаватор машинизі полып істен парирбын, аннаңар тоғызымны ӧтіре пілчем.
Сӧбіремнең хада Хубачарда чуртапчабыс. Пӱӱл хызым Ирина, 11 классты алтын медальға тоозып, Сибирьдегі федеральнай университетсер ӱгренерге кіріп алған.
Пісті, хара тас аныҷаңнарны, саблығ ырҷы Иосиф Кобзон ыр-сарыннарынаң алғыстирға ӧнетін кил парғаны уғаа ӧріністіг. Аның концерті поларын пірдеезі пілбеен.
Че улам ӧріністіг полған, хаҷан концерт соонаң шахтёрлар СУЭК компаниядаң Форд Фокус автомобиль клӱстерін алғаннар. Мындағ аарлығ сыйыхтар читірілгеннер хара тас аныҷаңнарға профессиональней ӱлӱкӱнде. Таныхтирға кирек, пӱӱл СУЭК компания пайрамнығ 15 чылын таныхтапча.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде